गलातियों 1 - चम्बयाली नौआ नियम

इक्क सच्चा प्रेरित ते सच्चा बसेख पौलुस री तरफ का नमस्ते

^1-2 मैं पौलुस, जे इक्क प्रेरित है, गलातिया प्रदेश री कलीसिया जो ए चीठ्ठी लिख्खेया करदा है। ते जिन्ने भी विश्वासी मेरे कन्ने हिन, तिन्हेरे पास्से का तुसा जो नमस्कार। मेरे जो प्रेरित होणे तांइ सद्देया गेया है। पर मेरे जो किच्‍छ लोक्कां री मडंली ने प्रेरित नी बणाया, या कुसकी मणू ने मेरे जो प्रेरित बणने तांइ नी भेज्जेया। ए मसीह यीशु ते पिता परमेश्वर री वजह कने ही होया, जिन्हा ने मसीह यीशु जो मुर्देयां बिच का फिरी जिन्दा कित्तेया थिया।

³ असा रे पिता परमेश्वर, अते प्रभु यीशु मसीह रे पास्से का तुसा जो अनुग्रह अते सांती मिलदी रे।

⁴ असा रे परमेश्वर ते पिता री मर्जी रे हिसाब कने मसीह यीशु ने असा रे पाप्पां तांइ अप्पु जो कुर्बान होणे तांइ देई दित्तेया, ताकि असा जो अज्ज रे इस बुरे दुनिया रे असर का बची रैह्ण।

⁵ तिन्हेरी महिमा हमेसा-हमेसा तांइ हून्दी रे। आमीन। सिर्फ इक्क ही सुब बसेख है।

कोई दूज्जी खुशखबरी नी है

⁶ परमेश्वर पिता ने तुसा जो मसीह यीशु रे अनुग्रह रे जरिये चुणी लित्ते रा है। पर मेरे जो हैरानी हुंदी कि तुसा मणू इतणी तौले कुसकी बखरे सुब बसेख जो मनणा सुरु करी के परमेश्वर का दुर होई गेरे हिन।

⁷ सिर्फ इक्क ही सुब बसेख है, पर किच्‍छ इदेय मणू हिन जे तुसा जो गलत बसेख देई करी भटकाया करदे हिन, ते मसीह यीशु रे सुब बसेख बिच हेर-फेर करणे री कोसीस करेया करदे हिन।

⁸ पर चाये असा हो या कोई स्वर्गदूत, जे कोई असा रे सुणाये रे सुब बसेख का बखरे तरिक्के रा बसेख सूणान्दा, तां परमेश्वर ने तिसजो सजा दैणी।

⁹ जिय्यां असी पैल्ले बोल्ली बैठ्ठे रे हिन, तिय्यां अब्बे भी बोलदा, कि चाये असा हो या कोई स्वर्गदूत, जे कोई असा रे सुणाये रे सुब बसेख का बखरे तरिक्के रा बसेख सूणान्दा, तां परमेश्वर ने तिसजो सजा दैणी।

¹⁰ मैं लोक्कां री नी पर परमेश्वर री सहमती जितणे री कोसीस करेया करदा है। मैं लोक्कां जो खुस करणे री कोसीस नी करेया करदा है, किजोकी जे अगर मणूआं जो खुस करणा मेरा मकसद हुंदा, तां मैं मसीह रा दास नी हुंदा।

परमेश्वर पौलुस जो इक्क प्रेरित रे रुप बिच चुणेया

¹¹ ओ संगी विश्वासियों, मैं तुसा जो जताणा चाह्‍ंदा कि से सुब बसेख जिसेरा उपदेस मैं तुसा जो दित्ती है, से मणूआं री मनघड़ंत गल्ल नी है।

¹² किजोकी मेरे जो से असा रे मणू का नी मिल्लेया, ते कुसकी धर्म गुरु ने मेरे जो इसेरी शिक्षा नी दित्ते री है, पर मेरे जो से यीशु मसीह रे जरिये मिल्लेया, जां से मेरे पर प्रकट होए थिये।

¹³ तुसा जाणदे कि मैं यहूदी नियमां जो किन्ना जादा मनदा थिया, कि मैं मसीह री शिक्षा पर चलणे वालेयां पर बड़ा वरी जुल्म करदा थिया, ते परमेश्वर री कलीसिया जो नास करणे री कोसीस करदा रैहन्दा थिया।

¹⁴ मैं अपणी उमर रे बाकि मणूआं का बदिया यहूदी मणू थिया, ते मैं अपणे पूरखां री परम्परा जो सिखणे ते मनणे बिच हमेसा बड़े जोस बिच हुंदा थिया।

^15-17 पर तां परमेश्वर अपणे पुत्तर जो मेरे पर प्रकट करणे जो खुस होए, ताकि मैं यीशु रे बारे बिच सुब बसेख रा प्रचार करां। परमेश्वर ने ही मेरे जो मेरे पैदा होणे का पैल्ले ही चुणेया, ते अपणे अनुग्रह कने मेरे जो अपणी सेवा करणे तांइ सद्दी लित्तेया। यीशु रे अप्पु जो मेरे पर ज़ाहिर करणे का बाद, ना ता मैं कुसकी का सलाह मंगणे तांइ गेया, ते ना ही मैं यरुशलेम बिच मेरे का पैल्ले वाले प्रेरितां का गेया। पर मैं अरब देस जो गेया, ते बाद बिच तित्ते का दमिश्क सहर जो हटी आया।

¹⁸ फिरी त्रै सालां बाद मैं कैफा जो, जिस जो पतरस भी बोलदे, मिलणे तांइ यरुशलेम जो गेया, अते पन्द्रां रोज्जां तांइ तिन्हा का रेया।

¹⁹ पर मैं इक्क ही प्रेरित कने मिली सकेया, जे प्रभु यीशु रे भ्याल याकूब हिन।

²⁰ परमेश्वर मेरा गवाह है कि जे किच्‍छ मैं तुसा जो लिखदा, तिस बिच किच्‍छ भी झूठ नी है।

²¹ यरुशलेम सहर का निकलणे रे बाद मैं सीरिया अते किलिकिया रे प्रदेशां बिच गेया।

²² पर यहूदियां प्रदेश बिच मसीह यीशु जो मनणे वाली कलीसिया रे लोक्कां ने मेरे जो कदी दिख्खे रा नी थिया,

²³ पर से मणू ए सूणदे रैह्‍न्दे थिये कि जे पैल्ले असा पर जुल्म करदा थिया, से अवे यीशु मसीह रे सुब बसेख रा प्रचार करेया करदा है।

²⁴ अते परमेश्वर ने जे कम्म मेरे तांइ कित्ते रा है तिस वजह कने से परमेश्वर री महिमा करणा लगे।