लूका 17 - चम्बयाली नौआ नियम

ठोक्कर लगणे री वजह बणना

¹ यीशु ने अपणे चेल्‍लेयां जो बोल्लया, जिन्हा गल्लां कने मणूआं जो ठोकर लगदी से गल्लां तां होणी ही हिन, पर लाणत है तिस मणू पर जिसेरी वजह कने से ठोकर आन्दी

² तिसेरे तांइ ए जादा खरा हुन्दा कि बजाय इसेरे कि से इन छोटे मणूआं बिच का कुसकी जो पाप करणे पर मजबूर करी सकें, तिसेरे गले पर चक्की रा पाट लटकाई करी तिसजो समुन्द्र बिच सूटी दित्तेया जान्दा

³ इस गल्ल रा ध्यान रख्खो, कि तेरा संगी विश्वासी पाप करे तां तिसजो समझा, जे से अपणी गलती मन्दा तां तिसजो माफ कर।

⁴ अगर जे कोई इक्क रोज बिच सत्त वरी तेरे कने बुरा करदा, अते सत्त वरी ही तेरे का आई करी बोल्ले कि मेरे जो बड़ा मोह् होया करदा है अपणी गलती रा, तां तिसजो सत्तो वरी माफ कर

⁵ तां यीशु रे बारा प्रेरितां ने बोल्लेया, प्रभु जी, असा जो विश्वास बिच मजबूत बणाओ।

विश्वास

⁶ प्रभु यीशु ने तिन्हा जो बोल्लेया, जे तुसा रा विश्वास सरेयाँ रे दाणे रे बराबर भी हुंदा, तां तुसा इस शहतुत रे बूट्टे जो बोल्ल गे, कि तू जड़ा का बुट्टि करी समुन्द्रा बिच लग्गी जा, तां तिन्ने तुसा री मन्नी लैणी थी।

इक्क दास रा फर्ज

⁷ जे अगर तुसा रा नौक्कर हल बाई करी या भेड़ा जो चराई करी आए, तां तिसेरे मालक जो तिसजो रोट्टी खाणे तांइ बोलणा चाएदा।

⁸ पर से तिसेरे बजाए, कै ए नी बोल्गा, कि मेरे तांइ रोट्टी तैयार कर, ते जां तांइ मैं रोट्टी खाई नी लिन्दा तां तांइ कमर कसी करी मेरी सेवा कर अते जां मैं रोट्टी खाई लिन्गा तां तिसेरे बाद तू भी खाई लेयां?

⁹ तुसा अपणे नौक्कर रा से सारे कम्म करणे तांइ जे तुसा तिसजो दित्ते थिये, शुक्रिया नी करणा!

¹⁰ इय्यां ही जां तुसा परमेश्वर रे कम्म जो पूरा करी री बैंदे, तां तुसा ए बोल्लेयो कि असी तां तारिफ लायक नी हिन किजोकी असा ने से ही कित्तेया जे असा जो करणा चाएदा थिया।

दस कोढ़ रे मरीजाँ जो ठीक करणा

¹¹ इक्क रोज इय्यां होया कि यीशु ते तिन्हेरे चेल्‍ले यरुशलेम सहर जो जान्दे बेल्ले गलील प्रदेश अते सामरिया प्रदेश री सीमा रे बिच का होई करी जाया करदे थिये।

¹² कुसकी ग्रां बिच बड़दे बेल्ले यीशु जो दस्स कोढ़ियां कने मिल्ले,

¹³ अते तिन्हा ने यीशु जो जोर सणे हक्क लाई अते बोल्लेया, ओ यीशु, ओ मालक, असा पर दया करो!

¹⁴ यीशु ने तिन्हा जो दिख्खेया अते बोल्लेया, कि अपणे आप जो पुरोत्तां जो दिख्खाओ। जां से यीशु री गल्ल मन्नी करी वापिस हटेया करदे थिये तां से रस्ते बिच ही कोढ सुच्चे होई गे।

¹⁵ तिन्हा दस्स कोढ़ियां बिच का इक्क ने दिख्खेया कि मैं खरा होई गेया तां से परमेश्वर री बड़ाई करदे करदे यीशु का आया,

¹⁶ अते तिन्हेरे पैरा पर मूह् रे भारे पेया ते तिन्हेरा शुकर करणे लग्गेया कने से इक्क सामरिया प्रदेश रा मणू थिया।

¹⁷ यीशु ने तिसजो पूच्छेया, कै मैं दस्स जणेया जो सुच्चा नी कित्ता, फिरी से बाक्की नौ कुदे हिन?

¹⁸ कै परमेश्वर री बड़ाई करणे तांइ इस परदेसी जो छडी, होर कोई नी आया?

¹⁹ यीशु ने तिसजो बोल्लेया, उठ अते जा, तेरे विश्वास करणे री वजह कने तू कोढ का ठीक होई गेया।

परमेश्वर रे राज रा आणा

²⁰ जां फरीसियां ने यीशु का पूच्छेया, कि परमेश्वर ने राज करणे तांइ कधाड़ी आणा, तां तिन्हा ने जवाब दित्ता, परमेश्वर रा राज तुसा रे हिसाब कने लिब्बणे वाली निशानियां कने नी आणा

²¹ अते मणूआं ने ए नी बोल्णा, कि दिख्खो, इत्ते है, या उत्ते है किजोकी, परमेश्वर रा राज तुसा रे बिच् है

²² फिरी यीशु ने चेल्‍लेयां जो दस्सेया, कि से रोज आणे, जां मणू रे पुत्तर, जे मैं ही है राज करणा तां तुसा तिस रोज जो दिख्खणे तांइ तरसी जाणा, पर दिख्खी नी पाणा।

²³ मणूआं ने तुसा जो बोलणा कि मणू रा पुत्तर, जे मैं ही है राज करणे तांइ आई गे रा है। मते जणेया ने बोलणा कि मसीह से इत्ते है, या मसीह उत्ते है, पर मैं तुसा जो बोल्दा, कि तुसा तिसेरे पीच्छे मत चली जान्दे, या तिन्हा गल्लां पर विश्वास मत करी बैन्दे।

²⁴ जिय्यां आसमान बिच बिजली इक्क कुणे का दूए कुणे तक लसकदी, तिस ही तरिक्के कने मणू रे पुत्तर, जे मैं ही है अपणे समय बिच ही प्रकट होणा।

²⁵ पर ए सब गल्लां होणे का पैल्ले ए जरुरी है कि मणू रा पुत्तर, जे मैं ही है जो बड़े दुख सैह्णे पैणे अते इस जुग दे मणूआं ने मेरे जो तुच्छ समझणा,

²⁶ मणू रा पुत्तर, जे मैं ही है रे राज करणे रे बेल्ले बिच भी ओई होणा, जेड़ा नूह रे बेल्ले होया थिया,

²⁷ किजोकी नूह रे जहाज पर चढ़ने का पैल्ले तांइ भी ब्याह हुदें थिये, अते धाम्माँ बिच खाणा-पीणा, हुन्दा थिया अते इक्क रोज इदेया हड़ आया कि तित्ते सब किच्‍छ तैहस-नैहस होई गेया

²⁸ अते तिय्यां ही जां लूत सदोम सहर बिच रेया करदा थिया तां तित्ते रे मणू भी खान्दे-पिन्दे अते काम्म-धन्दे बिच लैण-दैण करदे रैहन्दे थिये, अते खेती-बाड़ी अते घर-बार बणाणे बिच लग्गी रैह्‍न्दे थिये

²⁹ पर इक्क रोज जां लूत सदोम सहर का चली गेया अते तिसेरे जाणे का बाद तिस सहर रे लोक्कां पर आग्ग अते गन्धक आसमान का बरसी पेई अते तित्ते सब किच्‍छ तबाह् होई गेया

³⁰ तिस दिन भी इदेया ही होणा जां मणू रे पुत्तर, जे मैं ही है, चाणचक्के ही वापिस हटणा।

³¹ उस रोज जे मणू अपणे घरे री छत्ती पर हो अते से अपणा समान लैणे जो थल्ले ना उतरो अते तिय्यां ही जे अपणे खेत्रां अन्दर होण से अपणे घरां जो ना हटन

³² लूत री लाड़ी जो चेत्ता करो, कि उस कने कै होया थिया?

³³ जिस कुसकी ने अपणी जान बचाणे री कोसीस करणी तिसने तिसजो गवाई दैणा ते जिस ने तिसजो दाव पर लाणा तिसने अपणी जान बचाई लैणी।

³⁴ मैं तुसा जो बोल्दा, कि तधाड़ी राती दो मणू इक्क मन्जे पर सुत्ते रे होणे अते इक्क अपणे कने लेई जाणा अते दुज्जा छड्डी दित्ता जाणा

³⁵ तधाड़ी दो जनानियां आट्टा पिह्न्दी होणी अते इक्क अपणे कन्ने लेई जाणी अते दुई छड्डी दित्ती जाणी

³⁶ तधाड़ी दो जणे खेत्रा बिच हुन्गे, इक्क लेई लिता जाणा ते दुजा तित्ते ही रेई जाणा

³⁷ ए सुणी करी चेल्‍लेयां ने पुछेया कि, ओ प्रभु ऐसा कुस जगाह् हुणा? यीशु ने तिन्हा जो जवाब दित्तेया, सारे लोक्कां जो ए इय्यां पता लग्गी जाणा कि ए कुते होणा जिय्यां कि इल्लणां रे कठीणे पर लास रा पता चलदा।