इब्रानियों 7 - चम्बयाली नौआ नियम

मलिकिसिदिक याजक

^1-3 अवे ए मलिकिसिदक शालेम सहर रा राज्जा, ते परमप्रधान परमेश्वर रा पुरोत्त थिया। तिसेरे नां रा मतलब है, “इंसाफ कने राज करणे वाला राज्जा। ते शालेम रे राज्जा रा मतलब है, ‘सांती रा राज्जा।’ ” पवित्रशास्त्र बिच कुसकी भी जगाह् पर तिसेरे मां-प्यो‍ ते खानदान ते ना ही तिसेरे जीण-मरणे रे बारे बिच लिख्खे रा है। से हमेसा तांइ पुरोत्त ठैहराए गे रा है। इधेरे तांइ से परमेश्वर रे पुत्तर सांई है। जां अब्राहम चार राज्जेयों जो मारी करी हटेया करदा थिया, तां मलिकिसिदक अब्राहम कने मिल्लेया, ते तिन्हा जो आशीष दित्ती। ते अब्राहम ने जे किच्‍छ भी लड़ाई बिच जीत्ती थी, तिन्हेरा दसमां हिस्सा मलिकिसिदक जो दित्तेया।

⁴ अवे सोच्चो कि मलिकिसिदक किन्ना जादा महान होणा, जिस जो असा रे पुरखे अब्राहम ने लड़ाई बिच जित्ते रा बदिया का बदिया समान रा दसमां हिस्सा दित्तेया।

⁵ मूसा रा कानून लेवी रे ‍खानदान रे तिन्हा लोक्कां जो जे पुरोत्त बणदे, अपणे संगी इस्राएलियां का दसमां हिस्सा लैणा सिखांदा। लेवी रे ‍खानदान रे मणू ते बाकि इस्राएली भाई-भैण सांई थिये किजोकी तिन्हेरे सारेयां रा पुरखे अब्राहम है।

⁶ पर मलिकिसिदक, जे लेवी रे ‍खानदान बिच रा भी नी थिया, तिनिये अब्राहम का दसमां हिस्सा लित्तेया। हालांकि परमेश्वर ने अब्राहम कने वादा कित्तेया थिया, तां भी मलिकिसिदक ने अब्राहम जो आशीष दित्ती।

⁷ ते इस गल्ल बिच कोई शक नी है, कि आशीष दैणे वाला, आशीष लैणे वाले मणू का बड्डा हुंदा।

⁸ पुरोत्त दसमां हिस्सा लिंदे, हालांकि से मणू ही हिन, जे जिन्दे ते जिन्हा ने इक्क दिन मरी भी जाणा। पर पवित्रशास्त्र मलिकिसिदक से बारे बिच, जिस जो अब्राहम ने दसमां हिस्सा दित्तेया, ए बोलदा, “से हल्ले भी जिन्दा है।”

^9-10 लेवी मणू जे दसमां हिस्सा इस्राएली लोक्कां का लिंदे, से भी अब्राहम रे ‍खानदान रे हिन। जां अब्राहम मलिकिसिदक कने मिलेया ते तिन्हा जो दसमां हिस्सा दित्तेया तां फिरी असी ए भी बोल्ली सकदे कि लेवी ने भी अब्राहम रे जरिये अब्राहम जो दसमां हिस्सा दित्तेया।

मलिकिसिदक जदेया दुज्जा याजक

¹¹ इस्राएल रे लोक्कां जो मूसा रा कानून, तिन्हा लोक्कां पर हारून रे ‍खानदान रे लेवी गोत्र का पुरोत्त ठैहराणे री रीति पर मिल्लेया थिया, पर से मणू तिस रीति रे बदोलत सिद्व नी बणी सके। इधेरे तांइ तित्ते इक्क दूए पुरोत्त री जरुरत थी जे हारून सांई नी पर मलिकिसिदक सांई हो।

¹² किजोकी जां पुराणे तरिक्के रे पुरोत्त री पदवी बदली गयी, तां मूसा रा कानून रा बदलेया जाणा भी जरुरी है।

¹³ असी ए गल्लां मसीह रे बारे बिच बोल्लेया करदे हिन, जे कुसकी होरसी गोत्तर रे थिये। तिस गोत्तर बिच का कुसकी ने भी इक्क पुरोत्त रे रुप बिच कदी भी वेदी री सेवा नी कित्ती।

¹⁴ सारे मणू जाणदे कि असा रे प्रभु यीशु यहूदा रे गोत्तर बिच पैदा होए, ते मूसा ने कदी भी यहूदा रे ‍खानदान बिच का कुसकी रे भी पुरोत्त बणने रे बारे बिच कदी नी बोल्लेया, ते अज्ज तिकर यहूदा रे ‍खानदान बिच का कोई भी पुरोत्त बणे रा है।

¹⁵ अवे असी होर भी जादा साफ तरिक्के कने समजी सकदे कि मूसा रा कानून ते पुरोत्त अवे असा रे बड्डे पुरोत्त कने बदली दित्ते गेरे हिन, किजोकी अवे जे असा रे बड्डे पुरोत्त आए रे हिन मलिकिसिदक सांई हिन।

¹⁶ यीशु कुसकी गोत्तर रे होणे री वजह कने लेवीयां रे कानून ते नियमां जो पूरा करणे री वजह कने बड्डे पुरोत्त नी बणे,

¹⁷ पर से हमेसा री जिन्दगी री ताकत री वजह कने पुरोत्त बणे, किजोकी तिन्हेरे बारे बिच पवित्रशास्त्र ए गवाई दिंदा, “तू हमेसा-हमेसा तांइ मलिकिसिदक सांई बड्डे पुरोत्त बणी गेरे हिन।”

¹⁸ ते इसी तरिक्के कने कमजोर ते नाकामयाब होणे री वजह कने “मूसा रे कानून” जो बदली दित्तेया गेया।

¹⁹ किजोकी मूसा रा कानून कुसकी जो भी सिद्व नी बणाई सकेया, पर तिस्सी समय पर, असा जो तिसका जादा ठीक आस दित्ती गयी, जे असा जो परमेश्वर रे करीब लै जाई सकदा।

²⁰ ते इसी कने, परमेश्वर ने वाचा बन्नी जां तिन्हा ने मसीह यीशु जो पुरोत्त ठैहराया।

²¹ किजोकी लेवी रे गोत्तर रे मणू ता बगैर परमेश्वर री वादे रे पुरोत्त ठैहराए गे, पर मसीह यीशु परमेश्वर री वाचा कने तिन्हेरे पास्से का चुणे गे। पवित्रशास्त्र बिच तिस बारे बिच ए लिख्खे गे रा है, “मैं परमेश्वर, ने ए वादा कित्ते रा है, ते मैं अपणे फैसले पर पछताणा नी, कि तू हमेसा-हमेसा तांइ पुरोत्त है।”

²² यीशु ही हिन जे इसजो इक्क खरी वाचा बणांदे।

²³ पैल्ले भी इक्क का बाद इक्क, मते सारे पुरोत्त आए, पर से सारे मरी गे ते अपणा कम्म जारी नी रख्खी सके,

²⁴ पर मसीह यीशु रे पुरोत्त होणे रा ए फायदा है कि तिन्हा ने कदी भी नी मरणा, इधेरे तांइ कोई भी मसीह री जगाह् नी लेई सकगा, किजोकी तिन्हा ने हमेसा-हमेसा तांइ पुरोत्त रैह्णा।

²⁵ इधेरे तांइ जे मणू मसीह यीशु रे जरिए परमेश्वर का आंदे, से तिन्हा लोक्कां रा पूरा छुटकारा दिंदे, किजोकी मसीह यीशु तिन्हा लोक्कां तांइ बिचौल्ले रे तौर पर हमेसा प्रार्थना करदे रैहन्दे।

²⁶ इदेया ही प्रधान पुरोत्त असा री जरुरतां जो पूरा करी सकदा, जे पवित्र, बेगुनाह, सुच्चा, पाप करणे वालेयां सांई ना हो ते जिस जो आसमान का भी उच्चा चुक्केया गे रा हो।

²⁷ ते हारून रे ‍खानदान रे प्रधान पुरोत्तां सांई मसीह यीशु जो जरुरत नी है, कि रोज ही पैल्ले अपणे पाप्पां तांइ, ते फिरी लोक्कां रे पाप्पां तांइ बलियां चढाण। किजोकी तिन्हा ने इक्क ही वरी बिच अप्पु जो लोक्कां रे पाप्पां तांइ कुर्बानी चढाई दित्तेया।

²⁸ किजोकी मूसा रा कानून कमजोर लोक्कां जो बड्डा पुरोत्त बणने तांइ चुणदा; पर जे वाचा परमेश्वर ने मूसा रे कानून रे बाद बन्नी थी, तिसने परमेश्वर रे पुत्तर जो प्रधान पुरोत्त ठैहराया, जे असा तांइ हमेसा-हमेसा तांइ सिद्व बड्डे पुरोत्त बणी गेरे हिन।