खबरदुत 20 - चेपाङ1 ओउःमयःकायः ल्होक्आथास ओहाङःसै ओउः हुम्ती वाङ्ओलम् सबै पाय्ह्आक्तीको रीस् क्युम्ह्आक्तीको ओउः येसुकायः ङ्हाम्ओलम्कायः पावुल्इ गोत्ती वानःती ओउःमयःकायः दाम्ती तोआथास। एत दाम्आक्तीको पावुल्पाय् द्युम्मालो तीःकोः उःसै आल्ती मासीदोनीया देस्ताङ् दाह्आ। 2 आल्ती दाह्आक्तीको ओहाङःकोः जील्ला जील्लाताङ् वाह्ती आल्ती ओहाङः मुओ येसुकायः ङ्हाम्ओलम्कायः पावुल्इ लव्ह्ती स्यान्ती तोआथास। ओहाङःसैको पावुल्पाय् ग्रीस् त तोओ देस्ताङ् दाह्ती वाङ्ती ओहाङः सुम् महीनाच्युक्कायः मुआ। 3 सुम् महीनाच्युक्कायः मुआक्तीको पावुल्पाय् सीरीया देस्ताङ् तीःजहास्हाङः आल्सा म्हर्तो “सीरीया देस्कोः पेमालो यहुदीलम्इ नाङ्कायः सात्सा बोङःतेःनाः” त दाय्ह्ओ सायःती झ्यान्ते मासीदोनीया देस्हाङः च्योल्ती आल्ओ ल्याम्हाङः पावुल्इ पाय्ह्आ। 4 पाय्ह्ती आल्तोक्हाङःपाय् बेरोया सहर्सै वाङ्ओ पीह्रुस् त मय्ङ्ओकोः चोः सोपातर् त तोओ पावुल्कुस् आल्आ। फेरी थेसालोनीकासै वाङ्ओ आरीस्तार्कस्मा सेकुन्दस्मा देर्बे सहर्कोः गायुस्मा तीमोथीमा असीया देस्कोः त्युखीकुस्मा त्रोफीमस्मा 5 इ सबैखे पावुल्कायः स्यालःती त्रोआस् सहर्ताङ् दाह्ती ओहाङः ङीकायः ल्युङ्ह्ती मुआकाय्। 6 ङीखे यहुदीलम्कोः फमालो लाङ् त तोओ छ्यात्कोः स्याङ्ह्लोच्युक्कायः मासीदोनीया देस्हाङः मुआलाङी। ओउःच्युक् दीन्कायः मुआक्तीको ओहाङःसैको ङी फीलीपी सहर्हाङः तीःजहास्हाङः लन्ह्ती द्युम्मालो तीःकोः उःसै त्रोआस् सहर्ताङ् आल्ती पास्दीन् पुत्आक्तीको ओहाङः दाह्आलाङी। ओउः त्रोआस् त तोओ सहर्हाङः ङीकोः स्यालःती वाह्ओ साथीलम्कायः क्रुस्आलाङःसु। क्रुस्आक्तीको ङी ओहाङः सात्दीन्कायः मुआलाङी। 7 ओहाङःसैको आइतेबार् दीन्कोः राम्हसैलोहाङः प्रभु येसु क्ल्याय्ओ सीङःहाङः सीओ गीलती ङीइ पावुल्कुस् लाङ् फन्ह्ती जेःसा थेङा हुम्आलाङी येसुइ तोओलो लेखालेः। हुम्तोक्हाङः उनम्ह्कोः द्याह्मयःलोहाङः पावुल्पाय् ओउःमयःकःसै देङीलो वेङ्ती पाय्ह्सा बोङःआकान् त झ्यान्ते ओउःइ दोङ् याह्दीङ् पुत्तोलेः स्यान्ती नोःआताङी। 8 ङी हुम्लाङ् वाङ्ओ तान्हाङः थोङ्ताक्साकायः नाःतो बत्ती गम्ओ खेःतो। 9 ओहाङःसैको पावुल् नोःतोक्हाङः यात्चाक् युतीखुस् त मय्ङ्ओ लाव्मयः मान्ता त्यावःअकोः चोः धोकाहाङः च्युङःती मुओ खेःतो ओहाङः मुतोक्हाङः पावुल् आन ज्याङःतो नोःदा नोःदा ओउः लाव्मयःकायः एनःबुस्इ म्हय्क्थातो एनःराम्हखालेः ओउः मान्तापाय् चोः धोकासै साःताङ् रह्ती तोन्आ। ओउःतलेः नीस्तान्सै ग्लेःती साःताङ् दाह्ती सीलेःआ। ओउः लाव्मयः ग्लेःती सीआक्तीको अरुलम् ग्ल्युङ्ह्ती ओउःकायः च्योक्ताक्सा बोङःनीतो 10 पावुल्मा ग्ल्युङ्ह्ती ओउः सीओखेकायः ग्रोम्ती “र्याङःमाःत मुअ ओउःपाय् स्याक्लेःनाः” त अरुलम्खेकायः तोआथास। 11 ओउःत तोआक्तीको पावुल् त्यावःअकोः तान्हाङः द्यान्ह्ती ङीकुस् फन्ह्ओ लाङ् जेःआक्तीको प्रीमा ग्रीमी चीकीच्युक्हाङः स्यान्ती नोःकाय्आलाङी। नोःकाय्आक्तीको न्याम् थोङ्आक्तीको आले पावुल् ग्ल्युङ्ह्ती आल्आ। 12 ओउः ङ्हा तोन्ओ लाव्मयः मान्तापाय् सेलः स्याव्ती झ्यान्ते ओउः हुम्ओ मान्तालम् ल्हुङ् धोमाय्ती पाय्ह्आकाय्। 13 ओहाङःसैको पावुल्सै ङ्हा ङी तीःजहास् फेरी लन्ह्ती आसोस् सहर्ताङ् स्यालःती आल्ती दाह्आलाङी। “लौ आसोस् सहर्ताङ् नीङ्खे ङ्हा स्यालःती ओहाङः ङाखेकायः ल्युङ्ह्ती मुन” त दाय्ह्ती पावुल्इ तोती ल्होक्आताङी। ओउःत झ्यान्ते ङीखे तीःजहास्हाङः आसोस्ताङ् ङ्हा दाह्ती ल्युङ्ह्ती मुआलाङी पावुल्खे आने दोम्इ वाह्ती लोन्ते दाह्ती वाङ्आ। 14 पावुल्खे आसोस्ताङ् दाह्आक्तीको ङी तीःजहास्हाङः मुओलम्कायः क्रुस्आताङी। क्रुस्आक्तीको ओउः तीःजहास् फेरी लन्ह्ती ङी पावुल्कुस् मीतीलेने सहर्ताङ् दाह्आलाङी। 15 मीतीलेनेसै आल्ती अनम्ह्कोः स्याङ्ह्लोहाङः खीओस् त तोओ च्योल्ती चीत्सैलोहाङः सामोस् त तोओहाङः दाह्आलाङी। सामोस्सै आल्ती क्याम्सैलोहाङः एफेसस् सहर्हाङः च्योल्ती ङी मीलेतस् सहर्ताङ् दाह्आलाङी। 16 ओउः यहुदीलम्कोः भार् बयःओ पेन्तेकोस् त तोओ छ्यात्कोः दीन्हाङः पावुल्इपाय् यरुसालेम् दाह्सा बोङःउतो ओउःत झ्यान्ते “इ असीया देस्हाङः न्यास्माःत आल्इ” त दाय्ह्ती ङीकुस्इ एफेसस् सहर्हाङः न्यास्माःत च्योल्आलाङी। 17 एफेसस् सहर्ताङ् च्योल्सापाय् च्योल्ङीतो मीलेतस्हाङः दाह्ती मुतोक्हाङः ओउः एफेसस्हाङः मुओ ङ्हाम्ओलम्कोः ताङ्ह्ओ थालवःपालम्कायः पावुल्इ लयःकःताङ् गोत्आथास। 18 ओउः ताङ्ह्ओ मान्तालम् पावुल्कःताङ् दाह्ती वाङ्आक्तीको “लौ इ असीया देस्हाङः तोहा दाह्तोक्हाङःसै तेन्च्युक्हाङः ङा नीङ्कुस् वाह्ती मुतोक्हाङः दोह् दोह् गत गत हायःङोतो त नीङ्इ लयःतेः चीःतेःनानी माःर। 19 ओउः बेलाहाङः यहुदीकोः मान्तालम्इ ङाकायः आन लीह्सीःओ बयःती ङाकायः चुम्सा थुनसा सात्सा बोङःताङःतो ङाइ प्रभु येसुकोः काम् कोय् बेलाहाङः र्याःगार्ती जाङ्ह्आलाङः। 20 ओउःत लीह्सीःओ च्यवःतोक्हाङः नीङ्कायः थनःओ कीम्लम्हाङःमा नीङ्कोः लःलयःकोः कीम्लम्हाङःमा ङाइ येसुकोः कुरा सबै पेतो स्यान्ती तोओ फेनाङ्सल। 21 यहुदी जात्लम्कायःमा अरु जात्कोः मान्तालम्कायःमा ‘लौ नीङ्इ लःलयःकोः रेव्ओ काम् फेती परमेस्वर्कःताङ् ल्हुङ् द्यान्ह्ती ओउःइ ल्होक्ओ प्रभु येसु ख्रीस्कोः कुरा ङ्हाम्नु दा’ त ङाइ पेतोलेः रैमाःत तोआलाङःसु बा। ओउःतलेः नीङ्इ चीःतेःनानी। 22 द्याह् परमेस्वर्कोः ग्वालामःइ ङाकायः गानाक्ती तोती झ्यान्ते ङा यरुसालेम्ताङ् आल्नाङः। ओहाङः ङाकायः दोह् दोह्लो त हायःचाःताङः त ङाइ चीःङल। 23 सबै ङा वाह्ओ सहर् सहर्लम्हाङः ‘लोन्ते नाङ्इ लीह्सीःओ च्यवःतेःनौ’ त परमेस्वर्कोः ग्वालामःइ चीःताक्आताङः इच्युक् ह ङाइ चीःआलाङः। 24 इच्युक् ह चीःआलाङः दोह्गार् स्याव्पाः ङाइ लीह्ङल। सीचाङःया स्याक्चाङःया प्रभु येसुइ ङाकायः दोह् काम्लो बयःचाःताङः ओउः काम्लेः ङाइ दप्ती जाङ्ह्सा दोःपाङः इ ह ङा झाक्नाङः। ओउःइ बयःओ काम्पाय् इलेःआः मान्ता मान्तालम्कायः परमेस्वर्कोः पेओ समचार् तोसा लेःआः। 25 इ काम् जाङ्ह्साकायः ङा नीङ्कःहाङः वाह्ङोतो द्याह् नीङ् ङाकोः कुरा सायःओलम्इ ङाकायः फेरी गलमातेः च्यवःतेःनाङ्सल ओउःत ङाइ चीःनाङः। 26-27 नीङ्कायः ङाइ परमेस्वर्कोः कुरा सबै पेतो द्योक्ती तोनेःआलाङ्सु। ओउःत झ्यान्ते सुसु मान्ताइ परमेस्वर्कायः ङ्हाम्सा ग्यामाःत झ्यान्ते लोन्ते वाय्तो स्याव्चाः त खेःया ङाखेकायः सुइमा गाल्तुम्सा खाय्नाङ्सल। 28 ङाइ नीङ्कायः पेतो स्यान्नेःआलाङ्स त झ्यान्ते नीङ् लःलयःकायः साहीनीङ्सी लयःकोः येसुकायः ङ्हाम्ओ पुःचोङ्लम् हौचोङ्लम्कायः लव्ह्ती ओम्पायःती गम्नु दा। ओउःमयःकायः योसाकायः परमेस्वर्कोः ग्वालामःइ बयःतेःआकाय्। ओहाङःसैको लयःकायः ङ्हाम्ओलम्कायः येसुइ क्ल्याय्ओ सीङःहाङः ल्हाङःती लयःकोः वयः बयःआकान् ओउःत झ्यान्ते प्रभुकोः मान्तालम् पेतो योती साहीती मुन दा। इ ङाइ तोओ कुरा सुइमा म्हेःलाम्। 29 ङा पाय्ह्आक्तीको अरु पेमालो मान्तालम् नीङ्कःताङ् उन्चुलावःलाङ् वाङ्ती यात्नीस्कायः पेमालो हायःसा ल्हुङ् द्यान्ह्ताक्नानी। 30 नीङ् मान्तालम्कःहाङःमा लोने यात् नीस्चाक्इ पेओ काम् फेती माःती तोओ कुरा स्यान्ती अरु ङ्हाम्ओलम्कायः उन्चुलावःसा बोङःनाःथास। 31 सुम् बर्सकायः ङाइ नीङ्कायः र्याःगार् पार्गार् न्हीदीङ्मा याह्दीङ्मा स्यान्नेःआलाङ्स ओउःत झ्यान्ते इ कुरा म्हेःमाःत पेतो घीःती मुन दा। 32 द्याह् परमेस्वर्इ लयः तोती गम्ओलो लेखालेः नीङ्कायः परमेस्वर्इ पेतो ओम्पायःती गम्ती झ्यान्ते लोन्ह्ते अरु छय्ङ्ओ मान्तालम्कुस् नीङ्मा परमेस्वर्इ बयःओ रौ जीङः दोःतेःताक्तेःनै। 33-34 ङा लयःकोः क्रुत्इ काम् जाङ्ह्तीलेः लयःकोः तुक् स्यास्आलाङःस ङाकुस् वाह्ओमयःकायःमा स्यास्आलाङःसु ओउःतलेः नीङ्इ चीःतेःनानी। अरुकोः गह्र्लम् थोक्लम्कोः ङा दोह्मा लती मुओ खेःङल। 35 येसुइ स्यान्तोक्हाङः ‘लौ थोक्लम् दोह्लम् त्याक्ओसै अरुकायः बयःसालेः पेनाः’ त दाय्ह्ती प्रभु येसुइ लयः स्यान्आथास ओउःत झ्यान्ते ङाइ लयःकोः काम् धुःतीलेः जाङ्ह्ती ‘अरुकायः बयःती ह्र्यात् मान्तालम्कायः लव्ह्काय्सा खेःतो’ त छ्यानःनेःआलाङ्स” त दाय्ह्ती पावुल्इ तोआथास। 36 ओउःत तोआक्तीको पावुल् सबैकुस् ङोल्तुमःहाङः घ्रुस्ती परमेस्वर्कायः तेती तोआकानी। 37-38 परमेस्वर्कायः तोआक्तीको “द्याह्हाङःसै नीङ्इ ङाकायः गलमा च्यवःतेःनाङ्सल” त पावुल्इ तोती झ्यान्ते ओउः एफेसस्सै वाङ्ओलम्इ न्हाङ्तोलेः ल्हुङ् क्लय्ह्ती रुय्क्ती र्याःती दाम्आकानी। ओहाङःसैको ग्रोम्काय्ती दाम्आक्तीको पावुल्कायः ङी ङ्हा वाह्ओ तीःजहास्ताङ् दाक्आकानी। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.