लूका 4 - चम्बयाली नौआ नियम

यीशु रा परखेया जाणा

¹ फिरी यीशु यूहन्ना का बपतिस्मा लैणे का बाद पवित्रात्मा कने भरी गे, ते फिरी से यरदन नदी का हटी आए ते पवित्रात्मा रे गलाए से इक्क बियाबान जगाह् जो चली गे ते चाली रोज्जां तांइ से तित्ते ही रे।

² इन्हा चाली रोज्जां तांइ शैतान यीशु जो परखदा रेया, इन्हा रोज्जे यीशु ने किच्‍छ भी नी खाये रा थिया, फिरी जां ब्रत्त रा बेल्ला पूरा होई गेया तां यीशु जो भूख्ख लग्गी,

³ तां शैतान, यीशु का आई करी बोलणा लगेया, जे तू परमेश्वर रा पुत्तर है, तां इस पत्थर जो बोल कि ए रोट्टी बणी जाओ।

⁴ यीशु ने शैतान जो जवाब दित्तेया, पवित्रशास्त्र अन्दर ए लिखित्ते रा है: कि मणू सिर्फ रोट्टी खाणे कने ही जिन्दा नी रैह्न्दा।

⁵ फिरी शैतान तिन्हा जो इक्क ऊच्ची का ऊच्ची जगाह् पर लेई गेया ते तिन्हेरे दिखदे ही दिखदे दुनिया-भर रे सारे देस दिखाए।

⁶ ते तिन्हा जो बोल्लेया, मैं ए सारी महिमा ते इन्हा देसां पर सारा हक्क तिज्जो देई दिंगा, किजोकी ए सब किच्‍छ मेरे जो दित्तेया गेया है, ते जिस्जो भी मैं चाए तिस्जो देई सकदा,

⁷ इधेरे तांइ जे तू मेरी भक्ति करगा तां ए सब किच्‍छ तेरा होई जाणा।

⁸ यीशु ने शैतान जो जवाब दित्तेया, पवित्रशास्त्र बिच ए लिख्खे रा है, तू प्रभु अपणे परमेश्वर री ही भक्ति करेयां, ते सिर्फ तिन्हेरी ही सेवा करेयां।

⁹ तां फिरी शैतान ने तिन्हा जो यरुशलेम बिच लेई गेया अते तिन्हा जो मन्दिर री चोटी पर खड़ा करी के बोलणा लगेया, जे तू परमेश्वर रा पुत्तर है, तां इत्ते का छाल मार।

¹⁰ किजोकी पवित्रशास्त्र अन्दर तेरे बारे लिख्खे रा है, परमेश्वर ने अपणे स्वर्गदूतां जो हुकम देई करी तिज्जो बचाई लैणा।

¹¹ अते तिन्हा तिज्जो अपणे हत्थां पर चुक्की करी छुड़कणे का बचाई लैणा, इय्यां नी होणा कि तेरा पैरा जो पत्थर कने लग्गी जाओ।

¹² यीशु ने तिसजो जवाब दित्तेया, पवित्रशास्त्र अन्दर ए भी लिख्खे रा है, तू अपणे प्रभु-परमेश्वर जो कदी मत परखदा।

¹³ जां शैतान तिन्हेरे जो परखणे तांइ पूरी कोसीस करी बैठ्ठेया, तां से अगले मौके तांइ यीशु जो छड्डी करी चली गेया।

गलील प्रदेश बिच यीशु री सेवकाई

¹⁴ फिरी यीशु पवित्रात्मा री ताकत कने भरी करी गलील प्रदेश जो चली गे ते तिन्हेरे कम्मां री खप्प गलील, ते अख्खी-बख्खी रे सबणी देसां अन्दर होणा लग्गी।

यीशु री सेवकाई री सुरुआत

¹⁵ ते से यहूदी मणूआं री सभास्थल अन्दर उपदेस दिन्दे रे अते सब जणे तिन्हेरी बड़ाई करदे थिये।

नासरत कस्बे बिच यीशु री बेज्जती

¹⁶ फिरी से नासरत रे कस्बे जो हटी आई, जित्ते तिन्हेरा बचपन बित्तेया थिया, ते से हर वरी सांई विश्राम दिन सभास्थल बिच गे, ते जां से पवित्रशास्त्र पढ़ने तांइ खड़े होये

¹⁷ तां तिन्हा जो यशायाह भविष्यद्वक्ता री कताब दित्ती गई, ते तिन्हा ने से कताब खोल्ली करी तिस जगाह् बिच का पढ़ेया, जित्ते ए लिख्खे रा थिया:

¹⁸ “प्रभु रा आत्‍मा मेरे अन्दर है, किजोकी तिन्हा ने मेरा अभिषेक कित्ते रा है कि मैं गरीब मणूआं जो परमेश्वर रे राज रे सुब बसेख जो सूणां, ते परमेश्वर ने मेरे जो गुलाम मणूआं जो ए बोलणे तांइ भेज्जेया कि से अजाद हिन, ते अन्नेयां जो रौसनी दैणे तांइ भेज्जे रा है, अते दुख-तकलिफां अन्दर फसे रे लोक्कां जो छुटकारा दैणे,

¹⁹ अते लोक्कां जो ए दसणे तांइ भेज्जे रा है कि परमेश्वर ने तिन्हा पर दया कित्ते री है।”

²⁰ फिरी तिन्हा ने से कताब बन्द कित्ती ते तित्ते कम्म करणे वाले सेवक रे हत्थां देई करी थल्ले बेई गे, ते सभास्थल बिच सबणी मणूआं री हाख्खियां यीशु पर टिकी रेई।

²¹ अते फिरी यीशु ने तिन्हा जो बोल्लेया, अज्ज तुसा रे सूणदे ही पवित्रशास्त्र रा ए वचन पूरा होई गेया।

²² जितणे भी मणू तित्ते थिये, तिन्हा सबणी ने तिन्हेरी बड़ाई कित्ती, ते यीशु रे मुँह का मणूआं री भलाई तांइ निकलेरी गल्लां सुणी करी, तित्ते आये रे सब मणू हैरान होई गे ते अप्पु-मिते बोलणा लगे, कै ए यूसुफ रा पुत्तर नी है?

²³ फिरी यीशु ने तिन्हा जो बोल्लेया, तुसा ने मेरे बारे अन्दर ए कहावत तां जरुर बोल्णी, ओ वैद्दा, पैल्ले अप्पु जो तां खरा करी लै ते जे किच्‍छ असा ने तेरे बारे अन्दर सुणे रा है, कि तैं कफरनहूम कस्बे अन्दर बड़े चमत्कार कित्ते रे हिन, से सब किच्‍छ अवे अपणे देस अन्दर भी कर

²⁴ यीशु ने बोल्लेया, मैं सच बोलदा, कुसकी भी भविष्यद्वक्ता री अपणे देस अन्दर कदर नी हुंदी।

²⁵ ते ए भी सुणी लेयो कि एलिय्याह नबी रे दिनां अन्दर साड्डे त्रै साल तांइ आसमान का बरखा नी होई, होर-तां-होर, पूरे देस अन्दर बड़ा अकाल पेया थिया ते इस्राएल अन्दर मती सारी विधवा जनानियां थिया जिन्हा जो मदत री बड़ी जरुरत थी

²⁶ पर एलिय्याह जो सैदा जिले रे नेड़े सारपत ग्रां अन्दर इक्क विधवा का छडडी करी, कुसकी होर विधवा का नी भेज्जेया गेया, जे कि गैर यहूदी थी,

²⁷ या एलीशा भविष्यद्वक्ता रे बेल्ले बिच इस्राएल देस अन्दर बड़े कोढ़ी थिये पर तिन्हा बिच का सीरिया रे रैह्णे वाले नामान नां रा कोढ़ी जे गैर यहूदी थिया, तिसजो छड्डी करी होर कुसकी जो ठीक नी कित्तेया गेया।

²⁸ ए गल्लां सुणी करी जितणे भी मणू सभास्थल अन्दर थिये, तिन्हा सब जणेया जो बड़ा गुस्सा आया,

²⁹ ते तिस्सी बेल्ले से खड़े होये ते यीशु जो पकड़ी करी सहर का बाहर लेई गे ते पहाड़ का थल्ले सुटणे री कोसीस कित्ती।

³⁰ पर से तिन्हेरे मझाटे का निकली करी चली गे

³¹ फिरी यीशु गलील रे कफरनहूम कस्बे जो गे अते विश्राम दिन पर मणूआं जो उपदेस देया करदे थिये।

दुष्टात्मा रे सताए रे मणू रा ठीक होणा

³² अते मणू तिन्हेरी गल्लां सुणी करी हैरान होई गे, किजोकी से अपणी गल्लां हक कने बोल्दे थिये

³³ तिस्सी रोज्जे सभास्थल अन्दर इक्क इदेया मणू थिया जिस अन्दर दुष्टात्मा थी

³⁴ से मणू जोरे-जोरे चिन्ड्डा मारणा लगेया, ओ नासरत कस्बे रे यीशु, तुसा रा असा कने कै लैणा-दैणा है? कै तुसा असा जो इत्ते मारणे तांइ आये रे हिन? मिन्जो पता है कि तुसा कुण हिन? तुसा परमेश्वर रे भेज्जे रे पवित्र-जन हिन

³⁵ यीशु ने तिसजो झिड़की करी बोल्लेया, चुप रेह, अते इस बिच का निकली जा तां से दुष्टात्मा तिसजो पखोड़ी करी, बगैर कोई तकलीफ दित्ते रे तिस बिच का निकली गई

³⁶ ए दिख्खी करी सब हैरान होई गे ते से अप्पु-मिते बोलणा लगे, ए कदेह्या वचन है? किजोकी ए हक अते ताकत कने दुष्टात्मा जो हुकम देया करदे हिन ते से इन्हेरे बोलणे पर निकली भी जान्दी हिन

³⁷ इन्हा गल्लां कने यीशु रे कम्मां री खप्प आग्ग सांई हर जगाह् फैल्ली गई

³⁸ तिस रोज्जे यीशु सभास्थल का निकली करी शमौन रे घरे जो गे शमौन री सस्सू जो बड़ा ताप थिया, अते तिन्हा ने यीशु रे छंदे कित्ते, तुसा इसजो खरा करी देयो।

पतरस री सस्सू ते होर लोक्कां जो ठीक करणा

³⁹ यीशु शमौन री सस्सू का गे ते खड़े होई करी, ताप जो झिड़केया ते शमौन री सस्सू रा ताप तिस्सी बेल्ले उतरी गेया ते से फटाफट उठ्ठी करी तिन्हेरी खात्तर-दारी करणा लग्गी पेई

⁴⁰ संझा बेल्ले, जिन्हेरे-जिन्हेरे घरां अन्दर मणू नेक-बनेके तरिक्के री बमारियाँ का परेशान थिये, से तिन्हा सबणी जो यीशु का लेई आये ते कन्ने ही ओ मणू भी थिये जिन्हा अन्दर दुष्टात्मा थिया यीशु ने इक्क-इक्क पर अपणा हत्थ रखेया, ते से तिस्सी बेल्ले ठीक होई गे

⁴¹ ते दुष्टात्मा भी चिन्ड्डां मारदे अते ए बोल्दे मते मणूआं बिच का निकली गेईयां, तू परमेश्वर रा पुत्तर है! पर यीशु तिन्हा जो झिड़कदे थिये ते बोलणे नी दिन्दे थिये, किजोकी से जाणदी थिया कि से मसीह यीशु हिन

⁴² अगले रोज्जे, भ्यागा यीशु तित्ते का निकली करी सुनसान जगाह् जो चली गे ते तित्ते प्रार्थना करणा लग्गी पे ते मणूआं ने तिन्हेरी तोप पाई दित्ती, ते तोपदे-तोपदे तित्ते ही जाई रे जित्ते यीशु थिये, अते से तिन्हेरे का जाई करी तिन्हेरे छंदे करणा लगे, कि असा जो छड्डी करी मत जाओ।

गलील बिच प्रचार करणा

⁴³ पर यीशु ने तिन्हा जो बोल्लेया, मेरे जो होर सहरां अन्दर भी जाई करी परमेश्वर रे राज करणे री सुब बसेख दैणा जरुरी है किजोकी मेरे जो इस्सी मकसद कने भेजेया गे रा है

⁴⁴ अते यीशु मणूआं जो परमेश्वर रे राज करणे रा सुब बसेख गलील री बखरी-बखरी जगाह् बिच जाई करी तित्ते री सभास्थल अन्दर सुणादे रे।