हेब्रैनी 13 - चेपाङ1 अरु ङ्हाम्ओलम्पाय् लयःकोः पुःचोङ् हौचोङ्लो लेखा राप्काय्ती मुन। 2 लोक्ओसै वाङ्ओलम्कायःमा पेतो रोम्सा खेःतो एत म्हेःलाम् एत रोम्तोक्हाङः यात्नीस्इ तय्ह्मामाःत लाङ्कासै ल्होक्ओमयःकायः रोम्आकानी। 3 फेरी झ्याल्खानहाङः थुनती मुओलम्कायः नीङ्मा ओउःमयःकुस् मुओलो लेखा ताःती लव्ह्सा खेःतो एतमा म्हेःलाम्। लीह्सीःओ गोरःओलम्कायः नीङ्मा लयः धेःती लीह्सीःओ गोरःती मुओलो लेखा योनःतीलेः योनु दा। 4 लौ “बीहा जाङ्ह्सा पेलेःनाः” त सबै चीःपानी। लयःकोः बुधा बुधीकुस् ह एनःसा स्याव्लेःनाः अरुकुस् एनःसा स्याव्ल। अरुकुस् एनःओलम्कायःमा ल्हास्या जाङ्ह्ओलम्कायःमा परमेस्वर्इ न्युम्ह्ताक्नाःथास। 5 पैसा क्युसा झाक्ओ ल्हुङ्पाय् फेनु। दोह् दोह् नीङ् दोःतेःनै ओउःलेः य्हवःमाःत त्याक्नु दा दोह् हायःती दाय्ह्सा “लौ नीङ्कायः ङाइ गलमा फेनेःनाङ्ल गलमा स्यास्नेःनाङ्स” त दाय्ह्ती परमेस्वर् तोआतय्ही। 6 ओउःत झ्यान्तेलेः ल्हुङ् क्रोङ्तोलेः स्याव्ती “लौ प्रभुइ ङाकायः ओम्पायःतीलेः गम्नाःताङः ङा गलमा रैसा परङल। मान्ताइ दोह्मा रेव्तो जाङ्ह्सा खाय्ताङःल” त दाय्ह्ती दाय्ह्इ। 7 परमेस्वर्कोः नोःराय् नीङ्कायः ङ्हा स्यान्ओ स्यालःओमयःकायः ल्हुङ्हाङः गीलनु। ओउःमयःइ पेतो हायःती दोह् दोह् पेओ काम् जाङ्ह्आकानी त चीःतेःनानी ओउःत झ्यान्ते ओउःमयःलो लेखालेः इत पेतो ङ्हाम्ती वाह्न दा। 8 “येसु ख्रीस्पाय् योह्मा तेन्मा स्याङ्ह्मा गलमा यातैज्योःलेः मुलेःनाः बा” 9 ओउःत झ्यान्ते नया थेथे स्यान्ओ कुरा सायःआक्तीको परमेस्वर्कोः दोङ् कुरा फेलाम्। दोह् दोह् भोस् जेःओ बेलाहाङः जेःओ लेःआः ओउः जेःधार्नाखे खेःल परमेस्वर्इ योनःती बयःधार्नाखे ङीकायः ल्हुङ् ग्रमःतलेः ङ्हाम्ताक्नाःतय्ही ओउः भोस्कोः जेःगा जेःती जवओलम्पाय् ओउःत हायःधार्नालेः दोह्मा दोःइली। 10 ङीकोः बेदीकोः तैबल्हाङः ल्हाओ थोक्लम्पाय् ओउः हेब्रैनी ल्हाती बयःओ पुरोहीत्लम्इ जेःसा ज्योल। 11 हेब्रैनीलम्कोः प्रधान् पुरोहीत्इ सात्ओ स्याः मेत्छ्याःकोः वयःखे ओउः जुगाङ् नीङ्ओ थाव्ताङ् लात्ती रेव्ओ काम् क्युम्ह्ताक्साकायः ल्हानानी। ओउः सात्ओकोः आङ्ज्याङ्खे मान्तालम् याक्ओ थाव्सै लात्ती ग्ल्युनःती म्हेःइ फुःती वाय्ओ लेःआः। 12 ओउःतलेः येसुमा सहर्कोः धोका बाहीरहाङः आलःआक्तीको ओहाङः सात्ओ लेःआः। ओहाङःसैको ओउःकोः वयःइमा मान्तालम्कायः रेव्ओसै छय्ङ्ताक्सा खाय्नौ। 13 ओउःत झ्यान्ते ङीमा येसुकःताङ् बाहीर आल्ती ओउःकुस् ब्राङ्तीलेः ब्लाय्क्सीःओ स्याव्पाःतय्ही 14 दोह् हायःती दाय्ह्सा ल्हाव्ह्दैबाङ्हाङः ङीकायः गलमा मुसा दोःओ सहर्पाय् दोह्मा नाःल। ङीइ लोनेः वाङ्सा खेःओ सहर्कायः बोङःधै मुनाःतय्ही। 15 लौ उया परमेस्वर्कायः दोह् ल्हाती बयःसा दाय्ह्सा येसुकोः मय्ङ् पेह्ती ओउःकायः लुङ्ती तोओपाय् ज्युङ्ह्तीलेः तोती ल्हाती बयःनी। ङीकोः नोःराय्इ ओउःकोः मय्ङ् ताङ्ह्ताक्ओ कुरापाय् परमेस्वर्कायः ल्हाओ थोक्लो लेखा स्याव्नाः। 16 अरुलम्कायः पेओ काम् जाङ्ह्ती लव्ह्काय्न दोह् हायःती दाय्ह्सा ओउःत हायःओमा परमेस्वर्कायः म्रोताक्ती ल्हासा थोक्लम्लो लेखा मुलेःनाः। 17 नीङ्कायः स्यालःओलम्इ तोओ कुरापाय् ग्याती जाङ्ह्नु। ओउःमयःइ नीङ्कोः रुआङ्कायः ल्युङ्ह्ती योतीमा स्यास्तीमा गम्नानी। लोने ओउःमयःकोः स्यालःओ काम् “गत स्याव्ओ आने” त दाय्ह्ती परमेस्वर्कायः ल्हाक्ती छ्यानःसालेः खेःइतो। ओउःमयःकोः कुरा नीङ्इ म्रोताक्तीलेः जाङ्ह्तेःनानी त खेःया ओउःमयःकोः काम्पाय् लीःताक्सा काम्पाय् खेःल हाःताक्सा लेःआः बा। ओउःमयःकोः काम् नीङ्इ लीःताक्तेःचानी त खेःया नीङ्कायः दोह्मा पेतो स्याव्ल। 18 ङीकायः परमेस्वर्कः तेधै मुन। ङीकोः ल्हुङ्पाय् “नीङ्तो लेःआः” त ताःती ङीइ गलमा पेतो हायःती वाह्सा बोङःनाङःसु। 19 फेरी ङाकायः नीङ्कःहाङः “रेन्ह्तोलेः द्यान्ह्सा दोःपाः” त दाय्ह्ती परमेस्वर्कः तेनाङ्स दा। इत ङाइ नीङ्कायः आन तेती तोनेःनाङ्स। 20-21 परमेस्वर्इलेः ङीकोः ताङ्ह्ओ प्रभु येसुकायः सीओसै उह्ती च्योक्ताक्आकान् बा। येसुपाय् सीती झ्यान्ते ओउः गलमा वाय्मालो तोती गम्ओ कुरापाय् पेतोलेः स्याव्नाः। ओउःपाय् ङी ङ्हाम्ओलम्कोः स्यालःओ मान्ता लेःआः। लौ ओउः झाक्ओ काम् जाङ्ह्साकायः ङीकायः ल्हुङ् धोमाय्ताक्ओ परमेस्वर्इ सबै पेओलम् दोःतेःताक्तेःपै। ओहाङःसै येसु ख्रीस्इ बयःओ ग्वम्इलेः ओउःकायः म्रोताक्सा काम्लम् जाङ्ह्ताक्पाःतय्ही। येसु ख्रीस्कायःपाय् गलकायःमा ताङ्ह्ताक्पाःथै। ओउःतलेः स्याव्पाः दा। 22 लौ पुःचोङ् हौचोङ्य इ ङाइ तोओ कुरापाय् गुह्र्माःत सायःनु दा इ चेतीपाय् लोक्तो खेःल। 23 ङीकोः हौ तीमोथीपाय् झ्याल्खानसै बेन्ओ लेःआः त नीङ्इ चीःसा खेःतो। ओउःपाय् इहाङः रेन्ह्तोलेः वाङ्नाः त खेःया ओउःकायः ङाइ नीङ्कःताङ् लात्ती वानःलेःनाङः। 24 नीङ्कोः स्यालःओ मान्तालम्कायःमा सबै ङ्हाम्ओलम्कायःमा नमस्ते ल्होक्नाङःसु ङाकुस् मुओ इताली देस्सै वाङ्ओ हौलम्इमा नीङ्कायः नमस्ते ल्होक्तेःनै। 25 लौ नीङ् सबैकायःपाय् परमेस्वर्इलेः योनःतीलेः योतेःपै। ओउःच्युक्लेः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.