याकूब 1 - चम्बयाली नौआ नियमनमस्ते 1 मैं याकूब परमेश्वर रा ते मसीह यीशु रा दास, तिन्हा बारा गोत्तर रे यहूदी विश्वासियां जो ए चीठ्ठी लिखदा ते नमस्ते करदा जे दुनिया रे अलग-अलग जगाह् बिच बिखरे रे हिन। विश्वास अते ज्ञान री जिन्दगी विश्वास ते समजदारी 2 ओ मेरे संगी विश्वासियों, अपणे परखे जाणे जो तुसा खुसी री गल्ल मन्नों, 3 किजोकी तुसा जाणदे तुसा रे विश्वास रे परखे जाणे कने तुसा रा सबर बदधा। 4 तुसा जो हर परिक्षा बिच सबर रखणा सिखणा चाएदा, ताकि तुसा आत्मिक रुप कने परिपक्व ते सिद्व होई जाओ ते अग्गे जो तुसा रे स्वभाव बिच कुसकी गल्ल री घटी ना रे। 5 पर अगर तुसा बिच का कुसकी जो समझ री कमी हो, तां से परमेश्वर का मगें, जे खुले दिल कने गलतियां कड्डे बगैर दिंदे भी; ते तिन्हा ने तुसा जो समझ दैणी। 6 पर तुसा विश्वास कने मंगो, ते कोई शक ना करो; किजोकी शक करणे वाला मणू समुद्र री लहर सांई अणटिक है जे ब्यार कने चलदी ते छलारां खादीं। 7 शक करणे वाला मणू ए ना समजे कि तिसेरी मंगे री कोई भी गल्ल प्रभु ने तिसजो दैणी, 8 से मणू दोगला है, ते अपणी कुसकी भी गल्ल पर नी टिकदा। अमीर ते गरीब 9 जे विश्वासी मणू गरीब हिन, से इस गल्ल पर खुस होण कि परमेश्वर ने तिन्हा जो आदर दित्ते रा है। 10 ते जे विश्वासी मणू अमीर हिन, अप्पु जो निम्मता करण, किजोकि इक्क दिन तिन्हा ने घा रे फूल्ल सांई मिट्टी जाणा। 11 जिय्यां सूरज उगदे कने ही कड़ी धूप्प पैंदी ते घा जो सुखाई दिंदी, ते तिसेरा फूल्ल झड़ी जादां, ते तिसेरी खूबसुरती मिटी जांदी; तिय्यां ही अमीर मणू ने अपणे कम्मां जो करणे बिच ही मुकी जाणा। परमेश्वर कुसकी जो नी परखदा 12 धन्न है से मणू, जे परखे जाणे रे बेल्ले टिकी रैहन्दा; किजोकी खरा साबित होणे पर तिसजो हमेसा री जिन्दगी रा से मुकट मिलणा, जिस जो दैणे रा वादा परमेश्वर ने तिन्हा लोक्कां कने कित्ते रा है जे परमेश्वर कने कित्ते रा है। 13 जां कोई मणू बुराई करणे तांइ उकसाया जाए तां से ए ना बोल्ले कि परमेश्वर मेरे जो उकसाया करदे हिन; किजोकी परमेश्वर जो गलत कम्म करणे तांइ उकसाया नी जांदा ते ना ही से अप्पु ही कुसकी जो गलत कम्म करणे तांइ उकसांदे। 14 पर हर इक्क मणू अपणी ही बुरे कम्म करणे री इच्छा बिच फसी करी परखेया जांदा। 15 फिरी जां बुरे कम्म करणे री इच्छा बदधी तां मणू पाप करदे; ते जां मणू पाप करदे तां तिसेरा नतीज्जा हमेसा री मौत हुंदा। 16 ओ मेरे प्यारे संगी विश्वासियों, धोखा मत खांदे। 17 किजोकी हर इक्क बदिया वरदान ते उत्तम दान परमेश्वर रे पास्से का ही हुदां, ते अम्बरे रे चाँद-तारेयां जो बणाणे वाले पिता परमेश्वर रे पास्से का मिलदा जे हमेसा इक्क जदेय रैहन्दे ते कदी भी नी बदलदे। 18 तिन्हा ने अपणी ही मर्जी कने असा जो सच्चाई रे वचन रे जरिए असा जो अपणी औलाद बणाया, ताकि असी तिन्हेरे बणाए री सृष्टि रे पैल्ले फल्ल सांई सृष्टि रे सबका खास हिस्सा बणन। परमेश्वर रे बसेख जो सुणना अते चलणा सुनणा ते तिस पर चलणा 19 ओ मेरे प्यारे संगी विश्वासियों, तुसा ए गल्ल जाणी लेयो, हर इक्क मणू सुनणे तांइ हमेसा तयार, सबर कने बोलणे वाला ते अपणे गुस्से जो काबू बिच रखणे वाला हो 20 किजोकी कोई मणू गुस्से बिच हो तां से धार्मिकता रे कम्मां जो नी करी सकदा जे परमेश्वर तिसका चाहन्दा। 21 इधेरे तांइ सारी गन्दगी ते नफरत जो छड्डी करी परमेश्वर रे वचन जो निमते मन कने अपणाई लेयो जे दिल बिच बोया गे रा है ते जे तुसा जो छुटकारा देई सकदा। 22 ते सिर्फ परमेश्वर रे वचन जो सुनणे वाले मत बणो जे अप्पु जो ही धोखा दिदें, पर तिसजो मनणे वाले भी बणो। 23 किजोकी जे कोई परमेश्वर रे वचन जो सूणदा पर तिसजो मनदा नी, से इदेय मणू सांई है जिनिये अपणा मुँह सीसा बिच दिख्खेया 24 ते अप्पु जो दिखणे का बाद तिस्सी बेल्ले भुल्ली जांदा कि से कदेया दिसदा। 25 पर जे मणू तिस व्यवस्था पर ध्यान करदा रैहन्दा जे अजादी दिंदी, तिस मणू जो अपणे कम्मां बिच इधेरे तांइ आशीष मिलणी किजोकी से सुणी करी भूलदा नी, पर तिसजो पूरे मन कने मनदा। 26 जे अगर कोई अप्पु जो परमेश्वर रे भक्त समजे, ते अपणी जिब्ब पर लगाम ना लाए, अपणे दिल जो धोखा दे, तां तिसेरी भक्ति फिजुल है। 27 असा रे परमेश्वर पिता री नजर बिच सच्ची ते सुच्ची भक्ति ए है कि अनाथ ते विधवा रे दुख बिच तिन्हेरा ख्याल रखणा, ते अप्पु दुनिया रे बुरे कम्मां का दुर रैह्ण जे तुसा जो बिगाड़दे। |
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.