इब्रानियों 13 - चम्बयाली नौआ नियम

मसीह जिन्दगी जीणे रे बारे बताणा

¹ भाईचारे रे रा प्यार बणी रे।

² जिन्हा भी विश्वासियां कने तुसा पैल्ले ना मिल्ले रे होण, तिन्हा जो अपणे घर मेहमान बणाई करी तिन्हेरी सेवा पाणी करणा मत भूलदे। किजोकी इय्यां ही जाणे-अजनाणे बिच लोक्कां ने स्वर्गदूतां री भी मेहमान-नवाज़ी कित्ते री है।

³ कैदी कने ऐसे पेश आओ कि तिन्हा जो लगे कि जिय्यां तुसा भी तिन्हा कने कैद हिन, ते जिन्हा कने बुरा बर्ताव कित्तेया जांदा, तिन्हा री इदेयी सुधी लेया करो कि जिय्यां तुसा अपणे सरीर बिच तिन्हेरा दर्द महसूस करदे।

⁴ ब्याह जो आदर देयो, ते ब्यात्ते रे आदमी ते औरत जो अप्पु अदंर इक्क-दूए री इज्जत करणा चाएदी, ते तिन्हा जो इक्क-दूए कने भरोसेमंद रैह्णा चाएदा। किजोकी व्यभिचारी ते चरित्रहीन लोक्कां पर परमेश्वर ने इल्जाम लाणा।

⁵ तुसा अपणी जिन्दगी बिच धन-दौलत रा लालच मत रख्खो, ते तुसा का जे है, तिस अन्दर ही खुस रेयो, किजोकी परमेश्वर अप्पु ही बोलदे, “मैं तुसा जो ना तां कदी छडणा ते ना कदी त्यागणा।”

⁶ इधेरे तांइ असी हिम्मत कने बोलदे, “प्रभु मेरा मदतगार है, ते मणू मेरा किच्‍छ भी नी करी सकदा।”

⁷ जे तुसा रे आत्मिक अगुवे थिये, ते जिन्हा ने तुसा जो परमेश्वर रे बारे बिच दस्सेया थिया, तिन्हा जो याद रख्खो; ते सोच्चो कि से किय्यां जिन्दगी जिन्दे थिये, ते फिरी मरे। जदेया विश्वास तिन्हा जो परमेश्वर बिच विश्वास थिया, तैसा ही विश्वास तुसा भी परमेश्वर बिच दिखाओ।

⁸ प्रभु यीशु मसीह अज्ज कल ते हमेसा इक्क ही जदेय हिन, ते से कदी भी नी बदलदे।

⁹ नौई ते बखरी-बखरी शिक्षां रे पीच्छे मत चलदे, जिन्हा ने तुसा जो सही रस्ते का गलत रस्ते पर लेई जाणा। परमेश्वर रा अनुग्रह कने अंदरूनी ताकत पाणा ठीक गल्ल है, ते खाणे-पीणे रे कानूनां जो ना मनणा खरा है, किजोकी जे मणू इन्हा कानूनां जो मनदे, तिन्हा जो इन्हा कने कोई फायदा नी होणा।

¹⁰ अराधना वाले तम्बू रे पुरोत्तां जो वेदी पर चढ़ाए री रोट्टियां जो नी खाणे री इजाज़त नी है।

¹¹ किजोकी पैल्ली वाचा रे हिसाब कने, हर साल जिन्हा जानवरां रा खून, प्रधान पुरोत्त पाप कुर्बानी तांइ सबका जादा पवित्र जगाह् बिच पाप्पां री माफी तांइ चढांदे, ते तिन्हा जानवरां रा सरीर तिन्हा लोक्कां री रैह्णे री जगाह् का दुर फुक्केया जांदा थिया।

¹² इसी वजह कने, यीशु ने भी अपणे ही खून रे जरिए पवित्र करणे तांइ यरुशलेम सहर का बाहर जुल्म सहन कित्ता ते जान दित्ती।

¹³ इधेरे तां, आओ, कुर्बानी चढ़ाणे री रीति-रिवाज्‍जां जो छड्डी करी, यीशु रे नेड़े आओ। ते जिय्यां तिन्हा ने बेज्जती सहन कित्ती, तिय्यां ही असी भी बेज्जती जो सहन करण।

¹⁴ किजोकी ए दुनिया असा रा घर नी है, पर असा आणे वाले सहर री खोज बिच हिन

¹⁵ इधेरे तांइ आओ, असी परमेश्वर री तारीफ करदे होए, हमेसा तिन्हा जो अराधना रा कुर्बानी चढाण।

¹⁶ भलाई रे कम्म करेयो, ते जे तुसा का है, तिसजो जरुरतमंद लोक्कां कने बंडेया करो। किजोकी परमेश्वर इदेय कुर्बानी कने खुस रैहन्दे।

¹⁷ अपणे अगुवे री गल्लां मन्नो, ते तिन्हेरे अधीन रेयो। से हमेसा तुसा तांइ चुकन्ने रैहन्दे, ताकि तुसा भटकी ना जाण। किजोकी तिन्हा जो अपणी सेवकाई रा हिसाब परमेश्वर जो दैणा जरुरी है। इय्यां ही करो, ताकि से अपणे कम्मां बिच र खुस ही होण, ना की दुखी होण, नी ता तुसा जो कोई फायदा नी होणा।

¹⁸ इस तिकर असा तांइ प्रार्थना करदे रेयो। किजोकी असी पक्के तौर पर जाणदे कि असा रा विवेक साफ है, ते असी सारी गल्लां अन्दर परमेश्वर जो आदर दैणा चाह्‍ंदे।

¹⁹ प्रार्थना करणे तांइ मैं तुसा जो होर जादा प्रोत्साहित करदा, ताकि मैं तुसा का तौले आई सकां।

आखरी प्रार्थना अते नमस्ते

²⁰ अवे असा रा सांती दैण वाला परमेश्वर, जिन्हा ने असा रे प्रभु यीशु मसीह जो मुर्देयां बिच का जिन्दा कित्तेया, हमारे जैसी भेड़ां तांइ इक्क पुहाल सांई हिन। तिन्हा ने अपणी जान री कुर्बानी देई करी हमेसा री वाचा जो पक्का कित्तेया।

²¹ ते परमेश्वर प्रभु यीशु मसीह री ताकत कने तुसा बिच से हर इक्क ठीक चीज पैदा करे, जिस कने से खुस हुंदे, जिस कने तिन्हेरी महिमा हमेसा-हमेसा तिकर हुंदी रेयो। आमीन।

²² मेरे संगी विश्वासियों, मैं तुसा का बिनती करदा कि तुसा सबर कने इस बसेख जो सुणो, जे मैं तुसा जो प्रोत्साहित करणे तांइ लिख्खे रा है। किजोकी मैं तुसा जो बड़ी घट शब्दां बिच लिख्खे रा है।

²³ तुसा इस गल्ल जो जाणदे कि तीमुथियुस असा रा विश्वासी भ्याल जेल का छुटी गे रा है, जे अगर से तौले आंदा, तां मैं तिस कने तुसा कने मिलणे जो आणा।

²⁴ अपणे सारे अगुवे जो नमस्ते ते परमेश्वर रे सारे लोक्कां जो नमस्ते बोल्लो। ईतालिया देस बिच रैह्णे वाले विश्वासी लोक्कां रा तुसा जो नमस्कार।

²⁵ तुसा सारे लोक्कां पर परमेश्वर रा अनुग्रह बणेया रे।