प्रकाशित वाक्य 4 - चम्बयाली नौआ नियम

स्वर्ग बिच अराधना रा इक्क दर्सन स्वर्ग बिच अराधना

¹ इन्हा गल्लां का बाद मैं दिख्खेया की, स्वर्ग रा दुआर खुल्ले रा थिया ते तित्ते कोई थिया जे मेरे कने गल्ल करेया करदा थिया, ते ए से ही जिस जो मैं पैल्ले भी सूणेया थिया, ते जिसेरी अवाज तुरही सांई सुणिंदी थी। तिनिये मेरे जो बोल्लेया, इत्ते उप्पर आई जा, मैं तिज्जो से दिखाणा जिसेरा आणे वाले बेल्ले बिच होणा पक्का है।

² ते फिरी मैं झट्ट ही पवित्रात्मा रे काबू बिच आई गेया, ते मैं स्वर्ग बिच इक्क सिहांसन दिख्खेया, ते तिस सिहांसन पर कोई बैठ्ठे रा थिया।

³ जे सिहांसन पर बैठ्ठे रा थिया से दिखणे बिच यशब ते माणिक्य रे कीमती मणियां सांई थिया। तिस सिहांसन रे चारो पास्से इक्क मेघ-धनुष थिया, ते से दिखणे बिच मरकत मणी सांई थिया।

⁴ तिस सिंहासन रे चौं पास्से होर चौबी सिंहासन थिये जिन्हा पर चौबी बुजुर्ग मणू बैठ्ठे रे थिये तिन्हा ने चिट्टा कपड़ा ते अपणे सिर पर सोन्ने रा मुकुट पाए रा थिया।

⁵ तिस सिंहासन बिच का बिजली चमकेया करदी थी ते बड़ी गर्जनां निकलेया करदी थी, अते सिंहासन रे सामणे आग्ग री सत्त मशाल्लां बलेया करदी थीे, ए परमेश्वर री सत्त आत्‍मा हिन।

⁶ तिस सिहांसन रे सामणे सीसा सांई इक्क साफ ते समुंद्र जिन्ना चौड़ा मैदान थिया, से सिंहासन तिस जगाह् रे बिल्कुल बिच मझाटे थिया ते मैं तिसेरे चारो पास्से चार जींद्दे प्राणियां जो दिख्खेया।

⁷ तिन्हा चार जींद्दे प्राणियां बिच का पैल्ला प्राणी शेर सांई थिया, अते दुज्जा जींद्दा प्राणी दांद सांई थिया, तिज्जा जींद्दा प्राणी मणू सांई थिया, अते चौथे जींद्दे प्राणी रा मुँह उड़दे इल्लण सांई थिया।

⁸ इन्हा चारो जींद्दे प्राणियां रे छे-छे पंख्ख थिये, तिन्हेरे चौं पास्से, ते अन्दर भी हाख्खियां ही हाख्खियां थी, ते रात-दिन बगैर अराम कित्ते रे ए बोलदे रैह्‍न्दे थिये, कि सबका जादा ताकतवर परमेश्वर पवित्र, पवित्र, पवित्र है।

^9-10 सारे जींद्दे प्राणी तिन्हा जो महिमा, आदरमान, ते धन्यवाद देया करदे थिये जे सिहांसन पर बैठ्ठे रे हिन। से हमेसा-हमेसा तांइ जिन्दे हिन। ते जां भी से इय्यां करदे थिये, तां चौब्बी बुजुर्ग मणू परमेश्वर रे सामणे पेई करी तिन्हेरी अराधना करदे थिये। से ए बोल्ली करी तिन्हेरे सामणे अपणे मुकुट उतारी करी बोलदे,

¹¹ ओ असा रे परमेश्वर, “तुसी अराधना रे काबिल हिन। तुसा आदरमान रे काबिल हिन। तुसा ताकतवर हिन किजोकी तुसा ने सब किच्‍छ बणाया। ए तुसा री मर्जी थी इधेरे तांइ तुसा ने से सब किच्‍छ बणाया ते तिन्हेरे अवे वजूद है।”