फीलेमोन् 1 - चेपाङ1-2 लौ ङीकुस् काम् जाङ्ह्ओ आन राप्ओ साथी फीलेमोन्य नाङ्कायःमा ङीकोः ख्रीस्कायः ङ्हाम्ओ हौद्याङ् अफीयामा ङीकुस् काम् जाङ्ह्ओ आर्खीपस्मा नाङ्कोः कीम्हाङः थनःती वाङ्ओ ङ्हाम्ओलम्कायःमा इ चेती ङा पावुल्इ येसु ख्रीस्कोः काम् जाङ्ह्साकायः थुनती मुओहाङः लेखती ल्होक्नेःनाङ्स। इ चेती ङीकोः ख्रीस्कायः ङ्हाम्ओ हौ तीमोथीइमा लेखती ल्होक्तेःनाः। 3 ङीकोः परमेस्वर् आपाइमा ङीकोः प्रभु येसु ख्रीस्इमा नीङ्कायः योनःती योती ल्हुङ् धोमाय्ताक्तेःपै। 4 ङाकोः परमेस्वर्कः तेती तोतोक्हाङः नाङ्कोः कुरा गीलती ङाइ गलमा “च्युता” त तोनाङः 5 दोह् हायःती दाय्ह्सा “प्रभु येसुकायः गुच्युक् पेतोलेः ङ्हाम्मानौ सबै परमेस्वर्कोः मान्तालम्कायः गुच्युक् पेतो राप्मानौ” त दाय्ह्ती नाङ्कायः नोःओ सायःआलाङः। 6 ङी नाङ्कुस् ब्राङःती ङ्हाम्ओहाङः “ ‘लौ ख्रीस्सै गुच्युक् पेओ दोःनाःतय्ही’ त चीःपानौ” त दाय्ह्ती नाङ्कायः परमेस्वर्कः तेती तोनेःनाङ्। 7 परमेस्वर्कायः ङ्हाम्ओलम्कायः नाङ्इ आन ल्हुङ् धोमाय्ताक्ताङःतेःआकान्। नाङ् ओउःच्युक् राप्ओ ल्हुङ् दोःती झ्यान्ते ङाकायः आन चोङाय्ताक्ती म्रोताक्तेःआची। 8 ओउःत झ्यान्ते नाङ्इ दोह् हायःसा खेःतो त गानाक्ती तोनेःनाङ्ल। नाङ्कायः गानाक्ती तोसा खाय्सापाय् खाय्नेःनाङ् दोह् हायःती दाय्ह्सा ओउःत हायःसाकायः ख्रीस्इ बयःआताङः बा। 9 बुरु नाङ् ल्हुङ् राप्ती योनःती मुतेःनाः त झ्यान्ते नाङ्कायः ङाइ द्याह् तेओ ह मुलेःनाङः। लौ ङा पावुल्पाय् थालवःपा स्याव्ती झ्याल्खानहाङः थुनती मुतोक्हाङः इतलेः तेनेःनाङ्। 10 इहाङः थुनओ बेलाहाङः ओनेसीमस् त तोओ ख्रीस्कायः ङ्हाम्ती झ्यान्ते ङाकोः चोःलो लेखा स्याव्आ द्याह् ङापाय् ओउःकोः आपालो मुनाङः। 11 ङ्हाखेपाय् ओउःइ नाङ्कोः काम् जाङ्ह्सा फेओ लेःआः द्याह्खे ओउःइ नाङ्कायःमा ङाकायःमा काम् जाङ्ह्साकायः जाङ्ह्लेःनाःतय्ह्च। 12 ओउः ङाकोः ल्हुङ्गोरे चोःपाय् ङाइ द्याह् नाङ्कायः पाय्ह्लाङ् ल्होक्नेःनाङ्। 13 ल्होक्सापाय् ल्होक्नेःनाङ् ओउःत हायःओसै ओउःकायः इहाङः गम्सा झाक्लेःनाङः दोह् हायःती दाय्ह्सा परमेस्वर्कोः पेओ समचार् तोसाकायः ङा द्याह् इहाङः थुनती मुलेःनाङः। द्याह्पाय् नाङ्खेइ ङाकायः लव्ह्साकायः दोःतेःल ओउःत झ्यान्ते नाङ्कुस् लोय्काय्ती ओनेसीमस्खेपाय् ङाकायः लव्ह्सा थेङा इहाङः मुसा झाक्ङोतो 14 नाङ्इ आःताः ग्याती ताक्माःत “ओउःपाय् इहाङः मुसा स्याव्ल” त म्हर्आलाङः। ओउःत झ्यान्ते ङाइ गानाक्ती तोओकायः खेःल नाङ्इ लयःकोः ल्हुङ् झाक्ओ जाङ्ह्सा खाय्तेःनौ। 15 नाङ्कुस् लोने गलकायःमा मुसा थेङा ओउःपाय् ङ्हा यात्नीस् महीनाच्युक्कायः नाङ्कःसै वेङ्ओ खेःतो यादो। 16 ओहाङःसैको नाङ्कःताङ् पाय्ह्तोक्हाङः ओउःपाय् नोकरी झुङ्आले खेःल नाङ्कायः हौलेः स्याव्नाः। ओउःपाय् ङाकायःमा आन राप्ओ हौ मुलेःनाः ओउःत झ्यान्ते नाङ्कायःमा न्हाङ्तोलेः आन राप्ओ प्रभुकायः ङ्हाम्ओ नोकरीमा हौमा स्याव्लेःनाः माःर। 17 नाङ् ङाकुस् ल्हुङ् ब्राङःतोलेः मुतेःनाः त खेःया ङाकायःलेः रोम्ओलो लेखा ओउःकायःमा रोम्उ। 18 ओउःइ नाङ्कायः पेमालो हायःओया ओउःकःहाङः नाङ्कोः पैसा पाय्क्साकायः मुधाङ्नाः त खेःओया लौ ङाइलेः पाय्क्चेःनाङ्। 19 ङा पावुल् लयःकोः क्रुत्इ इ लेखनेःनाङ् “लौ दोह् खेःयामा मुनाः ओउःलेः ङाइ पाय्क्चेःनाङ्” त लेखनाङः। पाय्क्सापाय् पाय्क्नेःनाङ् नाङ्कोः लयःकोः जीङःमा ङाकःसै दोःओ लेःआः बा। 20 लौ उया हौय ङाकायःमा प्रभुकायःमा नाङ्कः ङा तेओलो लेखालेः ओउःत पेतो जाङ्ह्ताङःच। नीची ख्रीस्कोः मान्ता लेःआः ङच ङाकायः ल्हुङ् धोमाय्ताक्चाक्ची दा। 21 माः रैस नाङ्इ ओउःसै न्हाङ्तोलेः जाङ्ह्तेःनाःची त ताःनाङः ओउःत झ्यान्ते ङाइ इतलेः लेखनेःनाङ्। 22 फेरी यातैज्योः अरु कुरा मुनाः। नाङ्इ परमेस्वर्कः तेती तोओ कुरा ओउःइ लोने सायःलेःनौ ओउःत खेःओ लोने नीङ्कःताङ् “वाङ्सा दोःनाङः” त म्हर्नाङः। ओउःत झ्यान्ते ङाकायः मुसा थाव् र्ययःती गम्ची दा। 23 येसु ख्रीस्कोः काम् जाङ्ह्ओकायः ङाकुस् थुनओ एपाफ्रास्इ नमस्ते ल्होक्तेःनाः। 24 ङाकुस् काम् जाङ्ह्ओलम् मर्कस् आरीस्तार्कस् देमस् लुकामा सबै नमस्ते ल्होक्तेःनाः। 25 ङीकोः प्रभु येसु ख्रीस्इ नीङ् सबैकायः योनःतो योतेःपै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.