मत्ती 26 - चम्बयाली नौआ नियम

यीशु रे खिलाफ चाल

¹ जां यीशु ए सारी गल्लां बोल्ली बैठे तां अपणे चेल्‍लेयां जो बोलणा लग्गे,

² तुसा जाणदे की दो दिनां बाद फसह रे त्याहार है ते मणू रा पुत्तर, जे मैं ही है सुली पर चढ़ाए जाणे तांइ पकड़वाया जाणा।

³ तां बड्डे पुरोत्त ते प्रजा रे बुजुर्ग मणू काईफा नां रे प्रधान पुरोत्त रे अगँणे कठ्ठी गे,

⁴ ते अप्पु बिच सलाह करण लगे की यीशु जो चलाकी कने पकड़ी करी मारी रखण।

⁵ पर से बोलदे थिये, पर्व रे बेल्ले नी कुथकी इय्यां ना हो की लोक्कां रे मन बिच बलवा मची जाए।

यीशु पर कीमती इत्र रा छिड़काव

⁶ जां यीशु बैतनिय्याह बिच शमौन कोढ़ी रे घरे थिया।

⁷ तां इक्क जनानी सगंमरमर रे बर्तन बिच कीमती इत्तर लेई करी तिसका आई, ते जां से रोटी खाणे तां बैठे रे थिये तां तिन्हेरे सिर पराल्ले उन्धेरी दित्तेया।

⁸ ए दिख्खी करी तिन्हेरे चेल्‍ले गुस्से होए ते बोलणा लगे, इसेरी बर्बादी किजो कित्ती गई?

⁹ इसजो तां अच्छे दाम पर बेच्ची करी गरीब्बां बिच बडेंया जाई सकदा थिया।

¹⁰ ए जाणी करी यीशु ने तिन्हा जो बोल्लेया, जनानी जो किजो तगं करेया करदे हिन? तिसने मेरे कने अच्छाई कित्ती।

¹¹ गरीब तां तुसा कने हमेसा रैहन्दे, पर मैं तुसा कने हमेसा नी रैह्णा।

¹² इनिये मेरे सरीर पर जे ए इत्तर उन्धेरे रा है, ए मेरे गाढ़े जाणे तांइ कित्ते रा है।

¹³ मैं तुसा कने सच बोलदा, की सारी दुनिया बिच जित्ते कुथकी ए सुब बसेख दस्सेया जाणा, तित्ते इसेरे इस कम्म रा जिकर भी इसेरी याद बिच कित्तेया जाणा।

यहूदा इस्करियोती रा धोखा दैणा

¹⁴ तां यहूदा इस्करियोती ने, जे बारा चेल्‍लेयां बिच का इक्क थिया बड्डे पुरोत्त का जाई करी ए बोल्लेया।

¹⁵ जे अगर मैं तिसजो तुसा रे हत्थ पकड़वाई देयां तां मेरे जो कै दिगें? तिन्हा ने तिसजो तीह् चाँदी रे सिक्के तौली करी देई दित्ते।

¹⁶ ते से तिसी बेल्ले का तिन्हेरे जो पकड़वाणे रा मौक्का तोपणा लग्गेया।

चेल्‍लेयां कने फसह री आखरी धाम

¹⁷ अखमीरी रोट्टी रा त्योहर रे पैल्ले दिन, चेल्‍ले यीशु का आई करी पूच्छणा लग्गे, तुसा कुते चाह्‍ंदे की असी तुसा तांइ फसह री रोट्टी खाणे री तयारी करण?

¹⁸ तिन्हा ने बोल्लेया, नगर बिच अमुक मणू का जाई करी तिसजो बोल्लो की गुरु बोलदे की मेरे बेल्ला नेड़े है, मैं अपणे चेल्‍लेयां कने तेरे इत्ते फसह रा त्याहार मनाणा।

¹⁹ अते चेल्‍लेयां ने से ही कित्तेया जिय्यां यीशु ने तिन्हा जो करणे तांइ बोल्लेया थिया, ते फसह री रोट्टी त्योहर कित्ती।

²⁰ जां सांज्ज होई तां से बारा चेल्‍लेयां कने रोट्टी खाणे तांइ बैठ्ठे।

²¹ जां से खाया करदे थिये तां तिन्हा ने बोल्लेया, मैं तुसा कने सच बोलदा की तुसा बिच का इक्क ने मेरे जो पकड़वाणा।

²² इस पर से बड़े उदास होए, ते हर इक्क तिन्हा का पूच्छणा लग्गेया, ओ गुरु, कै से मैं है।

²³ तिन्हा ने जवाब दित्तेया, जिस ने मेरे कने थाली बिच हत्थ पाए रा है तिनिये ही मेरे जो पकड़वाणा।

²⁴ मणू रा पुत्तर, जे मैं ही है तां जदेया तिसेरे बारे बिच लिख्खे रा है, मरणा जरुरी है पर तिस मणू तांइ अफसोस है जिसेरे वजह कने मणू रा पुत्तर, जे मैं ही है पकड़वाया जादां: जे तिस मणू रा जन्म ही नी हुदां तां तिसेरे तांइ भला हुदां।

²⁵ तां तिसेरे पकड़वाणे वाले यहूदा ने बोल्लेया, ओ गुरु कै से मैं है? तिन्हा ने तिसजो बोल्लेया, तू बोल्ली बैठा।

प्रभु भोज

²⁶ जां से खाया करदे थिये तां यीशु ने रोट्टी लित्ती ते आशीष मगीं करी तोड़ी, ते चेल्‍लेयां जो देई करी बोल्लेया, लेयो, खाओ ए मेरा सरीर है।

²⁷ फिरी तिन्हा ने कटोरा लेई करी शुक्रिया कित्ता, ते तिन्हा जो देई करी बोल्लेया, तुसा सारे इस बिच का पीयो,

²⁸ किजोकी ए मेरा वाचा रा से खून है, जो मतेयां रे पाप्पां री माफी तांइ बहाया जादां।

²⁹ मैं तुसा कने सच बोलदा की अंगूर रा ए रस्स तिस दिन तिकर कदी नी पिगां जां तिकर तुसा कने अपणे पिता रे राज बिच नौआ ना पीयां।

³⁰ फिरी से भजन गाई करी जैतून पहाड़ पर गे।

पतरस रे मन्हा करणे री भविष्यवाणी

³¹ तां यीशु ने तिन्हा ने जो बोल्लेया, “तुसी सारेयां ने आज ही रात्ती मेरे बारे बिच धोखा खाणा; किजोकी लिख्खेया गे रा है कि ‘मैं पुहाल जो मारी दैणा ते तां धण री भेड़ां ने तित्तर-बित्तर होई जाणा।’”

³² पर मैं जिन्दे होणे रे बाद तुसा का पैल्ले गलील जो जाणा।

³³ इस पर पतरस ने तिन्हा जो बोल्लेया, जे सारे तुसा रे बारे बिच धोखा खाण ते खाण, पर मैं कदी भी धोखा नी खाणा।

³⁴ यीशु ने तिसजो बोल्लेया, मैं तेरे कने सच बोलदा की अज्ज ही रात्ती मुर्गे रे बांग मारणे का पैल्ले, तैं त्रै वरी मेरे का मुकरी जाणा।

³⁵ पतरस ने तिन्हा जो बोल्लेया, जे मेरे जो तुसा कने मरणा भी पे, तां भी मैं तुसा का कदी नी मुकरणा ते इदेया ही सारे चेल्‍लेयां ने भी बोल्लेया।

गतसमनी बिच प्रार्थना

³⁶ तां यीशु अपणे चेल्‍लेयां कने गतसमनी नां रे इक्क जगाह् पर आये ते अपणे चेल्लेया जो बोलणा लग्गे इत्ते ही बेई रेयो जां तिकर मैं तित्ते जाई करी प्रार्थना करां।

³⁷ से पतरस ते जब्दी रे दोई मुडेंया जो कन्ने लेई गे, ते उदास ते व्याकुल होणा लग्गे।

³⁸ तां तिन्हा ने तिन्हेरे जो बोल्लेया, मेरा दिल बड़ा उदास है इत्ते तिकर की मेरी जान निकलेया करदी है तुसा इत्ते ही रुको ते मेरे कने जागदे रेयो।

³⁹ फिरी से थोड़ा होर अग्गे बधी करी मुँह रे भारे पेय, ते प्रार्थना कित्ती, ओ मेरे पिता जे होई सके तां ए कटोरा मेरे का टली जाए तां भी जिय्यां मैं चाह्‍ंदा तिय्यां नी पर जिय्यां तुसा चाह्‍ंदे तिय्यां ही हो।

⁴⁰ फिरी तिन्हा ने चेल्‍लेयां का आई करी तिन्हा जो सुत्ते रे पाया ते पतरस जो बोल्लेया कै तुसा मेरे कने इक्क घड़ी भी नी जाग्गी सके?

⁴¹ जागदे रेयो, ते प्रार्थना करदे रेयो की तुसा परिक्षा बिच ना पेयो: आत्‍मा तां तैयार है, पर सरीर कमजोर है।

⁴² फिरी तिन्हा ने दुई वरी जाई करी प्रार्थना कित्ती ओ मेरे पिता, जे ए मेरे पिए बगैर नी हटी सकदा तां तुसा री मर्जी पूरी हो।

⁴³ तां तिन्हा ने आई करी तिन्हा जो सुत्ते रे पाया किजोकी तिन्हेरी हाख्खियां निन्दर कने भरे री थी।

⁴⁴ तिन्हेरे जो छड्डी करी से फिरी चली गे, ते तिन्हा ही शब्दां बिच फिरी तिज्जी वरी प्रार्थना कित्ती।

⁴⁵ तां तिन्हा ने चेल्‍लेयां का आई करी तिन्हेरे जो बोल्लेया, अवे सोदें रेयो, ते अराम करो: दिख्खो, से बेल्ला आई पूज्जे रा है, ते मणू रा पुत्तर, जे मैं ही है पापियां रे हत्थां पकड़वाया जादां।

⁴⁶ उठो, चलिये दिख्खो, मेरा पकड़वाणे वाला नेड़े आई पूज्जे रा है।

यीशु रा धोखे कने पकड़वाया जाणा

⁴⁷ से ए बोल्लेया ही करदे थिये की यहूदा जे बारां बिच का इक्क थिया, आया ते तिसेरे कने बड्डे पुरोत्त ते लोक्कां रे बुजुर्ग मणू रे पास्से का बड्डी भीड़, तलवारां ते लठ लेई करी आई।

⁴⁸ तिन्हेरे पकड़वाणे वाले ने तिन्हेरे जो ए निशानी दित्ती री थी: जिस जो मैं चुम्मी लेयां से ही है तिसजो पकड़ी लेयो।

⁴⁹ ते तिसी बेल्ले यीशु का आई करी बोल्लेया, ओ गुरु, नमस्कार! ते तिन्हेरे जो बड़ा चुम्मेया।

⁵⁰ यीशु ने तिसजो बोल्लेया, ओ दोस्त जिस कम्म तांइ तू आए रा है तिसजो करी लेय तां तिन्हा ने नेड़े आई करी यीशु पर हत्थ पाए ते तिन्हा जो पकड़ी लेया।

⁵¹ यीशु रे साथियां बिच का इक्क ने हत्थ बधाई करी अपणी तलवार खिची ली ते प्रधान पुरोत्त रे नौक्कर पर चलाई करी तिसेरा कान्न उड़ाई दित्ता।

⁵² तां यीशु ने तिसजो बोल्लेया, “अपणी तलवार म्यान बिच रख्खी लै, किजोकी जे तलवार चलादें से सारे तलवार कने खत्म कित्ते जाणे।

⁵³ कै तू नी जाणदा की मैं अपणे पिता का बिनती करी सकदा, ते से स्वर्गदूतां री बारां पलटन का जादा अब्बे ही हाजिर करी सकदा।

⁵⁴ पर पवित्रशास्त्र री लिख्खे री गल्लां इय्यां ही पूरी होणा जरुरी हिन, वरना से गल्लां पूरी किय्यां होणी?”

⁵⁵ तिस बेल्ले यीशु ने भीड़ जो बोल्लेया, कै तुसा तलवारां ते लाठियां लेई करी मेरे जो डाकू सांई पकड़ने तांइ निकले रे हिन? मैं हर रोज मन्दिर बिच बेई करी उपदेस देया करदा थिया ते तुसा मेरे जो नी पकड़ेया।

⁵⁶ पर ए सारा किच्‍छ इस तांइ होए रा है की भविष्यद्वक्ता रे वचन पूरे होण तां सारे चेल्‍ले तिन्हेरे जो छडी करी न्हसी गे।

कैफा रे सामणे यीशु

⁵⁷ तां यीशु रे पकड़ने वाले तिन्हेरे जो काईफा नां रे प्रधान पुरोत्त का लेई गे, जित्ते शास्त्रि ते बुजुर्ग मणू कठे होए थिये।

⁵⁸ पतरस दुर ही दुर तिन्हेरे पीच्छे-पीच्छे प्रधान पुरोत्त रे अगँण तिकर गेया, ते अन्दर जाई करी प्यादेयां कने बेई गेया ताकि से दिख्खी सके कि अवे आखर तिकर क्‍या-क्‍या होणा।

⁵⁹ बड्डे पुरोत्त ते सारी महासभा यीशु जो मारी रखणे तांइ तिन्हेरे खिलाफ झूठ्ठी गवाई री तलाश बिच थिये।

⁶⁰ पर मते सारे झूठ्ठे गवाह रे आणे पर भी ना मिल्ली आखर बिच दो जणे आए।

⁶¹ ते बोल्लेया, इन्ने बोल्ले रा है की मैं परमेश्वर रे मन्दिर जो ढाह्ई सकदा ते तिसजो त्रै दिनां बिच वापस बणाई सकदा।

⁶² तां प्रधान पुरोत्त ने खड़ी करी यीशु जो बोल्लेया, कै तू कोई जवाब नी दिंदा? ए मणू तेरे बारे बिच कै गवाई देया करदे हिन?

⁶³ पर यीशु चुप रेय, तां प्रधान पुरोत्त ने तिन्हेरे जो बोल्लेया, मैं तेरे जो जिन्दे परमेश्वर री कसम दिंदा की जे तू परमेश्वर रा पुत्तर मसीह यीशु है तां असा कने बोल्ली दे।

⁶⁴ यीशु ने तिसजो बोल्लेया, तू अप्पु ही बोल्ली दित्ता ते तुसा कने ए भी बोलदा कि अब्बे का मणू रे पुत्तर जो सर्वशक्तिमान रे सज्जे पास्से बैठे रे ते आसमान रे बदलां पर आदें दिखगे।

⁶⁵ इस पर प्रधान पुरोत्त ने अपणे कपड़े फाड़े ते बोल्लेया, इसने परमेश्वर री बेजती कित्ती री है, अवे असा जो गवाई री कै जरुरत? दिख्खो, तुसा अब्बे ए बेजती सुणे री है।

⁶⁶ तुसा कै सोचदे? तिन्हा ने जवाब दित्ता ए मारे जाणे रे जोग्गे है।

⁶⁷ तां तिन्हा ने तिन्हेरे मुँह पर थूक्केया ते तिन्हेरे जो मुक्के मारे, दुएयां ने तिन्हेरे जो थप्पड़ मारी करी बोल्लेया।

⁶⁸ ओ मसीह यीशु असा कने भविष्यवाणी करी के बोल की कुसने तेरे जो मारेयां?

पतरस रा यीशु का मन्हा करणा

⁶⁹ पतरस बाहर अगँणे बिच बैठे रा थिया की इक्क नौकराणी तिसेरा का आई ते बोल्लेया: तू भी यीशु गलीली रे कन्ने थिया।

⁷⁰ तिसने सारेयां रे सामणे ए बोलदे होए इन्कार कित्तेया, मैं नी जाणदा की तू कै बोल्लेया करदी है।

⁷¹ जां से बाहर डेवढ़ी बिच गेया, तां दुई नौकराणी ने तिसजो दिख्खी करी जे तित्ते थिये, तिन्हेरे जो बोल्लेया, ए भी तां नासरत कस्बे रे यीशु, जी कने थिया।

⁷² तिसने कसम खाई करी फिरी इन्कार कित्तेया मैं तिस मणू जो नी जाणदा।

⁷³ थोड़ी देर बाद लोक्कां ने तित्ते खड़ित्ते रे थिये, पतरस का आई करी तिसजो बोल्लेया, सच्ची तू भी तिन्हा बिच का इक्क है किजोकी तेरी बोल्ली तेरा राज खोल्ली दिदीं।

⁷⁴ तां से धिक्कारणे ते कसमां खाणां लग्गेया: मैं तिस मणू जो नी जाणदा। ते तिसी बेल्ले मुर्गे ने बांग मारी।

⁷⁵ तां पतरस जो यीशु जी री बोल्ले री गल्ल याद आई मुर्गे रे बांग दैणे का पैल्ले तू तीन्न वरी मेरा इन्कार करणा ते से बाहर जाई करी फूटी-फूटी करी रोणा लग्गेया।