मरकुस 7 - चम्बयाली नौआ नियम

परम्परा पर चलणे पर सवाल

¹ इक्क दिन किच्‍छ फरीसी ते शास्त्रि मणू यरुशलेम सहर का आई करी यीशु रे नेड़े कठ्ठी गे।

² ते तिन्हा फरीसी ते शास्त्रि लोक्कां ने यीशु रे किच्‍छ चेल्‍लेयां जो बगैर हत्थ धोत्ते रे रोट्टी खांदे दिख्खेया।

³ यहूदी लोक, खासतौर पर फरीसी मणू अपणे बुजुर्गां री परम्परा रे हिसाब कने कदी भी बगैर हत्थ धोत्ते रे रोट्टी नी खांदे थिये।

⁴ तिय्यां ही, फरीसी बजार का कोई चीज अणी करी बगैर हत्थ धोत्ते रे नी खांदे थिये। ए तिन्हेरी परम्परा रा हिस्सा थिया जिस बिच से प्याल्ले, सुराही ते केतली जदेय भान्डेयां जो धोंदे थिये।

⁵ इधेरे तांइ उन्हा फरीसियां अते शास्त्रियां लोक्कां ने यीशु का पूच्छेया, “तेरे चेल्‍ले किजो बुजुर्गां री परम्परा पर नी चलदे? तेरे चेल्‍ले बगैर हत्थ धोत्ते रे ही रोट्टी खाई लिन्दे।”

⁶ यीशु ने फरीसी ते शास्त्रि लोक्कां जो जवाब दित्तेया, “यशायाह ने जे तुसा जो जे ढोंगी बोल्लेया से ठीक ही बोल्ले रा है, जिय्यां कि लिख्खे रा है, ‘ए मणू गल्लां कने तां मेरी बड़ाई करदे, पर इन्हा लोक्कां रे मन मेरे का दुर हिन।

⁷ इन्हा लोक्कां री भक्ति सिर्फ ढोंग है, किजोकी ए मणूआं री गल्लां जो परमेश्वर रे हुकम बोल्ली करी सखांदे।’

⁸ तुसा परमेश्वर रे हुकमां जो नजर अंदाज़ करी करी के अपणी ही परम्परा कने बदली दिंदे।”

⁹ फिरी यीशु ने बोल्लेया, “तुसी अपणी परम्परा जो पकड़े रखणे तांइ बड़ी सफाई कने परमेश्वर रे नियमां जो टाली दित्तेया।

¹⁰ उदारण रे तौर पर, मूसा ने तुसा लोक्कां जो परमेश्वर रा ए हुकम दित्तेया, अपणे मां-प्यो री इज्जत करो, ते जे कोई अपणे मां-प्यो री इज्जत ना करे तिस मणू जो मौत री सजा दित्ती जाए।

¹¹ पर तुसा लोक्कां जो ए सखांदे कि अपणे मां-प्यो जो ए बोलणा ठीक है कि मैं जे मैं तुसा जो दैणा थिया से मैं परमेश्वर जो अर्पित करणे री कसम खाए री है।

¹² इय्यां करणे कने तुसा लोक्कां जो हकीकत बिच अपणे मां-प्यो री अनादर करणा हिन सिखाया करदे।

¹³ इय्यां ही तुसा अपणी परम्परा जो बधाणे तांइ परमेश्वर रे वचन जो रद्द करी दिंदे ते ए तुसा री मती गल्लां बिच का इक्क उदारण है।”

मणू जो असुद्ध करणे वाली गल्लां

¹⁴ तां यीशु ने मणूआं जो अपणे का सद्देया अते बोल्लेया, “तुसां सब मेरी गल्लां जो सुणो, अते समझो।

¹⁵ इदेयी कोई चीज नी है जे मणू अंदर का जाई करी तिसजो भिठ्ठा करण, पर जे चीजां मणू रे मन का निकलदी, से ही तिसजो भिठ्ठा करदी।

¹⁶ जे सुनणा चाए, से ध्यान कने सुणे।”

¹⁷ जां यीशु भीड़ जो छड्डी करी घरे अंदर गेया तां तिन्हेरे चेल्‍लेयां ने इस उदारण रे बारे बिच यीशु का पूच्छेया।

¹⁸ यीशु ने अपणे चेल्‍लेयां जो बोल्लेया, “क्‍या तुसा भी इदेय नासमझ हिन? कै तुसा भी इसेरा मतलब नी समजदे कि जे चीजां बाहर का मणू रे अन्दर जान्दी, से तिसजो भिठ्ठा नी करी सकदी?

¹⁹ किजोकी से मन बिच नी, पर पेट बिच जान्दी, अते संडास बिच निकली जान्दी?” इस तरिक्के कने यीशु ने सारी खाणे वाली चीजां जो साफ ठैहराया।

²⁰ फिरी यीशु ने बोल्लेया, “जे मणूआं रे मन का निकलदा, से ही मणूआं जो भिठ्ठा करदा।

²¹ किजोकी मणू रे मन का, बुरी-बुरी गल्लां, व्यभिचार, चोरी, खून करणा,

²² व्यभिचार, लालच, बुराई करणा, धोखा, लुचपन, हिर्स, चुगली, घमंड, अते बेफकुफी।

²³ ए सब गल्लां मणू रे मन का ही निकलदी अते मणूआं जो भिठ्ठा करदी।”

सुरूफिनीकी जाति री जनानी रा विश्वास

²⁴ फिरी यीशु ते तिन्हेरे चेल्‍ले गलील प्रदेश का निकली करी सूर अते सैदा सहर रे नेड़े रे इक्क इलाक्के बिच आए ते इक्क घर बिच गे ते से चाह्‍ंदे थिये कि कुसकी जो तिन्हेरे तित्ते आणे रे बारे बिच पता ना लग्गे।

²⁵ अते झट ही इक्क जनानी जिसेरी हल्की कुड़ी बिच दुष्टात्मा थी, यीशु रे बारे बिच सुणी करी आई, ते तिन्हेरे पैरां पेई गई।

²⁶ से यूनानी जनानी सुरिया जिले रे फिनिके कस्बे री थी, तिनिये यीशु रे छन्दे कित्ते की से तिन्हेरी कुड़ी बिच का दुष्टात्मा जो कड्डी दैण।

²⁷ यीशु ने तिस जनानी रा विश्वास परखणे तांइ तिस जनानी जो बोल्लेया, “पैल्ले घर रे बच्चेयां जो रजणा दे, किजोकी बच्चेयां री रोट्टी लेई करी कूत्तेयां रे मुहाग्गर पाणा ठीक नी है।” (तिस जमाने बिच यहूदी मणू गैर-यहूदियां जो तुच्छ समजदे थिये)।

²⁸ तिस जनानी ने यीशु जो जवाब दित्तेया, “सच है प्रभु; फिरी भी कूत्ते भी तां मेज का छुड़के री बच्चेयां री रोट्टी री चुरा-चारा खाई लिन्दे।”

²⁹ यीशु ने तिस जनानी जो बोल्लेया, “इस गल्ल री बजाह् कने जा किजोकी दुष्टात्मा तेरी कुड़ी बिच का निकली गे री है।”

³⁰ तिस जनानी ने अपणे घरे जाई करी दिख्खेया कि कुड़ी मन्जे पर पेय री थी, अते दुष्टात्मा निकली गे री थी।

टौणे ते हकले मणूआं रा ठीक होणा

³¹ फिरी यीशु सूर अते सैदा रे सहर रे नेड़े वाले का निकली करी दिकापुलिस जिले का होई करी गलीली समुन्द्र जो पूज्जे।

³² तां मणू इक्क टौणे मणू जो जे खख्खा भी थिय्या, यीशु का लेई करी आये ते तिन्हेरे छन्दे कित्ते कि अपणा हत्थ तिस मणू पर रखण।

³³ यीशु से तिस मणू जो भीड़ का बखरे लेई गे, अते अपणी उंगलियां तिस मणू रे कन्नां बिच पाई, अते यीशु ने अपणी उंगल पर थूक्क लाई करी तिसेरी जिब्ब जो छुत्तेया।

³⁴ ते स्वर्ग रे पास्से दिख्खी करी साह् भरे, अते तिस मणू जो बोल्लेया, “इफ्त्तह” “मतलब खुली जा!”

³⁵ तिसेरे कान्न खुली गे ते ए साफ-साफ, अते तिसेरी जिब्ब री गन्ड भी खुली गई अते से साफ-साफ बोलणे लग्गेया।

³⁶ तां यीशु ने तिस मणू जो समजाया कि कुसकी जो भी इस बारे बिच मत बोलदा पर जिन्ना यीशु ने तिस मणू जो समजाया, तिसने तिन्ना ही जादा प्रचार कित्तेया।

³⁷ से बड़ा ही हैरान होई करी बोलणे लगेया, “यीशु ने जे किच्‍छ भी कित्तेया, से सब खरा ही कित्तेया, से टोणेयां जो सुनणे री, अते जल्लेयां जो बोलणे री ताकत दिन्दे।”