इब्रानियों 6 - चम्बयाली नौआ नियम

¹ आओ असी मसीही बसेख रे पैल्ली शिक्षां जो छड्डी करी परिपक्व शिक्षां पास्से बधी चलन। असा जो तिन्हा फालतू रे कम्मां का घड़ी-घड़ी तौबा करी के परमेश्वर बिच विश्वास करणे री जरुरत नी है।

² ते असा जो बपतिस्मा, हत्थ रख्खी करी आशीषां दैणा, मुर्देयां रे फिरी जिन्दे होणे रा, ते हमेसा रे इंसाफ री शिक्षा जदेई दुनियावी शिक्षा जो दुबारा सिखणे री जरुरत नी है।

³ ते जे अगर परमेश्वर ने मौक्का दित्तेया, तां असा ने तुसा लोक्कां जो परिपक्व शिक्षा दैणी।

⁴ जे मणू परमेश्वर बिच विश्वास करणा छड्डी दिंदे, तिन्हा लोक्कां जो फिरी दुबारा कदी तौबा करणे री नौबत तिकर नी लाया जाई सकदा। तिन्हा ने इक्क समय पर परमेश्वर का मिलणे वाली सच्चाई जो पैछाणे रा है, ते परमेश्वर का आशीषां भी पाए री हिन, ते दूए विश्वासियां कने पवित्रात्मा भी हासिल कित्तेया।

⁵ तिन्हा जो परमेश्वर रे बसेख रा अच्छा अनुभव मिल्ले रा है, ते तिन्हा ने तिस समय री ताकत रा भी अनुभव कित्ते रा है, जां परमेश्वर ने राज करणा।

⁶ जे अगर से मणू भटकी भी जाण, तां तिन्हा जो तौबा करणे रे रस्ते पर लाणा मुस्किल है, किजोकी से अपणे पास्से का, परमेश्वर रे पुत्तर जो फिरी सुली पर चढांदे, ते सारेयां सामणे तिन्हेरा मजाक बणांदे।

⁷ किजोकी जिन्हा लोक्कां जो ठीक शिक्षा दित्ती जांदी, से तिस जमीन सांई हिन जिस पर बरखा हुंदी रैहन्दी। जे अगर से जमीन ठीक है, तां से तिस पर खेत्ती करणे वालेयां तांइ ठीक पेड़-पौधे उगांदी, ते परमेश्वर तिसजो आशीष दिंदे।

⁸ पर दूए मणू तिस जमीन सांई हिन, जिस पर झिल्ल-झंकाड़ ही उगदे। से जमीन बेकार है। जे मणू तैसी जमीन सांई होणे, तिन्हा पर परमेश्वर ने इल्जाम लाणा, ते तिन्हा जो नरक री आग्ग बिच फुक्की दैणा।

⁹ पर ओ प्यारे लोक्कों, ए चितौणियां तुसा तांइ नी हिन, किजोकी तुसा ठीक कम्म करेया करदे हिन ते परमेश्वर ने तुसा जो पैल्ले ही बचाई लित्ते रा है।

¹⁰ किजोकी परमेश्वर हमेसा इंसाफ ही करदे; तिन्हा ने तुसा रे से कम्म नी भुलणे ते ना तुसा रे तिस प्यार जो भुलणा जे तुसा ने तिन्हेरे लोक्कां री मदद करी के दिखाया। ते तिन्हा ने से भी याद रखणा अब्बे जे तुसा तिन्हेरे लोक्कां री मदद करेया करदे हिन।

^11-12 आलसी मत बणो, पर मेहनती लोक्कां सांई बणो, तुसा जो सबर ते विश्वास कने, परमेश्वर रे वादे जो हासिल करणे री आस बिच, आखरी समय तिकर ए ठीक कम्म करदे रैह्णा चाएदा।

परमेश्वर रा अटूट वादा

¹³ जां परमेश्वर ने अब्राहम कने वादा कित्ता, तां तिन्हा ने अपणे ही नां री कसम खाई, किजोकी तिन्हा का बड्डा कोई नी थिया, जिसेरा नां लेई करी परमेश्वर कसम खाई करी बोल्लेया,

¹⁴ “कि मैं हकीकत बिच तिज्जो बड़ी जादा आशीष दैणी, ते तेरी औलाद्दां जो बधांदे जाणा।”

¹⁵ ते इस तरिक्के कने अब्राहम ने सबर करी के परमेश्वर रे वादे जो हासिल कित्ता।

¹⁶ जां कोई मणू कसम खांदा, तां से अप्पु का बड्डे रे ही कसम खांदा। इस कने सारे बैह्सबाजी मुकी जांदी।

¹⁷ इधेरे तांइ परमेश्वर ने भी कसम खाई, किजोकी से लोक्कां जो दिखाणा चाह्‍ंदे थिये कि तिन्हा ने जे वादा कित्ते रा है, तिसजो उन्हा ने जरुर पूरा करणा।

¹⁸ इधेरे तांइ परमेश्वर ने असा कने वादा कित्तेया, ते तिन्हा ने असा कने कसम खाई। ए दो गल्लां बदली नी सकदी, किजोकी ए नामुमकिन है कि परमेश्वर झूठ बोल्ले। इधेरे तांइ असी जे तिन्हा का शरण लैणे तांइ, तिन्हा का गेरे हिन, ते जे आस तिन्हा ने असा जो दित्ते री है, तिसजो पाणे तांइ बड़े प्रोत्साहित हिन।

¹⁹ ए आस जे असा का है ते कदी भी टुटी नी सकदी, ते असा जो परमेश्वर का दुर भटकणे नी दिंदी, पर ए असा जो परमेश्वर का मन्दिर बिच, स्वर्ग अंदर, सबका जादा पवित्र जगाह् पर पुजांदा।

²⁰ यीशु मसीह असा का पैल्ले स्वर्ग बिच असा तांइ गे। से हमेसा-हमेसा तांइ मलिकिसिदक सांई प्रधान पुरोत्त बणी गेरे हिन।