प्रकाशित वाक्य 8 - चम्बयाली नौआ नियमसत्त तुरहियां सतमी मौहर ते सोन्ने रा धूपदान 1 जां “उरणू” ने सतमी मौहर खोली, तां स्वर्ग बिच अद्दे घंटे तांइ सन्नाटा छाई गेया। 2 ते मैं सत्तां स्वर्गदूतां जो जे परमेश्वर रे मुहागर रेह्न्दे हिन, दिख्खेया, ते तिन्हा जो सत्त तुरहियां दित्ती गई। 3 तित्ते का इक्क होर स्वर्गदूत आया ते से वेदी रे सामणे खड़ी गेया। तिस स्वर्गदूत रे हत्थ बिच धूप जलाणे तांइ इक्क सोन्ने रा डोंगा थिया। तिसजो लोक्कां री प्रार्थना कने फुकणे तांइ होर भी धूप दित्तेया गेया। तिनिये तिन्हा प्रार्थनां जो धूप कने तिस वेदी रे अग्गे फुक्केया जे परमेश्वर रे सिंहासन रे सामणे थिया। 4 जां तिनिये इय्यां कित्ता, तां तिस धूप रा धुआं, स्वर्गदूतां रे हत्थों परमेश्वर रे लोक्कां री प्रार्थनां कने उप्पर पास्से तिन्हेरे सामणे गेया 5 ते स्वर्गदूत ने धूपदान लेई करी तिस बिच वेदी रे भखदे कोले भरे, ते धरती बिच पाई दित्ते, ते बिजली चमकणा लग्गी ते गर्जनां होई। सत्त तुरहियां 6 तां से सत्तों स्वर्गदूत जिन्हेरे का से सत्त तुरहियां थी, फूंकणे तांइ तैयार होई गे। 7 पैल्ले स्वर्गदूत ने तुरही बजाई, ते खून कने मिल्ले रे औले ते आग्ग धरती पर पे। ते इसेरा नतीज्जा ए होया कि धरती रा इक्क तिहाई फुक्की गेया, ते सब हरा घा भी फुक्की गेया। 8 ते दूज्जे स्वर्गदूत ने तुरही बजाई, ते कोई बड्डे फुकिंदे पहाड़ जदेई दिसणे वाली चीज समुंद्र बिच पेई गयी। इसेरे नतीज्जे रे तौर पर समुंद्र रा इक्क तिहाई हिस्सा खून बणी गेया 9 ते समुंद्र बिच रैह्णे वाले इक्क तिहाई जानवरां री जान चली गयी, ते इसेरी वजह कने समुंद्र रे इक्क तिहाई जहाज भी बर्बाद होई गे। 10 ते तिज्जे स्वर्गदूत ने तुरही बजाई, ते इक्क बड्डा तारा जे मशाल सांई बलेया करदा थिया, स्वर्ग का टूट्टेया, इसेरे नतीज्जे रे तौर पर नदियां रे इक्क तिहाई हिस्से पर, ते पाणी रे स्त्रोतां पर आई पेया। 11 तिस तारे रा नां नागदौना है। इसेरे नतीज्जे रे तौर पर जित्ते से तारा पेया थिया, तित्ते रा सारा पाणी कौड़ा होई गेया, ते पाणी रे कोड़े होई जाणे री वजह कने तित्ते मते मणू मरी गे। 12 ते चौथे स्वर्गदूत ने तुरही फुक्की, अते सूरज रा इक्क तिहाई, चाँद तिहाई ते तारेयां रे इक्क तिहाई हिस्से कने किच्छ बड़े जोरे टकराया ते तिन्हेरा बड़ा जादा नुक्सान होया, इसेरे नतीज्जे रे तौर पर सूरज दिन रे इक्क-तिहाई समय तिकर नी चमकेया, ते चाँद ते तारे रात्ती रे इक्क-तिहाई समय तिकर नी चमके। 13 अते मैं आसमान बिच इक्क उकाब जो उड़दे होए दिख्खेया, ते जोरे कने ए बोलदे होए सूणेया, कि जां तिन्हा त्रै स्वर्गदूतां ने अपणी तुरहियां बजाणी, तां दुनिया बिच रैह्णे वाले लोक्कां पर बड़ी वरी मुसीबतां आणी, जे तुरहियां तिन्हा जो दित्ती गे री हिन, से बड़ी जादा ड्रौणी हिन। ते तिसेरी वजह कने धरती रे लोक्कां पर हाय, हाय, हाय। |
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.