मत्ती 19 - चम्बयाली नौआ नियम

यीशु रा गलील प्रदेश का यरुशलेम जो जाणा तलाक पर सवाल

¹ जां यीशु ए गल्लां बोल्ली बैठ्ठे तां से गलील का चली गे ते यरदन रे पार यहूदियां रे परदेस अन्दर आई गे।

² इक्क बड़ी बड्डी भीड़ तित्ते का तिन्हेरे पीच्छे चली पेई, ते यीशु ने तिन्हा जो खरा कित्तेया।

³ तां फरीसी परखणे तांइ यीशु का आई करी बोलणा लगे, कै अपणी लाड़ी जो कुसकी भी वजह कने तलाक देई सकदे?

⁴ उन्हा जो यीशु ने जवाब दित्तेया, कै तुसा ने शास्त्र बिच नी पढ़े रा है कि दुनिया जो रचणे वाले ने सुरु बिच, उन्हा जो इक्क जनानी ते इक्क मड़द रे रुप बिच रचेया थिया?

⁵ ते बोल्लेया थिया, इधेरे तांइ प्यो ते मां जो छड्डी करी मड़द अपणी लाड़ी कने दो हुन्दे भी इक्क तन रैह्णा।

⁶ इधेरे तांइ अवे से दोह्ई जणे बखरे-बखरे नी पर से इक्क-तन हिन इधेरे तांइ जे परमेश्वर ने जोड़े रा है, तिसजो कोई बखरा ना करो।

⁷ तां फरीसियां ने तिन्हा का पूच्छेया, फिरी मूसा नबी ने ए कानून किजो दस्सेया कि लाड़ी जो तलाक-पत्तर देई करी तिसका तलाक लेई सकदे?

⁸ यीशु ने तिन्हा जो बोल्लेया, मूसा ने तुसा रे सख्त मना जो दिख्खी करी इय्यां कित्ता पर पैल्ले इय्यां नी हुन्दा थिया।

⁹ अते मैं तुसा जो बोलदा, कि जे भी मणू अपणी लाड़ी जो व्यभिचार जो छड्डी करी कुसकी होरसी वजह कने तलाक दिंगा ते दूज्जी लाड़ी ब्याह्ई लिन्गा, से व्याभिचार करदा ते जे तिस छड्डे री जनानी कने ब्याह् करगा, तिस तांइ से भी व्याभिचार ही होणा है।

¹⁰ चेल्‍लेयां ने यीशु जो बोल्लेया, अगर लाड़ा-लाड़ी रे बिच इदेया रिस्ता हो तां ब्याह् करणा ही नी चाएदा।

¹¹ यीशु ने तिन्हा जो बोल्लेया, इस उपदेस पर हर कोई नी चली सकदा सिर्फ सेह्ई चली सकदे, जिन्हा जो परमेश्वर का ए दान मिल्ले रा है।

¹² किजोकी किच्‍छ किन्नर इदेय हिन, जे इदेय ही पैदा होए, ते किच्‍छ किन्नर इदेय हिन, जिन्हा जो मणूआं ने किन्नर बणाए रा है अते किच्‍छ किन्नर इदेय हिन, जिन्हा ने स्वर्ग रे राज तांइ अप्पु जो किन्नर बणाए रा है, जे इस गल्ल जो मन्नी सकदा से मन्नो।

बच्चेयां जो आशीर्वाद

¹³ फिरी मणू अपणे निके-निकेयाँ जो यीशु का लेई आये कि से तिन्हेरे सरां पर अपणा हत्थ रख्खी करी आशीष देंन ते प्रार्थना करण, पर चेल्‍लेयां ने तिन्हा मणूआं जो ठाक्की दित्तेया।

¹⁴ यीशु ने बोल्लेया, निके-निकेयाँ जो मेरे का आणा देयो, इन्हा जो मत रोको, किजोकी स्वर्ग रा राज इदेयां रा ही है।

¹⁵ अते से तिन्हा पर अपणा हत्थ रख्खी करी तित्ते का चली गे।

अमीर आदमी ते हमेसा री जिदंगी

¹⁶ इक्क मणू यीशु का आया ते तिन्हा जो बोलणा लगेया, ओ गुरु जी, मैं कुण इदेया भला कम्म करां कि मेरे जो हमेसा री जिन्दगी मिली जाओ?

¹⁷ तिन्हा ने तिसजो बोल्लेया, तू मेरे का भलाई रे बारे अन्दर किजो पूच्छेया करदा है? भला तां इक्क ही है, पर जे तू जिन्दगी जो पाणा चांदा, तां हुक्मां जो मन्नेया कर।

¹⁸ तिनिए यीशु का पूच्छेया, कुण वाले हुक्म? यीशु ने बोल्लेया कि, ए कि कुसकी री जान नी लैणी, व्यभिचार नी करणा, चोरी नी करणी, झूठ्ठी गवाई नी दैणी,

¹⁹ अपणे प्यो अते अपणी मां री बड़ाई करणी, ते अपणे गुआडीं कने अप्पु सांई प्यार रखणा।

²⁰ तिस जुआन मणू ने यीशु जो बोल्लेया, इन्हा सब गल्लां जो तां मैं सच्चे मनां कने पूरा करदा ही है अवे मेरे अन्दर कुस गल्ले रा घाट्टा है?

²¹ यीशु ने तिसजो बोल्लेया, जे तू पूरा सही होणा चाह्‍ंदा, तां जे किच्‍छ भी तेरे का है से बेच्ची करी पैसे गरीबां जो बंड्डी दे, ताकि तिज्जो स्वर्ग अन्दर धन-दौलत मिल्ले ते आई करी मेरा चेल्ला बणी जाओ।

²² पर जां उस जुआन ने ए सूणेया तां दुखी होई करी चली गेया किजोकी से बड़ा अमीर थिया।

²³ तां यीशु ने अपणे चेल्‍लेयां जो बोल्लेया, मैं तुसा जो सच बोलदा कि अमीर मणू रा स्वर्ग रे राज अन्दर जाणा बड़ा मुस्कल ए।

²⁴ मैं तुसा जो फिरी बोल्ली दिन्दा कि अमीर मणू रा परमेश्वर रे राज अन्दर जाणे का इक्क ऊँट रा सुई रे भोक्क का घुसड़ी जाणा जादा असान है।

²⁵ ए सुणी करी चेल्‍लेयां ने बड़ी हैरानी कने पूच्छेया, फिरी कुसेरा छुटकारा होई सकदा?

²⁶ यीशु ने तिन्हा पास्से दिख्खी करी बोल्लेया, मणूआं तांइ ए नामुमकिन है, पर परमेश्वर तांइ सब किच्‍छ मुमकिन है।

²⁷ इस गल्ल पर पतरस ने तिन्हा जो बोल्लेया, दिख्खो, असी तां अपणा सब किच्‍छ छड्डी करी तुसा रे पीच्छे चली पे रे हिन तां असा जो कै मिलणा?

²⁸ यीशु ने तिन्हा जो बोल्लेया, मैं तुसा जो सच बोलदा कि नौये जुग अन्दर जां मणू रे पुत्तर, जे मैं ही है ने अपणे प्रतापी सिंहासन पर बैह्णा तां तुसा बीह्, जे मेरे पीच्छे चले रे हिन, बारा सिंहासनां पर बेई करी इस्राएल रे बारा गोत्रां रा हिसाब-किताब करणा।

²⁹ ते मेरे तांइ जिनिए भी अपणा घर-बार, भैण-भ्याल, मां-प्यो, निके-निके या अपणे खेतरां जो छड्डी दित्तेया, तिसजो सौ गुणा जादा मिलणा अते तिनिए हमेसा री जिन्दगी रा भी हकदार बणना।

³⁰ पर मते जणे जे अब्बे पैल्ले हिन, आखरी होई जाणे अते जे आखरी हिन, से पैल्ले होई जाणे।