प्रकाशित वाक्य 6 - चम्बयाली नौआ नियम

सत्त मौहरां रा खोल्लेया जाणा

¹ जां मैं दिख्खेया कि “उरणू” ने उन्हा सत्त मौहरां बिच का इक्क जो खोल्लेया, तां मैं उन्हा चार प्राणियां बिच का इक्क जो बद्दल री गर्जन जदेई अवाज बिच ए बोलदे सूणेया, जा!

² मैं दिख्खेया कि मेरे सामणे इक्क चिट्टा घोड़ा थिया ते घोड़े रे सवार ने तीर-कमाण लित्ते रा थिया तिसजो जीत रा मुकुट दित्तेया गेया अते से स्वर्ग का इय्यां निकलेया जिय्यां तिनिये पैल्ले का ही जीत हासिल करी लित्ते री है, ते अवे फिरी जितणे वाला है।

³ जां तिस “उरणू” ने दूज्जी मौहर खोल्ली तां मैं दूज्जे प्राणी जो ए बोलदे सूणेया, जा!

⁴ ते फिरी इक्क लाल घोड़ा तिस जगाह् का निकलेया जित्ते से सिंहासन थिया। परमेश्वर रे तिस घोड़े रे सवार जो धरती पर रैह्णे वाले लोक्कां बिच लड़ाई कराणे री ताकत दित्ते री थी, ताकि से मणू इक्क-दूए जो लड़ाईयां बिच मारी रखण। इस मकसद तांइ परमेश्वर ने तिस घोड़े रे सवार जो इक्क बड्डी तलवार भी दित्ते री थी।

⁵ अते जां “उरणू” ने तिज्जी मौहर खोली, तां मैं तिज्जे प्राणी जो ए बोलदे सूणेया, जा! अते मैं इक्क काले घोड़े जो निकलदे दिख्खेया ते तिसेरे सवार रे हत्थे इक्क तरकड़ी थी।

⁶ अते मैं तिन्हा चारो प्राणी रे बिच का मन्नो इक्क अवाज जो ए बोलदे सूणेया, “इक्क धियाड़ी री मजूरी रे इक्क किल्लो कणक, ते दीनार रा इक्क किल्लो जौ, पर तेल, अगूंर रे रस्स जो नुक्सान मत पूजांदे।”

⁷ अते जां उरणू ने चौथी मौहर खोली तां मैं चौथे प्राणी जो ए बोलदे सूणेया, जा

⁸ अते मैं दिख्खेया कि इक्क हल्के पिले रांग रा घोड़ा दिख्खेया, अते तिसेरे सवार रा नां मौत थिया, अते पताल तिसेरे पीच्छे-पीच्छे चलेया करदा थिया तिन्हा जो धरती पर रैह्णे वाले लोक्कां रे इक्क-चौथाई गिनती जो मारी रखणे रा हक मिल्ले रा थिया। तिन्हा ने लोक्कां जो तलवारां कने मारेया, तिन्हा ने लोक्कां जो भुखमरी कने मारी रख्खेया, तिन्हा ने बुरी-बुरी बिमारियां कने तिन्हा जो मारेया, तिन्हा ने जंगली जानवरा रे जरिये तिन्हा जो मारेया।

⁹ अते जां “उरणू” ने पंजवी मौहर खोली, मैं तिस वेदी रे थल्ले तिन्हा लोक्कां री आत्मां दिख्खी जिन्हा जो इधेरे तांइ मारी दित्तेया गेया थिया किजोकी से परमेश्वर रे वचन तांइ ते तिस बसेख तांइ भरोस्सेमंद बणी करी रे थिये जिस जो तिन्हा ने मन्नेया थिया।

¹⁰ से जोरे सणे हक्क देई करी बोल्लेया करदे थिये, ओ पवित्र अते सच्चे प्रभु, तुसा किजो धरती पर रैह्णे वाले पाप्पी लोक्कां जो सजा दैणे बिच इन्ना इंतजार करेया करदे हिन? असी छंदे करदे कि तुसा तिन्हा लोक्कां रे बर्ताव तांइ बदला लेयो जिन्हा ने असा रा खून करी रख्खेया।

¹¹ तां तिन्हा बिच का हर इक्क जणे जो चिट्टे कपड़े दित्ते गे ते तिन्हा जो थोड़ी देर होर इंतजार करणे तांइ बोल्लेया गेया। मसीह री सेवा बिच तिन्हेरे होर भी संगी सेवादार हल्ले भी थिये जिन्हेरा मारेयां जाणा जरुरी थिया। तिन्हा जो ता तांइ करणा जरुरी थिया, जां तांइ ए सब किच्‍छ पूरे तरिक्के कने मुकी नी जाए।

¹² तां मैं दिख्खेया कि तिस “उरणू” ने छठमी मौहर खोल्ली दित्ती, ते तित्ते बड़ा बड्डा भुकम्प होया। सूरज बिल्कुल घणे काले कम्बल सांई काला होई गेया, ते चाँद रा रांग खून सांई लाल होई गेया।

¹³ तारे आसमान का धरती पर इय्यां पेई गे कि जिय्यां कच्चे फल्ल बड़ी तेज हवा चलणे री वजह कने अंजीर रे बूट्टे का छुड़की पैंदे।

¹⁴ आसमान इय्यां गायब होई गेया जिय्यां कुसकी कागज जो मोड़ी दित्ते रा हो ते सारे पहाड़ ते टाप्पु अपणी जगाह् का हटी गे।

¹⁵ इसेरे नतीज्जे रे तौर पर धरती रे सारे लोक्कां जो ते राज्जेयां जो, प्रधान, सेनापती, अमीर मणू, ताकतवर मणू, हर इक्क दास, ते हर इक्क अजाद मणू, पहाड़ा री खो बिच, ते फाट्टियां पर लुकी गे।

¹⁶ ते पहाड़ां अते फाट्टियां जो बोलणा लगे, असा पर आई पेयो, अते असा जो तिन्हेरी नजर का जे सिंहासन पर बैठ्ठे रे हिन, अते “उरणू” रे गुस्से का लुकाई लेयो।

¹⁷ किजोकी से दिन आई गे रा है जां परमेश्वर ते “उरणू” ने सारे मणूआं जो तिन्हेरे पाप्पां तांइ सजा दैणी, ते कुसकी ने भी इस सजा जो सही नी सकणा।