२ तीमोथी 1 - चेपाङ1-2 लौ ङाकोः आन राप्ओ चोः तीमोथीय इ चेती ङा पावुल्इ लेखती ल्होक्नेःनाङ्। ङाकायःपाय् परमेस्वर्इ लयः झाक्ती छ्युङ्ह्ती झ्यान्ते “लौ येसु ख्रीस्कुस् ब्राङ्ती मुओलम्पाय् रौ जीङः दोःनाःतय्ही” त तोती गम्ओ कुरापाय् थोल्ह्ती तोसाकायः ओउःइ ल्होक्आताङः। ङीकोः परमेस्वर् आपामा ङीकोः प्रभु येसुइमा नाङ्कायः काङ्तीलेः योनःती योती ल्हुङ् धोमाय्ताक्तेःपाः। 3 ङाकोः आय्कानः तोकानःलो लेखालेः परमेस्वर्कायः चीःओ नीङ्ओ ल्हुङ्इ ओउःकोः काम् जाङ्ह्लेःनाङः। ओउःत हायःतोक्हाङः नाङ्कोः कुरा गीलती ङाइ आन “च्युता” त दाय्ह्ती न्हीदीङ् याह्दीङ्मा गलकायःमा तेती तोझुङ्नाङः। 4 ओउःत तेती तोतोक्हाङः नीची वेङ्काय्सा बोङःओ बेलाहाङः नाङ् र्याःओपाय् गीलती नाङ्कायः फेरी योसा आन झाह्लेःनाङः। नाङ्कुस् क्रुस्सा दोःनाङः त खेःया ङापाय् जुगाङ् चोङाय्तो स्याव्नाङः। 5 फेरी नाङ्इ दोङ् पेओ ङ्हाम्ओ त झ्यान्ते नाङ्कायः गलकायःमा गीलनेःनाङ्। नाङ्कोः बज्यय् लोइस् त तोओमा नाङ्कोः आमा युनीस् त तोओमा ओउःनीस्इ दोङ् पेतोलेः ङ्हाम्आकाचु नाङ्इमा ओउःतलेः पेतो ङ्हाम्तेःनौ त म्हर्नाङः। 6 ओउःत खेःओ ओउः परमेस्वर्इ बयःओ ग्वम्लेः सबै काम् जाङ्ह्साकायः गम्उ दा। ओउः ग्वम्पाय् ङाइ नाङ्कःहाङः क्रुत् झाम्ह्ओ बेलाहाङः दोःतेःआ। 7 परमेस्वर्कोः ग्वालामःइ बयःओ ल्हुङ्पाय् रैओ ल्हुङ्खे खेःबाय्ल ओउःइ ग्वम् नाःओ राप्ओ खह्र्मालो ल्हुङ्खे बयःमातय्ही। 8 ओउःत झ्यान्ते ङीकोः प्रभुकोः कुरा तोसाकायः रैतेःचाः। ओउःकोः काम् जाङ्ह्ओकायःलेः ङा झ्याल्खानहाङः मुओ मुनाङः। ओउःत चीःती रैमामाःत परमेस्वर्कोः पेओ समचार् तोती ङाकुस्इ लीह्सीःओ गोरःसा ग्याअ दा। ओउःत हायःसाकायःलेः परमेस्वर्इ लयःकोः ग्वम् बयःआतय्ही। 9 ओउःइ ङीकायः दल्ताक्ती लयःकोः मान्तालम् स्याव्साकायः गोत्आतय्ही। ङीपाय् ङीकोः लयः जाङ्ह्ओ काम्कायः छीङ्ह्ओ खेःतय्हीली परमेस्वर्इ ल्हाव्ह्दैबाङ् जाङ्ह्ओकोः ङ्हाहाङःसैलेः ङीकायः योनःती लयः झाक्ती येसु ख्रीस्इ दल्ताक्साकायः छीङ्ह्आतय्ही। 10 द्याह् येसु ख्रीस्इपाय् ल्हाव्ह्दैबाङ्हाङः थाती वाङ्आक्तीको ह ओउःकोः योनःती जाङ्ह्ओ काम् सबै च्यवःसा खाय्नाःतय्ही। मान्ताकायः सीती ह्र्योक्ती वाय्सा खेःओ ग्वम्कायः ओउःइलेः ल्हेस्ती वाय्आकान्। फेरी ङीइपाय् ओउःकोः पेओ समचार् सायःधार्नालेः ओउः गलमा द्योक्मालो रौ जीङःकोः कुरापाय् सबैकायः छ्यानःओ लेःआः। 11 ओउः पेओ समचार् थोल्ह्ती तोसाकायःमा स्यान्साकायःमा परमेस्वर्इ ङाकायः छ्युङ्ह्ती ल्होक्आताङः। 12 ओउःत हायःती झ्यान्ते ङा द्याह् लीह्सीःओ गोरःतीलेः मुनाङः। लीह्सीःओ गोरःसापाय् गोरःलेःङोतो बुरु ङा ल्हुङ् घ्युम्तो स्याव्ङल दोह् हायःती दाय्ह्सा ङाइ ङ्हाम्ओचाक्पाय् “सुलो” त ङाइ पेतोलेः तय्ह्नाङः। दोह् दोह् ङाइ ओउःकुस् गम्आलाङः ओउःलेः ओउः लोनेः वाङ्नम् दीन्च्युक्कायः ओउःइ लयःकुस् पेतोलेः ओम्पायःती गम्बत्नाःताङः ओउःत ङाइ पेतो चीःती र्याङःमामाःत मुनाङः। 13 लौ ङाइ नाङ्कायः स्यान्ओ दोङ् कुरापाय् ल्हुङ्हाङः सेती गम्उ दा। ओहाङःसैको ओउः स्यान्राय् चीःती येसु ख्रीस्इ बयःओ ङ्हाम्ओ ल्हुङ्मा राप्ओ ल्हुङ्मा दोःती पेतो वाह्अ दा। 14 ओउः नाङ्कुस् गम्ओ पेओ कुरापाय् ङीकुस् गम्ओ परमेस्वर्कोः ग्वालामःकुस्इ ल्हुङ्हाङः पेतो सेती गम्उ। 15 फाय्गेलस्मा हेर्मोगेनस्मा सबै असीया जील्लाहाङः मुओलम्इमा ङाकायः फेआताङः। एत नाङ्इ चीःतेःनौ। 16-18 ओउःमयःखेइ फेताङःतो ओनेसीफोरस्खेइ ङाकःताङ् आन वाङ्ती झ्यान्ते ङाकायः आन ल्हुङ् धोमाय्ताक्आताङः। रोम् सहर्ताङ् दाह्ती वाङ्तोक्हाङः ङा झ्याल्खानहाङः मुओहाङः ओउःइ दोह्मा रैमाःत ङाकायः साक्साक्त बोङःती लोने क्रुस्आताङः। ओउःत झ्यान्ते ओउः लोनेः वाङ्सा खेःओ दीन्हाङः ओउःकायःमा ओउःकोः कीम्कोः मान्तालम्कायःमा प्रभुइ योनःती योपाःथास। ओउःतलेः प्रभुपाय् योनःती योसाकायः झाक्चाक्पाः ती। ङा एफेसस्हाङः मुओ बेलाहाङः ओउःइ ङाकायः आन लव्ह्आताङः ओउःतमा नाङ्इ चीःनौ। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.