मत्ती 24 - चम्बयाली नौआ नियम

मन्दिर रे विनास होणे रे बारे बिच भविष्यवाणी

¹ जां यीशु मन्दिर का बाहर जाया करदे थिये, तां तिन्हेरे चेल्‍ले तिन्हेरे जो मन्दिर रा निर्माण दसणे तांइ तिन्हा का आए।

² तिन्हा ने तिन्हेरे जो बोल्लेया, तुसा ए सारा किच्‍छ दिख्खेया करदे हिन? मैं तुसा जो सच बोलदा, इत्ते इक्क बट्टे पर बट्टा भी नी बचणा जे ढाया नी जाणा।

दु:ख ते मुसीबतां

³ जां से जैतून पहाड़ पर बैठ्ठे रे थिये, तां चेल्‍लेयां ने किल्ले बिच तिन्हेरे का आई करी बोल्लेया, असा जो दस्सो ए गल्लां कधाड़ी होणी? तुसा रे आणे रा ते दुनिया रे खतम होणे री कै निशानी होणी?

⁴ यीशु ने तिन्हेरे जो जवाब दित्तेया, चौकन्ने रेयो! कोई तुसा जो भड़काई ना सके,

⁵ किजोकी मते सारे इदेय होणे जिन्हा ने मेरे नां कने आई करी बोलणा, मैं मसीह यीशु है, ते मते जणेया जो भड़काणा।

⁶ तुसा लड़ाईयां ते लड़ाईया री गल्लां सूणनी, तां डरी मत जादें किजोकी इन्हेरा होणा पक्का है, पर तिस बेल्ले खातमा नी होणा।

⁷ किजोकी जाति पर जाति, ते राज पर राज ने हमला करणा, ते जगाह्-जगह अकाल पैणे, ते भुकम्प होणे।

⁸ ए सारी गल्लां दुख-मुसीबतां री सुरुआत होणी।

⁹ तां तिन्हा लोक्कां ने जे तुसा रे खिलाफ हिन तुसा जो सताणे तांइ पकड़वाणा, ते तिन्हा ने तुसा जो मारी रखणा, ते मेरे पीच्छे चलणे री वजह कने सारी जातियां रे लोक्कां ने तुसा कने नफरत रखणी।

¹⁰ तां मते जणेया ने विश्वास का पीच्छे हटी जाणा ते इक्क-दूए जो पकड़वाणा, ते इक्क-दूए कने नफरत रखणी।

¹¹ मते सारे झूठ्ठे भविष्यद्वक्ता आणे, ते मते जणेया जो भटकाणा।

¹² अधार्मिक रे बधणे री वजह कने मते जणेया ने इक्क-दूए प्यार नी रखणा,

¹³ पर जे कोई अपणी जिन्दगी रे आखर तक मेरे पर विश्वास रखगा, तिसेरा ही छुटकारा होणा।

¹⁴ ते स्वर्ग राज रा ए सुब बसेख सारी दुनिया रे सारे लोक्कां बिच सूणाई जाणी, ताकि सारी दुनिया रे लोक्कां जो मनणे रा मौक्का मिल्ले, तां दुनिया रे मुकणे रा समय आई जाणा।

सबका बड्डी मुसीबत री सुरुआत

¹⁵ इधेरे तांइ जां तुसा तिस उजाड़ने वाली तिस घटिया चीज जो दिख्खो जिसेरी गल्ल दानिय्येल भविष्यद्वक्ता रे जरिए सुणे री थी, पवित्र जगाह् पर खड़ित्ते रे दिख्खो (जे पढे, से समजे)।

¹⁶ तां जे यहूदियां बिच होणे से पहाड़ां पर नह्सी जाण।

¹⁷ जे छत पर होणे, से अपणे घरे का समान लैणे तांइ ना उतरे।

¹⁸ ते जे खेतरां बिच होणे से अपणे कपड़े लैणे तांइ वापस ना मुड़े।

¹⁹ तिन्हा दिनां बिच जे दुपराणी ते दूद्द पुआणी वाली होणी, तिन्हेरे तांइ हाय, हाय।

²⁰ प्रार्थना करेया करो की तुसा जो सरदी रे मौसम बिच या विश्राम दिन पर दौड़णा ना पेयो।

²¹ किजोकी तिस बेल्ले इदेया वरी दुख होणा, जदेया दुनिया री सुरुआत का अब्बे तिकर होया ते ना कदी होणा।

²² अगर से दिन घटाए ना गेरे हुदें तां मणू ही नी बचदा, पर चुणे रे लोक्कां री वजह कने से दिन घटाए जाणे।

²³ तिस बेल्ले जे कोई तुसा जो बोल्ले कि मसीह यीशु इत्ते है! या उत्ते है! तां विश्वास मत करदे।

²⁴ किजोकी झूठ्ठे मसीह ते झूठ्ठे भविष्यद्वक्ता खड़ी उठणे, ते बड्डी-बड्डी चीजां ते हैरान करणे वाले चमत्कार दिखाणे कि जे होई सके ते चुणे रे लोक्कां जो भी भड़काई दैण।

²⁵ दिख्खो मैं पैल्ले का ही तुसा जो सब किच्‍छ दस्सी रख्खे रा है।

²⁶ इस तांइ, जे से तुसा जो बोल्ले, दिख्खो से जगंल बिच है, तां बाहर मत निकली जादें या दिख्खो से कोठरियां बिच है, तां विश्वास मत करदे।

²⁷ किजोकी जिय्यां बिजली पूरब का लेई करी पश्चिम तकर चमकदी, तिय्यां मणू रे पुत्तर, जे मैं ही है रा आणा भी होणा।

²⁸ जित्ते लास हो, सारे लोक्कां जो ए इय्यां पता लग्गी जाणा कि ए कुते होणा जिय्यां कि इल्लणां रे कठीणे पर लास रा पता चलदा।

मणू रे पुत्तर रा दोबारा वापस आणा

²⁹ तिन्हा दिनां रे दुखां रे बिल्कुल बाद बिच ही स्वर्ग न्याहरा होई जाणा, ते चाँद री रौसनी चली जाणी, ते तारें आसमान का डिग्गी पैणे ते स्वर्ग री ताकतां हिलाई जाणी।

³⁰ तां मणू रे पुत्तर, जे मैं ही है री निशानी आसमान बिच दिसणी, ते तां दुनिया रे सारे कुल रे लोक्कां ने अपणी छाती कुटणी ते मणू रे पुत्तर, जे मैं ही है जो बड़ी ताकत ते महिमा कने बदलां पर आदें दिखणा।

³¹ तिन्हा ने तुरही री बड़ी अवाज कने अपणे स्वर्गदूतां जो अग्गे भेजणा, ते तिन्हा आसमान रे इस कुणे का लेई करी तिस कुणे तिकर, चारों पास्से का तिन्हेरे चुणे रे लोक्कां जो कठेरणा।

अंजीर रे बूट्टे रा उदारण

³² अंजीर रे बूट्टे रे उदारण कने ए गल्ल सिख्खो: जां तिसेरी डालां नरम होई जादीं ते पत्ते निकलणा लगदे, तां तुसा समजी जादें की गरमी रा मौसम नेड़े है।

³³ इसी तरिक्के कने जां तुसा इन्हा गल्लां जो हुदें दिख्खो, तां समजी जायो की से नेड़े है, बल्कि दरवाज्जे पर ही है।

³⁴ मैं तुसा जो सच बोलदा की जां तिकर ए सारी गल्लां पूरी ना होई जाण, तां तिकर इस पीढ़ी रा अन्त नी होणा।

³⁵ आसमान ते जमीन टली जाणे पर मेरी गल्लां बगैर पूरे होए नी टलणी।

जागदे रेयो

³⁶ तिस दिन ते तिस घड़ी रे बारे बिच कोई नी जाणदा, ना स्वर्गदूत ते ना पुत्तर, पर सिर्फ प्यो।

³⁷ जदेय नूह रे दिन थिये, तिय्यां ही मणू रे पुत्तर, जे मैं ही है रा भी आणा होणा।

³⁸ किजोकी जिय्यां जल-प्रलय रे पैल्ले रे दिनां रे दिनां बिच, जिस दिन तिकर नूह जहाज पर नी चढ़ेया थिया, तिस दिन तांइ मणू खादें-पिदें, ते तिन्हा बिच ब्याह हुदें थिये।

³⁹ ते जां तिकर तिन्हा जो रुढ़ाई करी लेई ना गेया, तां तिकर तिन्हेरे जो किच्‍छ भी पता नी चलेया तिय्यां ही मणू रे पुत्तर, जे मैं ही है रा आणा भी होणा।

⁴⁰ तिस दिन दो जणे खेतरां बिच होणे, इक्क लेई लित्ता जाणा ते दुआ छड्डी दित्ता जाणा।

⁴¹ दो जनानियां चक्की पिस्सेया करदी होणी, इक्क लेई लित्ती जाणी ते दुई छड्डी दित्ती जाणी।

⁴² इधेरे तांइ जागदे रेयो ते किजोकी तुसा नी जाणदे तुसा रा प्रभु कधाड़ी आणे वाला है।

⁴³ पर ए जाणी लेयो की जे मालक जाणदा की चोर ने कुस बेल्ले आणा तां से जागदा रैहन्दा, ते अपणे घर बिच तिसजो बढ़ना नी दिंदा।

⁴⁴ इधेरे तांइ तुसा भी तैयार रेयो, किजोकी जिस घड़ी रे बारे बिच तुसा सोचदे भी नी होणे, तिसी घड़ी मणू रे पुत्तर, जे मैं ही है ने आई जाणा।

भरोसेमदं नौक्कर ते बुरा नौक्कर

⁴⁵ अते से भरोसेमदं ते समजदार दास कुण है, जिस जो मालक ने नौकरांं-चाकरां पर सरदार ठैहराया की ठीक-ठीक समय पर तिन्हेरे जो रोटी देय?

⁴⁶ धन्न है से दास, जिस जो तिसेरा मालक आई करी इय्यां ही करदे पाए।

⁴⁷ मैं तुसा जो सच बोलदा, तिनिये तिसजो अपणी सारी दौलत पर अधिकारी ठैहराणा।

⁴⁸ पर जे से बुरा दास सोचणा लगे कि मेरे मालक रे आणे बिच देर है,

⁴⁹ ते अपणे कन्ने वाले नौकरांं जो कुटणा लग्गी पेय, ते पियक्कड़ा कने खाए-पिए।

⁵⁰ तां तिस दास रे मालक ने ऐसे दिन हटणा, जा से तिसेरी भाल बिच ना हो, ते इक्क इदेयी घड़ी जिस जो से जाणदा ना हो,

⁵¹ तां तिनिये तिसजो वरी सजा दैणी ते तिसेरा हिस्सा ढोंगियां कने ठेहराणा: उत्ते रोणा ते दांद्द पिह्णा होणा।