मरकुस 15 - चम्बयाली नौआ नियम

पिलातुस रे सामणे यीशु

¹ भ्याग हुन्दे ही झट-पट बड्डे पुरोत्तां, मन्दिर रे बुजुर्गां अते शास्त्रियां ने बल्कि सारी सभा ने सलाह करी करी यीशु जो बन्नी दित्तेया, अते तिन्हा जो लेई जाई करी पिलातुस हाकम रे हत्थां बिच देई दित्तेया।

² पिलातुस ने यीशु जो पूच्छेया, “क्‍या तू यहूदियां रा राज्जा है?” तिन्हा ने तिसजो जवाब दित्तेया, “तू अप्पु ही बोल्लेया करदा है।”

³ बड्डे पुरोत्त मणू यीशु पर मती गल्लां रे इल्जाम लाया करदे थिये,

⁴ ते पिलातुस ने तिन्हा का फिरी पूच्छेया, “क्‍या तू कोई जवाब नी दैणा, दिख्ख, ए मणू तेरे पर कितणी सारी गल्लां रा इल्जाम लाया करदे हिन?”

⁵ यीशु ने फिरी कोई जवाब नी दित्तेया, ते इस गल्ल पर पिलातुस जो बड़ी हैरानी होई।

यीशु जो मौत री सजा सुणाया जाणा

⁶ ए हाकमां रा रीवाज थिया कि फसह रे त्योहर रे बेल्ले से, लोक्कां तांइ तिन्हेरे बिनती करणे पर इक्क कैदी जो छड्डी दिंदे थिये, से तिसजो छड्डी दिंदा थिया।

⁷ तां बरअब्बा नां रा इक्क कैदी, जिनिये इक्क दंगे बिच कुसकी रा खून करी दित्ते रा थिया।

⁸ ते भीड़ पिलातुस हाकम का जाई करी तिसेरे छन्दे करणा लग्गी, असा तांइ इक्क कैदी जो छड्डी देयो जिय्यां तुसा हर फसह रे त्योहर पर छडदे।

⁹ पिलातुस ने तिन्हा लोक्कां जो पूच्छेया, “क्‍या तुसा चाह्‍ंदे कि मैं तुसा तांइ यहूदियां रे राज्जे जो छड्डी देयां?”

¹⁰ किजोकी पिलातुस जाणदा थिया कि बड्डे पुरोत्तां ने तिसजो इधेरे तांइ पकड़वाया थिया, किजोकी से यीशु का फूक्किन्दे थिये।

¹¹ पर बड्डे पुरोत्तां ने भीड़ रे लोक्कां जो उकसाया कि से पिलातुस पर बरअब्बा जो ही छडणे तांइ दवाब पाई दैण।

¹² ए सुणी करी पिलातुस ने तिन्हा का फिरी पूच्छेया, “तां जिस जो तुसा यहूदियां रा राज्जा बोलदे तिस कने मैं कै करां?”

¹³ से मणू फिरी लेरां मारी करी बोलणा लगे, “तिसजो सुली पर चढ़ाई दे।”

¹⁴ पिलातुस ने तिन्हा जो बोल्लेया, “किजो, इनिए कै बुरा कित्ते रा है?” पर से होर भी लेरां मारी करी बोलणा लगे, तिसजो सुली पर चढ़ाई दे।

¹⁵ तां पिलातुस ने मणूआं री भीड़ जो खुस करणे तांइ बरअब्बा जो तिन्हा तांइ छड्डी दित्तेया, ते यीशु जो कोड़े लगवाई करी सुली पर चढ़ाणे तांइ भेज्जी दित्तेया।

सपाईयां रा यीशु री बेजती करणा

¹⁶ सपाई यीशु जो किले रे अंगण अन्दर लेई गे, जिस जो मणू प्रीटोरियुम भी बोलदे, अते सारे सपाईयां जो सद्दी लेया।

¹⁷ तां तिन्हा सपाईयां ने यीशु रा मजाक उड़ाणे तांइ तिन्हा जो राज्जे सांई बैंगणी रांग रे कपड़े पुआये, ते कंडेया रे ताज जो मरोड़ी करी तिन्हेरे सरा पर रख्खी दित्तेया।

¹⁸ ते तिन्हा सपाईयां ने यीशु जो नमस्ते करी के, ते ए बोल्ली करी तान्ने मारणा लग्गे, “ओ यहूदियां रे राज्जे, प्रणाम!”

¹⁹ से यीशु रे सरा पर नलू कने मारणा लग्गे, तिन्हा पर थुकदे, ते गोड्डे रे भारे बेई करी तिन्हेरे जो प्रणाम करी के तिन्हेरा मजाक उड़ान्दे थिये।

²⁰ जां सपाई मणू यीशु रा मजाक उड़ाई बैठ्ठे, तां तिन्हेरे बैंगणी कपड़े खुलाई करी, तिन्हेरे जो तिन्हेरे अपणे कपड़े पुआई करी, सुली पर चढ़ाणे तांइ बाहर लेई गे।

यीशु रा सुली पर चढ़ाया जाणा

²¹ शमौन जे कुरेन सहर रा मणू थिया ते सिकन्दर ते रुफुस रा प्यो थिया, से यरुशलेम जो जाया करदा थिया; पर सपाईयां ने तिसजो जबरदस्ती पकड़ेया ताकि से यीशु री सुली चुक्की करी लेई चलो।

²² से यीशु जो गुलगुता नां रे पहाड़ पर लेई आए जिसेरा मतलब है, “खोपड़ी री जगाह्।”

²³ सपाईयां ने यीशु जो हरड मिलाये री अंगूर रा रस्स दित्तया लगे, पर तिन्हा ने नी पित्तेया।

²⁴ तां तिन्हा सपाईयां ने यीशु जो सुली पर चढ़ाया, ते तिन्हेरे कपड़ेयां पर चीठ्ठियां पाई करी अप्पु-मिते बंड्डी लित्तेया।

²⁵ सपाईयां ने यीशु जो भ्यागा नौ बजे सुली पर चढ़ाया थिया।

²⁶ अते इक्क दोष-पत्तर लिखी करी यीशु री सुली रे उप्पर टंगी दित्तेया गेया, जिस पर लिख्खे रा थिया, “यहूदियां रा राज्जा।”

²⁷ सपाईयां ने यीशु कने दो ड़ाकू, इक्क तिन्हेरे सज्जे अते दुज्जा तिन्हेरे खब्बे पास्से सुली पर चढ़ाई दित्ते।

²⁸ तां पवित्रशास्त्र री से गल्ल पूरी होई गई, “से पापियां रे बराबर गिणेया गेया।”

²⁹ जे कोई मणू तित्ते का टपदा थिया, से सर हिलाई-हिलाई करी ते ए बोल्ली-बोल्ली करी तिन्हेरी बेजती करदे थिये, “वाह्! मन्दिर जो ढ़ाणे वाले, अते त्रिये दिन फिरी बणाणे वाले!

³⁰ सुली का उतरी करी अप्पु जो बचाई लै।”

³¹ इय्यां ही बड्डे पुरोत्तां ते शास्त्रि मणू अप्पु-मिते यीशु रा मजाक उड़ाई करी बोलदे थिये, “इनिए होरनां जो बचाया, पर अप्पु जो नी बचाई सकदा।

³² इस्राएल रा राज्जा, मसीह, अवे सुली का उतरी आओ कि असी दिख्खी करी विश्वास करण।” अते जे तिन्हा कन्ने सुली पर चढ़ाये थिये, से भी तिन्हेरी बेजती करदे थिये।

यीशु रा मरणा

³³ धियाड़ी रे बारा बजे का लेई करी तीन्न बजे तिकर सारे जगाह् बिच न्याहरा होई गेया।

³⁴ ते धियाड़ी रे तीन्न बजे यीशु ने बड़े जोरे बोल्लेया, “इलोई, इलोई, लमा शबक्तनी?” जिसेरा मतलब ए है, “ओ मेरे परमेश्वर, से मेरे परमेश्वर, तैं मेरे जो किजो छड्डी दित्तेया?”

³⁵ जे नेड़े खड़ितेरे थिये, तिन्हा बिच का किच्‍छ लोक्कां ने ए सुणी करी बोल्लेया, “दिख्खो, ए एलिय्याह जो सद्देया करदा है।”

³⁶ अते इक्क जणे ने दौड़ी करी स्पंज जो सिरके अन्दर डोब्बी करी, अते नलू पर रख्खी करी यीशु जो चुसाया अते बोल्लेया, “रुकी जाओ, दिखदे कि एलिय्याह इसजो उतारणे तांइ आंदा कि नी।”

³⁷ तां तिस बेल्ले यीशु ने बड़े जोरे लेर मारी करी प्राण छड्डी दित्ते।

³⁸ मन्दिर रा परदा उपरा का झिक्का तांइ फटी करी दो हिस्से होई गेया।

³⁹ जे हाकम तिन्हेरे सामणे खड़े रा थिया जां तिस मणू ने यीशु जो इय्यां लेर मारी करी मरदे दिख्खेया, तां तिनिए बोल्लेया, “सच्ची ए मणू, परमेश्वर रा पुत्तर थिया।”

⁴⁰ मगदला सहर री मरियम, याकूब ते योसेस री मां मरियम ते सलोमी दुर का ही ए सब किच्‍छ दिख्खेया करदी थी।

⁴¹ ए जनानियां गलील प्रदेश का ही यीशु रे पीच्छे-पीच्छे तिन्हेरे चेल्‍लेयां सांई चलदी ते तिन्हेरी सेवा करदी थी। ते होर भी मती जनानियां भी तित्ते थी, जे यीशु कने यरुशलेम बिच आए थियां।

यीशु रा दफन कित्तेया जाणा

⁴² ए सारा किच्‍छ विश्राम दिन री तयारी करणे वाले रोज्जे होया, जां सँझ होई,

⁴³ अरिमतिया सहर रे रैह्णे वाले यूसुफ नां रे इक्क मणू ने हिम्मत करी के पिलातुस का यीशु री लास मंगी लित्ती। से मंडल रा इक्क जरुरी सदस्य थिया अते से अप्पु भी परमेश्वर रे राज री भाल बिच थिया।

⁴⁴ पिलातुस जो हैरानी होई कि यीशु इतणे तौले मरी गे, अते तिनिए हाकिम जो सदवाई करी पूच्छेया, “कै यीशु मरी चुके रा है?”

⁴⁵ जां तिनिए हाकिम का सब किच्‍छ पता लाई लेया, तां यीशु री लास यूसुफ जो देई दित्ती।

⁴⁶ तां यूसुफ ने सन री इक्क चादर खरीदी लेई, अते लास जो उतारी करी तिस चादर अन्दर लपेटेया, अते इक्क कब्र अन्दर रख्खेया जे कि इक्क बड्डी टोल अन्दर खणेरी थी, अते कब्र रे दरवाज्जे पर इक्क पत्थर रुलकाई दित्तेया।

⁴⁷ मगदला सहर री मरियम ते योसेस री मां मरियम दिख्खेया करदी थिया कि तिन्हा जो कुते रख्खे दा है।