खबरदुत 26 - चेपाङ1 ओहाङःसैको फेस्तस् दाय्ह्आक्तीको “लौ द्याह् लयःकायः नोःस” त दाय्ह्ती अग्रीपा राजाइ पावुल्कायः नोःसा ताक्आथै। ओउःत झ्यान्ते पावुल्इ क्रुत् प्योती “ङैलाम्” त मुताक्सा तारःपाङःआकान्। 2-3 “अ अग्रीपा राजाय इ यहुदीलम्कोः ऐन्कोः कुरामा जवओ कुरामा नाङ्इ पेतोलेः चीःतेःनौ ओउःत झ्यान्ते ङाकायः गाल्तुम्ती जाङ्ह्सा बोङःओ मुत्ध कुरापाय् नाङ्इलेः सायःसा ङाइ आन झाक्नेःनाङ्। लौ उया ङाइ तोओ कुरा द्याह् घीःती सायःचाक्ची दा। 4 लौ हौ मुतोक्हाङःसै तेन्छ्याङ्च्युक्कायः ङा लयःकोः देस्हाङःमा यरुसालेम्हाङःमा यहुदी मान्तालम्कुस् मुङोतो ओउःत झ्यान्ते ङाइ दोह् दोह् काम् जाङ्ह्आलाङः त सबै यहुदीलम्इ पेतोलेः चीःचाःताङः। 5 ङापाय् यहुदी जात्कोः फरीसीलम्लो लेखा सबै यहुदीलम्इ जवओ कुरा पेतो द्योक्तोलेः जाङ्ह्ओ खेःङोतो इतलेः इ यहुदीलम्इ आन ज्याङःतोक्हाङःसैकोः चीःतीलेः इमयः ग्याओ त खेःया ङाकायः पाःती तोसा खाय्नानी। 6 परमेस्वर्इ उय्ह्लेहाङःसैकोः आखरःहाङः तोती गम्ओ कुरा ताप्ती स्याव्साकायः ङाइ तेन्छ्याङ् ल्युङ्ह्ती योती मुनाङः स्यान्ती मुनाङः। ओउःत हायःओकायः इमयःइ ङाकायः पानःती इहाङः ङाकोः कुरा सायःलाङ् वानःताक्आताङः। 7 इ परमेस्वर्इ तोती गम्ओ रौ जीङः दोःसा कुराकायः ङी यहुदीलम्कोः बार खलक्लम्इ न्हीदीङ्हाङः याह्दीङ्हाङः परमेस्वर्कायः झाह्ती आन तेती तोनीतो ओउःमयःइ दोःसा बोङःओ रौ जीङःकोः कुरा स्यान्साकायःलेः इ यहुदीलम्इ ङाकायः द्याह् गाल्तुम्ती तोनाःताङः। अ राजाय 8 ‘सीओ मान्ताकायः परमेस्वर्इलेः उह्ती च्योक्ताक्सा खाय्नौ’ त दाय्ह्ओकायः दोह् हायःतीतेः नीङ् यहुदीलम्इ ङ्हाम्तेःनीली” त दाय्ह्ती पावुल्इ सायःलाङ् हुम्ओ मान्तालम्कायः तोआथास। 9 “लौ छ्योह्खा ङाइमा नासरेत्कोः येसुकोः कुरा ङ्हाम्आक्ङल ओउःत झ्यान्ते ओउः कुरा ङाइ आन त्याःसा बोङःङोतो। 10 ओहाङःसैको ताङ्ह्ओ पुरोहीत्लम्इ ङाकायः ताक्ती झ्यान्ते यरुसालेम्हाङः नाःतो येसुकोः कुरा ङ्हाम्ओलम्कायः ङाइ झ्याल्खानहाङः कामाआलाङःसु यात्नीस् ङ्हाम्ओलम्कायः ‘सात्पाःथास’ त अरुलम्इ दाय्ह्ती तोतोक्हाङः ङाइमा ‘माः ओउःमयःकायः सात्साआः’ त ल्याव्ह्ती पाःती तोओ खेःङोतो। 11 ओहाङःसैको सबै थनःओ कीम्लम्ताङ् आल्ती ओहाङःकोः ङ्हाम्ओलम्कायः येसुकायः फेताक्सामा प्रनःताक्सामा बोङःओ खेःङोतो। ओउः ङ्हाम्ओलम्कःताङ् ङा ओउःच्युक्लेः ल्हुङ् आन मल्ह्ती झ्यान्ते लोक्तो लोक्तो सहर्लम्हाङःमा ओउःमयःकायः चुम्ती न्युम्ह्ताक्लाङ् आल्ङोतो। 12 ओहाङःसैको एत हायःसाकायः ताङ्ह्ओ पुरोहीत्लम्इ ङाकायः ताक्ती झ्यान्ते ङा दामास्कस् सहर्ताङ् आल्ङोतो। 13 ओहाङःसैको राजाय तोकोतोय्ह् न्याम् स्याव्ती ङा साथीकुस् ल्याम्हाङः वाह्तोक्हाङः फेल्बाङ्सै ङीकःताङ् न्याम्सै झोर्तो थोङ्ओ स्याव्आ। ओउःत झ्यान्ते ङी साःताङ् खुम्ती प्लातो स्याव्आलाङी। 14 साःहाङः प्लाती मुतोक् बेलाहाङः यात्ज्योः हाव्नयः यहुदी भासा नोःओ सायःआलाङः ‘अ पावुल्य दोह् हायःतीतेः नाङ्इ इतलेः रेव्तोलेः जाङ्ह्सा बोङःतेःनाःची। इत हायःती नाङ् लयःकायः लयःलेःतेः जीक्ती न्युम्ह्ताक्तेःनाःस’ त दाय्ह्ती ओउः हाव्नयः दाय्ह्आ। 15 ‘अ प्रभु नाङ् सुलोतेः खेःतेःनाः’ त दाय्ह्ती ङाइ व्हत्ङोतो ‘नाङ्इ रेव्तो जाङ्ह्सा बोङःओ येसु लेःआः ङ’ त दाय्ह्ती प्रभु त्याङ्ती 16 ‘लौ च्योक्ती चीङ्अ। ङाकोः काम् जाङ्ह्सा मान्ताकायः छ्युङ्ह्नेःआलाङ्। ओहाङःसै ङाइ ङ्हा जाङ्ह्ओ कुरामा लोने छ्यानःसा कुरामा नाङ्इ अरु मान्तालम्कायः ल्हाक्ती तोसा खेःतेःनाः। 17 नाङ्कोः लयःकोः यहुदी जात्लम्कःसैमा अरु जात्लम्कःसैमा ङाइ दल्ताक्नेःनाङ्। दल्ताक्आक्तीको ओउःमयःकःताङ् ल्होक्नेःनाङ्। 18 ओहाङःसैको ल्होक्आक्तीको यहुदी खेःमालो जात्लम्कःताङ् आल्ती ओउःमयःकायः मीक् दोङ्ह्तोलेः ल्हुङ् थोङ्ताक्ती तोआक्तीको ओउःमयःइ सैतान्कोः रेव्ओ काम् फेती परमेस्वर्कोः पेओ काम् जाङ्ह्चानी। ओउःत हायःती ङाकोः कुरा ङ्हाम्ती ओउःमयःकोः रेव्झ्याङ्कोः क्युम्ह्ती वाय्आक्तीको ओउःमयः परमेस्वर्कोः छय्ङ्ओ मान्ताले स्याव्चै। इ कुरा तोती स्यान्साकायः नाङ्कायः ङाइ छ्युङ्ह्ती तोती ल्होक्नेःनाङ्’ त दाय्ह्ती प्रभु येसुइ तोआताङः। 19 ओउःतलेः तोआक्तीको राजाय इ माङःखाहाङः सायःओ प्रभु येसुइ तोओ कुरा ङाइ ग्याती जाङ्ह्आलाङः। 20 ङ्हा दामास्कस्ताङ् आल्ती ओहाङः प्रभु येसुइ स्यान्ओ कुरा ङाइ ल्हाक्ती छ्यानःआलाङःसु। ओहाङःसैको यरुसालेम्हाङःमा सबै यहुदीया देस्हाङःमा लोन्ते अरु अरु जात्लम्कोः देस्लम्हाङःमा ङाइ इ कुरा छ्यानःआलाङःसु। ‘सबै मान्तालम्इ लयःलयःकोः रेव्ओ काम्लम् फेती परमेस्वर्कोः कुरा पेतो ङ्हाम्ती जाङ्ह्पानी’ त तोती सबैकायः स्यान्ओ खेःङोतो। 21 इ कुरा स्यान्साकायः यहुदीलम्इ ङाकायःपाय् मन्दीर्हाङः चुम्ती सात्सा बोङःताङःतो 22-23 परमेस्वर्इ ङाकायः दल्ताक्ती गम्धाङ्आताङः। ओउःत झ्यान्ते तेन्पाय् ङाइ इहाङःकोः मीओ मान्ताकायःमा ताङ्ह्ओ मान्ताकायःमा इ कुरा ल्हाक्ती तोनेःनाङ्स। ‘ओउः परमेस्वर्इ तोती गम्ओ ख्रीस् त तोओ वाङ्ती आन लीह्सीःओ च्यवःआक्तीको सीनाः। सीआक्तीको अरुसै ङ्हालेः रौ जीङः दोःती ओउःपाय् उह्ती च्योक्लेःनाः। ओउः येसुलेः ङ्हा स्यालःसाकायः उह्ती च्योक्आ त झ्यान्ते द्याह् नया समै दाङ्खेःआ त यहुदीलम्इमा अरु जात्कोः मान्तालम्इमा चीःसा खाय्नानी’ त दाय्ह्ती तोनाङःसु। इत तोओलेः मोसाइमा ओउः अरु उय्ह्लेहाङः मुओ परमेस्वर्कोः कुरा छ्यानःओमयःइमा लोन्ह्ते स्याव्सा कुरा चीःती ङ्हालेः स्यान्आकानी। ओउः उय्ह्ले तोओ कुरा तेन्छ्याङ् स्याव्ओ त झ्यान्ते ङाइमा ओउः कुरालेः स्यान्ती तोनाङः” त दाय्ह्तीताङः पावुल्इ तोआथास। 24 पावुल्इ ओउःतलेः तोतोक्हाङः “अ पावुल् नाङ् ल्हुङ् ब्रःतीलेः तोतेःनाः रैस। नाङ्इ आन नाःतो पह्रसा चीःती झ्यान्ते ब्रःतेःआ” त दाय्ह्ती फेस्तस् अन्चलादीस्इ सोतो गोःती तोआथै। 25 “अ फेस्तस्य ङा ब्रःती तोओ खेःङल। ङाइ दोङ् कुरा पेतोलेः तोनेःनाङ्सु। 26 इ कुरा अग्रीपा राजाइ पेतो चीःनौ ओउःत झ्यान्ते ओउःकायः ङाइ ङ्र्याःती नोःती तोचाङः। इ ङाइ तोओ कुरा अग्रीपा राजाकोः मीक्हाङःमा नाःतो अरु मान्तालम्कोः मीक्हाङःमा स्याव्ओआः बा ओउःत झ्यान्ते ओउःइ सबैलेः चीःनौ। 27 लौ अग्रीपा राजाय उय्ह्लेकोः परमेस्वर्कोः कुरा छ्यानःओलम्इ तोओ कुरा नाङ्इ ङ्हाम्तेःनौया ङ्हाम्तेःउलुया। नाङ्इ ङ्हाम्तेःनौ त ताःती म्हर्नाङः” त दाय्ह्ती पावुल्इ तोआकान्। 28 “अ इच्युक् नोःआक्तीको ह नाङ्इ ङाकायः ‘ख्रीस्त्यान् स्याव्पाः’ त म्हर्ती तोती होम्तेःखेःआची” त दाय्ह्ती अग्रीपा राजा नोःआ। 29 ओउःत नोःआक्तीको “ङाइ नाङ्कायः ज्याङःतोकायः होम्ती नोःसाया ज्याङःमालोकायः नोःसाया ङाइ नाङ्कायः जुगाङ्लेः होम्सा बोङःनाङः। नाङ्मा इहाङःकोः मुओलम्मा ‘इ सबै ङालो लेखा स्याव्सा आन पेनाः’ त म्हर्ती परमेस्वर्कः तेती तोनेःनाङ्स। इ साङ्लाइ पानःओ आले ह ङा लेखा स्याव्सा खेःल” त पावुल्इ दाय्ह्ती तोआकान्। 30 ओहाङःसैको ओउःत तोआक्तीको अग्रीपा राजा नीस् पुःचाःमा अन्चलादीस्मा सबै ओउःमयःकुस् सायःती मुओलम्मा चीङ्ती बाहीरताङ् ग्ल्युङ्ह्आकाय्। 31 ग्ल्युङ्ह्आक्तीको “सात्साकायःमा झ्याल्खानहाङः कासाकायःमा इ मान्ताइपाय् दोह् रेव्तो हायःओमा जाङ्ह्उलु” त दाय्ह्ती नोःकाय्आकाय्। 32 “माः रैस ओउःइपाय् ‘लौ ङाकोः कुरा सीजर् राजाइ लयः सायःती तात्पौ’ त तोआक्उलु त खेःया ओउःकायः फेताक्सा स्याव्तो” त दाय्ह्ती अग्रीपा राजाइ फेस्तस्कायः तोआथै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.