मत्ती 14 - चम्बयाली नौआ नियम

यूहन्ना बपतिस्मा दैणे वाले रा खून होणा

¹ उस बेल्ले गलील रे राज्जे हेरोदेस ने जां यीशु रे कम्मां रे बारे बिच सूणेया।

² तां तिसने अपणे नौकरांं जो बोल्लेया, ए यूहन्ना बपतिस्मा दैणे वाला है, जे मरी करी फिरी जिन्दा होई गेरा है, इधेरे तांइ ए चमत्कारी तिस बिच कम्म करेया करदी हिन।

³ किजोकी ए ओई हेरोदेस थिया जिनिये यूहन्ना जो बन्धी बणाई करी, संगलां कन्ने बन्नी करी जेल्लां बिच पाई दित्तेया थिया ए उसने हेरोदियास रे बोलणे पर कित्तेया थिया, जे पैल्ले उसेरे भाई फिलिप्पुस री लाड़ी थी।

⁴ किजोकी यूहन्ना तिसजो बोलदा रैहन्दा थिया, कि तिज्जो इस कने नी रैह्णा चाएदा।

⁵ इधेरे तांइ हेरोदेस तिसजो मारी दैणा चांह्दा थिया, पर से लोक्कां का डरदा थिया किजोकी मणू यूहन्ना जो भविष्यद्वक्ता मनदे थिये।

⁶ पर जां हेरोदेस रा जन्मदिन आया तां हेरोदियास री कुड़ी ने हेरोदेस अते तिसेरे परौणे रे अग्गे नच्ची करी तिन्हा जो इतणा खुस करी दित्तेया।

⁷ कि हेरोदेस ने कसम खाई करी वचन दित्तेया, तू जे किच्‍छ भी मंन्गगी, मैं तिज्जो दिंगा।

⁸ अते अपणी मां रे उकसाणे पर तिन्ने बोल्लेया, मेरे जो थाली बिच यूहन्ना बपतिस्मा दैणे वाले रा सिर देयो।

⁹ इस गल्ल कने राज्जा बड़ा दुखी होया, पर अपणी कसम री अते अपणे परोणेयां री वजह कने तिसने तिसेरी जरुरत जो पूरा करणे रा हुकम देई दित्तेया।

¹⁰ ते तिसने जेल बिच मणू भेज्जी करी यूहन्ना रा सिर कटवाई दित्ता।

¹¹ अते यूहन्ना रा सिर इक्क थाली बिच रख्खी करी लियाये अते कुड़ी जो देई दित्तेया ते से तिसजो अपणी मां का लेई गई।

¹² फिरी यूहन्ना रे चेल्‍ले आई करी लास जो लेई गे अते तिन्हा ने उस दब्बी दित्तेया अते फिरी तिन्हा ने जाई करी यीशु जो दस्सेया।

पांज्ज हजार मणूआं जो खुआणा

¹³ जां यीशु ने ए सूणेया, तां से तित्ते का किस्ती बिच कुसकी सांत जगाह् पर किल्ले चली गे पर जां लोक्कां जो पता चलेया तां से अपणे सहरां का पैदल ही तिन्हेरे पीच्छे चली गे।

¹⁴ यीशु जां किस्ती का निकली करी बन्ने आये तां तिन्हा लोक्कां री बड़ी बड्डी भीड़ दिख्खी तिन्हा जो तिन्हा पर बड़ा तरस आया ते तिन्हा ने बमारा जो खरा कित्तेया।

¹⁵ जां सँझ होई तां तिन्हेरे चेल्‍लेयां ने यीशु का आई करी बोल्लेया, ए सुनसान जगाह् है ते बड़ी हाण भी होई गे री है, इधेरे तांइ मणूआं जो भेजी देयो, ताकि से ग्रां बिच जाई करी अपणे तांइ रोट्टी खरीदी लेंन।

¹⁶ पर यीशु ने तिन्हा जो बोल्लेया, “इन्हा जो कुते जाणे री जरूत नी है: तुसा ही इन्हा जो खाणे जो देयो।”

¹⁷ तिन्हा ने यीशु जो बोल्लेया, असा का सिर्फ पंज रोटियां ते दो मच्छियाँ हिन।

¹⁸ यीशु ने बोल्लेया, तिन्हा जो इत्ते मेरे का लेई आओ।

¹⁹ यीशु ने लोक्कां री भीड़ जो बोल्लेया कि तुसा घा बिच बेई जाओ फिरी यीशु ने पंज रोटियां ते दो मच्छियाँ जो लेया ते स्वर्ग पास्से दिख्खी करी परमेश्वर रा शुकर कित्तेया अते रोटियां रे टुकड़े तोड़ी-तोड़ी करी चेल्‍लेयां जो दित्ती अते चेल्‍लेयां ने मणूआं बिच बंड्डी दित्ती।

²⁰ सब खाई करी करी रज्जी गे तां चेल्‍लेयां ने बचे रे टुकड़ेयां कने भरी करी बाहरा टोकरे चुक्के।

²¹ जनानियां अते बच्चेयां जो छड्डी करी तित्ते खाणे वाले कोई पाज्जं हजार आदमी थिये।

यीशु रा पाणी पर चलणा

²² तां यीशु ने झट ही अपणे चेल्‍लेयां जो किस्ती पर चढ़ाया ते जां तांइ से भीड़ जो भेजदे, उन्हा जो गलील री झील रे पार अपणे का पैल्ले ही जाणे जो बोल्लेया।

²³ मणूआं जो भेजणे का बाद यीशु कल्ले ही प्रार्थना करणे तांइ पहाड़ पर चली गे सांज्ज होणे तिकर से कल्ले ही थिये।

²⁴ तिस बेल्ले किस्ती समुंदर बिच पाणी री छलारां कने डगमगाया करदी थी किजोकी सामणे का बजेया करदी थी।

²⁵ ते यीशु रात रे चौथे पहर समुंदर पर चलदे-चलदे तिन्हा का आए।

²⁶ जां चेल्‍लेयां ने तिन्हा जो झील रे उप्पर चलदे दिख्खेया तां से डरी गे ते अप्पु-मिते बोलणा लग्गे, ए तां कोई भूत है! अते डरे रे मारे चिन्डा मारणा लग्गे।

²⁷ पर यीशु ने उस्सी बेल्ले तिन्हा कने गल्ल कित्ती ते बोल्लेया, हिम्मत रख्खो! मैं है! डरो मत।

²⁸ तां पतरस ने यीशु जो बोल्लेया, प्रभु जी, जे तुसा हिन, तां मेरे जो पाणी पर चली करी अप्पु का आणे तांइ हुकम देयो।

²⁹ यीशु ने बोल्लेया, चली आ अते पतरस किस्ती का निकली करी पाणी पर चलदे यीशु का चली पेया।

³⁰ पर तेज ब्यार जो दिख्खी करी से डरी गेया अते डूबणे लग्गेया ते लेरां मारदे बोलणे लग्गेया, प्रभु जी, मेरे जो बचाओ।

³¹ यीशु ने झट ही तिसजो हत्थ दित्तेया ते संभाली लेया अते तिसजो बोल्लेया, तेरा विश्वास छोटा है, तू शक्क किजो कित्तेया थिया?

³² अते जां से किस्ती पर चढ़ी आये तां ब्यार रुकी गई

³³ किस्ती पर जे मणू थिये तिन्हा यीशु री प्रणाम कित्ती अते बोल्लेया, तुसा वाक्केई परमेश्वर रे पुत्तर हिन।

गन्नेसरत बिच बिमारां जो ठीक करणा

³⁴ तां से झील रे पार गन्नेसरत जिले जो पूज्जे।

³⁵ अते तित्ते रे मणूआं ने जां यीशु जो पछाणेया तां तिन्हा ने अख्खी-बख्खी री सब जगाह् पर तिन्हेरे आणे रा सुब बसेख भेजी दित्तेया, अते मणू बिमारां जो तिन्हेरे का लेई आये।

³⁶ ते से तिन्हा कने बिन्ती करणा लगे कि से तिन्हा जो अपणे कपड़े जो ही छुणा देयो, अते जितणेया ने छुत्तेया, से पूरी तरह कने ठीक होई गे।