प्रकाशित वाक्य 9 - चम्बयाली नौआ नियम

पंजमी तुरही

¹ अते जां पंजमे स्वर्गदूत ने तुरही बजाई, तां मैं आसमान का धरती पर तारा पैंदा दिख्खेया, अते तिसजो पताल री चाब्बी दित्ती गे री थी, जिसेरा कोई अंत नी है।

² तिसने पताल जो खोलेया, अते कुंण्ड बिच का भट्टी सांई धुआं निकलेया, अते कुंण्ड रे धुएं कने सूरज अते हवा न्याहरी होई गई।

³ अते तिस धुएं बिच का धरती पर टिड्डियां निकली, अते तिन्हा जो धरती रे बिच्छु सांई लोक्कां जो कटणे री ताकत दित्ती गे री थी।

^4-5 ते जिय्यां कुसकी भी मणू जो बिच्छु रे कटणे कने पीड़ हुंदी, इन्हा टिड्डेयां जो तिन्हा लोक्कां जो जिन्हा रे मत्थे पर परमेश्वर री मौहर नी लग्गे री थी, तैसी ही पीड़ दैणे रा हक दित्तेया गेया थिया। पर तिन्हा जो कुसकी, बूट्टे, पौधे या घा जो नुक्सान दैणे रा हक नी मिल्ले रा थिया।

⁶ तिन्हा दिनां बिच लोक्कां ने मरणे रे तरिक्के तोपणे, पर तिन्हा ने मरी नी सकणा। तिन्हा ने मरणा ता चाह्‍णा, पर मरी नी पाणा।

⁷ से टिड्डियां लड़ाई करणे तांइ तैयार कित्ते रे घोड़े जैसी थियां, अते तिन्हेरे सरां पर मन्नो सुन्ने रे मुकुट थिये, ते तिन्हेरे मुँह मणूआं सांई थिये।

⁸ ते तिन्हेरे बाल जनानियां सांई ते दांद्द शेर सांई थिये।

⁹ तिन्हा ने अपणी छात्ती पर लोहे रा कवच पाए रा होणा। जां से उड़ेया करदे थिये, तां तिन्हा ने इदेइ अवाज कित्ती जदेई मते सारे घोड़ेयां वाले रथ लड़ाई तांइ निकलदे।

¹⁰ तिन्हेरी चूमट बिच्छुआं सांई थी। तिन्हेरी चूमट पर डंक होणे री वजह कने से पांज्ज महिन्ने तिकर लोक्कां जो पीड़ां देई सकदे थिये।

¹¹ तिन्हा जो अपणे काबू बिच चलाणे वाला इक्क राज्जा है। ओ शैतान रा से दूत है जे पताल जो खोलदा। इब्रानी भाषा बिच तिसेरा नां अबद्दोन है, ते यूनानी भाषा बिच तिसेरा नां अपुल्लयोन है, जिसेरा मतलब है, “तबाह करणे वाला।”

¹² पैल्ली मुसीबत बीत्ती गई, दिख्खो अवे इन्हेरे बाद दो मुसीबत होर होणे वाली हिन।

छठमी तुरही

¹³ इसका बाद छठमे स्वर्गदूत ने अपणी तुरही बजाई। जां तिनिये अपणी तुरही बजाई तां मैं सोन्ने री वेदी रे चारो कुणे का अवाज सुणी कि परमेश्वर रे सामणे धूप बाली जाए।

¹⁴ ते तिस अवाज ने तिस छठमे स्वर्गदूत जो, जिस का से तुरही थी, ए बोल्लेया कि तिन्हा चार दूत जो खोल्ली दे जे बड्डी नदी फरात रे कन्ने बन्ने रे हिन।

¹⁵ इधेरे तांइ शैतान रे से चार दूत कठिये। से पैल्ले का ही तैयार थिये ते तिन्हा जो इस बेल्ले, दिन, महिन्ने ते साल रा इंतजार करणे तांइ बोल्लेया गेया थिया, ते अवे से समय आई गे रा थिया। तिन्हा ने मणूआं रा इक्क-तिहाई हिस्सा मारी रखणा।

¹⁶ तिन्हा ने कठ्ठी करी इक्क बड़ी बड्डी घुड़सवार मणूआं री फौज कठेरी, जिन्हेरी गिनती बीह् करोड़ थी।

¹⁷ मेरे जो इस दर्शन बिच घोड़े अते तिन्हेरे इदेय सवार दिस्से, जिन्हेरी झिलमे आग्ग, अते धुम्रकान्त, ते गन्धक सांई थी, अते तिन्हा घोड़ेयां रे सिर शेर रे सिरां सांई थिये, अते तिन्हेरे मुँहा का आग्ग, अते धुआं ते गन्धक निकलदा थिया।

¹⁸ इन्हा तिन्नो महामरियां, मतलब आग्ग, धुआं अते गन्धक जे तिन्हेरे मुँह का निकलदी थी, मणूआं री इक्क तिहाई मारी दित्ती गई

¹⁹ किजोकी उन्हा घोड़ेयां री ताकत तिन्हेरे मुँह, अते तिन्हेरी चूमटां बिच थी, इधेरे तांइ तिन्हेरी चूमटां कीड़ेयां सांई थी, अते तिन्हा चूमटां रे सिर भी थिये, अते इन्हा कने ही से पीड़ां दिंदे थिये।

²⁰ बाकि मणूआं ने जे उन्हा बिमारियां कने नी मरे थिये, अपणे हत्थां रे कम्मां का तौबा नी कित्ती, कि दुष्टात्मा, अते सुन्ने चाँदी अते पीतल, अते पत्थरां, ते काठ री मूर्तां री पूजा ना करण, जे ना दिख्खी, ना सूणी, ना चली सकदी हिन।

²¹ ते जे खून, टोणा, व्यभिचार, चोरियां, उन्हा ने कित्ती थी, तिन्हा का तौबा नी कित्ती।