खबरदुत 15 - चेपाङ1 ओउःनीस् अन्तीयोक् सहर्हाङः मुतोक्हाङः यहुदीया देस्सै यात्नीस् मान्तालम् वाङ्ती अरु कुरा स्यान्आकानी “मोसाइ जवती तोओ तात्सा चीन्ह त्याक्धाङ्मालो मान्तालम्कायः परमेस्वर्इ बयःओ नया जीङः दोःथासल” त दाय्ह्ती ओउः यहुदीयासै वाङ्ओलम्इ अरु येसुकोः कुरा तोहालेः ङ्हाम्ओ मान्तालम्कायः स्यान्ती तोखयःआकानी। 2 ओहाङःसैको ओउःमयःइ स्यान्ओ कुरा सायःती “इपाय् दोङ् कुरा खेःल” त दाय्ह्ती ओउःमयःकुस् पावुल्मा बर्नाबास्मा आन तानःकाय्आकाय्। ओहाङःसैको ओउःमयः ब्राङ्ती नोःसा खाय्नीली त झ्यान्ते “लौ इ कुरापाय् यरुसालेम्हाङः मुओ येसुकोः छ्युङ्ह्ओमयःकायःमा ङीकोः ताङ्ह्ओ थालवःपालम्कायःमा इ कुरालम्कायः ‘गाव्खे पेनाः’ त व्हत्ती ओउःमयःकोः ल्हुङ्तुक् योसा खेःतो” त दाय्ह्तीताङः पावुल् नीस्साथीचाःकायःमा यात्नीस् अरुलम्कायःमा छीङ्ह्ती यरुसालेम्ताङ् कुरा नोःकाय्लाङ् ल्होक्आथास। 3 ल्होक्आक्तीको पावुल् बर्नाबास्नीस् फोनीस्या देस्हाङःमा समारीया देस्हाङःमा च्योल्ती ओहाङः मुओ येसुकायः ङ्हाम्ओलम्कायः “लौ द्याह्पाय् नाःतो यहुदी खेःमालो जात्कोः मान्तालम्इ प्रभु येसुकोः कुरा ङ्हाम्नानी” त दाय्ह्ती ल्हाक्ती तोआकाचु। इत तोओ कुरा सायःआक्तीको सबै मान्तालम् “लौ इपाय् आन पेओ लेःआः” त दाय्ह्ती चोङाय्तीलेः दाय्ह्आकाय्। 4 ओहाङःसैको पावुल् साथीचोङ् आल्दा आल्दा यरुसालेम्ताङ् दाह्आक्तीको ओहाङःकोः येसुकोः छ्युङ्ह्ओमयःमा येसुकायः ङ्हाम्ओ थालवःपालम्इमा ओउःनीस् पावुल् बर्नाबास्नीस्कायः त्याक्ती रोम्आथाच। रोम्आक्तीको ओउःनीस्इ “लौ नीचीकायः परमेस्वर्इ इतलेः जाङ्ह्ती वाह्ताक्आताङःच” त दाय्ह्ती सबै ङ्हा जाङ्ह्ओ काम्लम् ल्हाक्ती छ्यानःती तोआथास। 5 इ कुरा तोआक्तीको यात्नीस् फरीसी खाल्कोः येसुकायः ङ्हाम्ओलम्इ चीङ्ती “इ यहुदी जात् खेःमालो मान्तालम्इ येसुकोः कुरा ङ्हाम्नानी त खेःया ओउःमयःकायः ङीकोः पुन् तात्ओ चीन्ह जाङ्ह्सामा खेःतो ओउःमयःइ मोसाइ बयःओ ऐन्कोः कुरा जाङ्ह्सामा खेःइतो” त दाय्ह्ती ओउः फरीसी खाल्लम् नोःआकाय्। 6 ओहाङःसैको इ कुरा नोःकाय्साकायः ओउः येसुकोः छ्युङ्ह्ओमयःमा येसुकायः ङ्हाम्ओ ताङ्ह्ओ थालवःपालम्मा हुम्ती वाङ्आकाय्। 7 हुम्ती वाङ्आक्तीको ओउःमयः तानःकाय्ती नोःकाय्दा नोःकाय्दा नोःकाय्दा ओहाङःसैको पत्रुस् चीङ्ती “लौ पुःचोङ् हौचोङ्य तेह्काल परमेस्वर्इ ङाकायः छीङ्ह्ती ‘अरु अरु जात्लम्कायः येसुकोः कुरा ङ्हाम्ताक्साकायः तोउसु’ त ङाकायः तोआताङः। एत नीङ्इ चीःतेःनानी 8 ओहाङःसैको परमेस्वर्इ सबै मान्तालम्कोः ल्हुङ्तुक् चीःती ओउः यहुदी खेःमालो मान्तालम्इ येसुकोः कुरा पेतो ङ्हाम्ओ त झ्यान्ते ङीकायःलो लेखा ओउःमयःकायःमा परमेस्वर्कोः ग्वालामः दोःताक्आथास। ङीइपाय् ओउः अरु जात्कोः मान्तालम् परमेस्वर्कोः ग्वालामः दोःओ च्यवःती 9 च्यवःआक्तीको ओउःमयःकोः रेव्ओ ल्हुङ्लम् ङीकोः ल्हुङ्लो लेखालेः परमेस्वर्इ जय्कुमःत स्याव्ताक्आथास त चीःसा खाय्नाङःसु। इतलेः सबै जात्कोः मान्तालम्कायः यात्तै जात्लो लेखालेः परमेस्वर्इ योनःती योनाःतय्ही। 10 ङी यहुदी मान्तालम्इमा ङीकोः आय्कानः तोकानःलम्इमा मोसाइ बयःओ ऐन्कोः हुकुम्लम् पेतो जाङ्ह्सा खाय्तय्ह्नीली ओउःत झ्यान्ते दोह् हायःतीतेः इ यहुदी खेःमालो मान्तालम्कायः मोसाइ बयःओ चाक्ओ हुकुम्लम् जाङ्ह्ताक्सा बोङःतेःनानी। ओउःत हायःसा परमेस्वर्कोः मीक्हाङः स्याव्ल लोल। 11 प्रभु येसुइ योनःती योधार्नालेः ङीइपाय् ओउःकोः कुरा ङ्हाम्आक्तीको ह आले रेव्ओसै दल्तो स्याव्नाःतय्ही एत हायःतीमा अरु यहुदी खेःमालो जात्लम्मा दल्नै” त दाय्ह्ती पत्रुस्इ तोआथास। 12 पत्रुस्इ एत तोतोक्हाङः सबै मान्तालम् नोःमामाःत मुआकाय्। ओहाङःसैको पत्रुस् द्योक्आक्तीको पावुल् बर्नाबास्नीस् चीङ्ती “नीची अरु जात्कोः मान्तालम्कुस्इ मुतोक्हाङः परमेस्वर्इ आन ग्याङ्ह्राय् जाङ्ह्आताङःचु” त दाय्ह्तीताङः ओउःनीस्इ सबै ङ्हा स्याव्ओ कुरा ल्हाक्ती छ्यानःआकाचु। 13 ओहाङःसैको ओउःनीस् तोती दप्आक्तीको येसुकोः हौ याकुब् त तोओखे चीङ्आ “लौ पुःचोङ् हौचोङ्य सायःती मुन दा। 14 यहुदी खेःमालो जात्लम्कःहाङः परमेस्वर्इ लयःकायः झाह्साकायः मान्ता मान्तालम् छीह्आकान्। इतलेः मेस्खा सीमोन् पत्रुस्इ छ्यानःती तोआतय्ही। 15 फेरी पत्रुस्इ तोओ कुरामा उय्ह्लेकोः परमेस्वर्कोः कुरा छ्यानःओमयःइ लेखओ कुरामा इनीस् ब्राङ्नाःच। 16 ओउः आखरःहाङः इलेः लेखती मुनाः ‘ “लोन्ह्ते ङा द्यान्ह्ती वाङ्तोक्हाङः दावुद् राजाकोः ङ्हा ह्र्योङःती वाय्ओ कीम्पाय् ङाइ फेरीलेः नया जाङ्ह्नाङः। ओउः ह्र्योङःती वाय्ओ कीम्पाय् पेतोलेः स्याव्ताक्नाङः। 17-18 ओहाङःसैको एत च्यवःती ङाइ छीङ्ह्ओ अरु अरु जात्कोः मान्तालम्इ ङा प्रभु त तोओकायः झाह्सा बोङःनाःताङः” त दाय्ह्ती उय्ह्लेहाङःसै परमेस्वर्इ तोती गम्आकान्’ त लेखती मुनाः। 19 एत हायःतीलेः यहुदी खेःमालो मान्तालम्कायः परमेस्वर्इ तेन्छ्याङ् नया काम् जाङ्ह्नौ ओउःत झ्यान्ते अरु जात्कोः मान्तालम्कायः उय्ह्लेकोः जवओ जाङ्ह्ताक्सा स्याव्ल इतलेः ङा ल्हुङ् म्हर्नाङः” त दाय्ह्ती याकुब् दाय्ह्आ। 20 “ओउः तोहा परमेस्वर्कोः कुरा ङ्हाम्ओलम्कायः इतलेः लेखती स्यान्सा खेःतो ‘द्यव्ताकायः सात्ती बयःओ अह्र्सीःओ जेःगालम्मा वयःलम्मा वयः त्युत्आक्मालो मायःलम्मा जेःतेःचानी। फेरी ल्हास्या काम् जुगाङ् जाङ्ह्माःत मुन। इ कुरा जवती अरु मोसाइ बयःओ छ्यात् जवसा परल’ इतलेः स्यान्ती लेखती ल्होक्नी। 21 इ मोसाइ बयःओ हुकुम्लम्पाय् सन्चर्बार् सन्चर्बार्हाङः सहर् सहर्हाङः यहुदीलम्कोः थनःओ कीम्लम्हाङः स्यान्ती मुलेःनाः” त दाय्ह्ती याकुब्इ तोआथास। 22 ओउःत तोआक्तीको येसुकोः छ्युङ्ह्ओमयःमा थालवःपालम्मा सबै ङ्हाम्ओलम्कुस् नोःकाय्ती “लौ इहाङः मुओ मान्तालम्कःसै यात् नीस्चाक् छीङ्ह्ती पावुल् बर्नाबास्कुस् अन्तीयोक्ताङ् ल्होक्पाःथास” त ओउःमयः हुन्द्यावःती दाय्ह्आकाय्। एत हुन्द्यावःती दाय्ह्आक्तीको नीस्चाक् ओउःमयःकोः ताङ्ह्ओ मान्ताकःसै यहुदा त तोओमा बर्साबास्मा सीलास् त तोओमा ओउः नीस्चाक्कायः छ्युङ्ह्ती चेती ल्हाती पावुल् बर्नाबास्कुस् ल्होक्आथाच। 23 ओउः चेतीहाङः इतलेः लेखओ खेःतो “लौ अन्तीयोक् सीरीया सीलीसीयाहाङः मुओ जात् जात्कोः येसुकायः ङ्हाम्ओ पुःचोङ् हौचोङ्लम्य नीङ्कायः ङीइ यरुसालेम्हाङः मुओ येसुकोः छ्युङ्ह्ओमयःमा थालवःपालम्मा सबै ङ्हाम्ओलम्कुस् नमस्ते ल्होक्नेःनाङ्स। 24 लौ इहाङःकोः मान्तालम्कःहाङःसै यात्नीस्चाक् नीङ्कःताङ् नोःलाङ् वाङ्ती नीङ्कायः ‘ल्हुङ्तुक् ब्रःताक्सा बोङःतेःनै’ त दाय्ह्ओ सायःआलाङःसु। ओउः ब्रःताक्ती नोःओलम्पाय् ङीइ तोती ल्होक्ओ खेःबाय्इली। 25 ओउःत झ्यान्ते इ कुरा पेतो स्यान्साकायः ङीइ इहाङः हुम्ती वाङ्ओ मुओलम्कःहाङः नीस्चाक् छ्युङ्ह्ती इनीस्लेः पावुल् बर्नाबास् त तोओ ङीकोः नीस् पुःचाःकुस् ल्हाक्नेःनाङ्स। 26 इ ल्होक्ओ नीस् पुःचाःपाय् र्याङःमामाःत रैमामाःत ङीकोः प्रभु येसु ख्रीस्कोः काम् जाङ्ह्ती बेला बेलाहाङः सीखेःआकाच। 27 ओउःनीस्कुस् यात्चाक् यहुदा त तोओमा यात्चाक् सीलास् त तोओमा ओउःनीस् नीङ्कायः लयः लेइ तोती स्यान्साकायः ल्होक्ओलेः मुनाःच। 28-29 लौ परमेस्वर्कोः ग्वालामःइ ङीकायः स्यान्ओ कुरा इलेःआः। नीङ्इ द्यव्ताकायः बयःओ जेःगामा वयःलम्मा वयः त्युत्आक्मालो मायःलम्मा जेःतेःचानी। फेरी ल्हास्या काम् जुगाङ् जाङ्ह्माःत मुन। इ कुरा ह नीङ्इ पेतो जाङ्ह्नु अरु हुकुम् ङीइ बयःनाङ्सल। लौ इच्युक्लेः लेखती ल्होक्नेःनाङ्स” त दाय्ह्ती ओउः यरुसालेम्हाङः हुम्ओ मान्तालम्इ लेखती ल्होक्आकानी। 30 ओहाङःसैको यरुसालेम्कोः मान्तालम्कुस् दाम्काय्आक्तीको ओउः चार्जन पावुल् बर्नाबास् सीलास् यहुदा त तोओलम् अन्तीयोक् सहर्ताङ् आल्आकाय्। अन्तीयोक् सहर्ताङ् दाह्ती वाङ्आक्तीको ओउः चार्जनइ ओहाङःकोः ङ्हाम्ओलम्कायः हुम्ताक्ती ओउःमयःकायः ओउः यरुसालेम्सै ल्होक्ओ चेती दाक्ती ल्हाआथास। 31 ओउः चेतीकोः कुरा पह्रती खाय्आक्तीको अन्तीयोक्कोः मान्तालम् “इ पेओ कुरा रैस” त दाय्ह्ती चोङाय्ती मुआकाय्। 32 ओहाङःसैको यहुदामा सीलास्इमा परमेस्वर्कोः कुरा छ्यानःओ मान्तालम् खेःइतो ओउःनीस्इ अन्तीयोक्कोः ङ्हाम्ओलम्कायः लव्ह्ती तोती स्यान्आथास। 33-34 ओहाङः बल नाःतो दीन्कायः स्यान्ती मुआक्तीको येसुकायः ङ्हाम्ओ मान्ताकःसै वेङ्ती पेतो दाम्काय्ती यहुदा सीलास् नीस् साथीचाः यरुसालेम्ताङ् पाय्ह्आकाय्। 35 ओउःनीस्खे पाय्ह्ताङःआकाय् पावुल् बर्नाबास्खेइ अन्तीयोक् सहर्हाङः अरु मान्तालम्कुस्इ प्रभु येसुकोः पेओ कुरा तोती स्यान्ती मुआकाच। 36 ओहाङः स्यान्ती मुदा मुदा ओहाङःसैको “लौ द्याह्पाय् नीची येसुकोः कुरा ङ्हा तोलाङ् आल्ओ सहर् सहर्लम्ताङ् द्यान्ह्ती ओहाङःकोः तोहा स्याव्ओ येसुकोः कुरा ङ्हाम्ओलम् फेरी क्रुस्लाङ् आल्च। ओउःमयःपाय् ‘गत स्याव्नै’ त योचु” त दाय्ह्ती पावुल्इ बर्नाबास्कायः तोआकान्। 37 ओउःत तोओपाय् बर्नाबास्खे आल्सापाय् ग्यासा ग्यातो ओउःकोः लयःकोः भनीस् मर्कस् त तोओमा लात्ती आलःसा बोङःआकान्। 38 पावुल्खे मर्कस् लात्ती आलःसा ग्याल दोह् हायःती दाय्ह्सा ओउः ङ्हा वाह्ती आल्तोक् बेलाहाङः मर्कस् ल्हाक् बादीङ्हाङःसै आल्सा ग्यामाःत झ्यान्ते पाम्फील्या सहर्हाङः वेङ्ती पाय्ह्आ ओउःत झ्यान्ते इ द्यान्ह्ती आल्तोक् बेलाहाङः पावुल्खे मर्कस्कायः लात्ती आलःसा ग्याल। 39 ओहाङःसैको इ कुरा पावुल् बर्नाबास्पाय् नोःकाय्ती होम्काय्ती जुगाङ् म्र्याःसा खाय्चुलु ओउःत झ्यान्ते ओउःनीस् वेङ्काय्आकाच। बर्नाबास्खे मर्कस् लात्ती तीःजहास्हाङः लन्ह्ती क्युप्रस् त तोओ बुम्ताङ् आल्आकाच। 40 पावुल्खेइ ओउःकुस् वाह्ती मुसा साथीकायः सीलास् त तोओ छ्युङ्ह्ती थे ल्याम्हाङः आलःआकान्। ओउःनीस् आल्सा चीङ्ओ बेलाहाङः “लौ नीङ्जीकायः परमेस्वर्कोः ग्वम् बयःतेःपाःज” त दाय्ह्ती अरु अन्तीयोक्कोः ङ्हाम्ओलम्इ पावुल् सीलास्नीस्कायः दाम्ती ल्होक्आथाच। 41 ल्होक्आक्तीको ओउःनीस् सीरीया जील्लाहाङःमा सीलीसीया जील्लाहाङःमा तोमःती वाह्ती ओहाङःकोः येसुकायः ङ्हाम्ओलम्कायः लव्ह्ती तोआकाचु। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.