प्रेरितां रे कम्म 6 - चम्बयाली नौआ नियम

सत्त सेवकां रा चुणेया जाणा

¹ तिन्हा दिनां बिच जां प्रेरितां री गिनती मती बधणा लग्गी, तां यूनानी भाषा बोलणा वाले चेल्‍ले इब्रानी भाषा बोलणे वाले प्रेरितां पर कुड़कुडा़णा लग्गे, कि हर दिन री सेवकाई बिच असा री विधवा जनानियां री खैर-खबर नी लिदें।

² तां तिन्हा बारां चेल्‍लेयां ने विश्वासी लोक्कां री मण्डली जो अपणे का सद्दी करी बोल्लेया, ए ठीक नी कि असी परमेश्वर रा वचन छड्डी करी खिलाणे-पिलाणे री सेवा बिच लग्गी रैह्ण।

³ इस तांइ, ओ भाईयो, अपणे बिच का सत्त ठीक नां वाले मणूआं जो जे पवित्रात्मा ते समजदारी कने भरित्ते रे होण, चुणी लो कि असी तिन्हेरे जो इस कम्म पर ठहराई दैण।

⁴ पर असी तां प्रार्थना बिच ते वचन री सेवकाई बिच लग्गी रैह्णा।

⁵ ए गल्ल सारी मण्डली जो ठीक लग्गी, ते तिन्हा ने स्तिफनुस ना रे इक्क मणू जो जे विश्वास ते पवित्रात्मा कने भरित्ते रा थिया, ते फिलिप्पुस, ते प्रुखुरुस, ते निकाकोर, ते तिमौन, ते परमिनास, ते अन्ताकिया रे रैह्णे वाले निकुलाउस जे यहूदी मत बिच आई गे रा थिया, चुणी लित्ता

⁶ इन्हा जो प्रेरितां सामणे खड़ेरेया ते तिन्हा ने प्रार्थना करी के तिन्हा पर हत्थ रख्खे ताकि से मणू तिस सेवकाई जो करण।

⁷ परमेश्वर रा वचन फैलदा गेया ते यरुशलेम सहर बिच चेल्‍लेयां री गिनती मती बदद्धी गेई ते मते सारे पुरोत्तां ने भी मसीह बिच विश्वास करणे रे इस बसेख जो अपणाया।

स्तिफनुस री गिरफ्तारी

⁸ स्तिफनुस अनुग्रह ते ताकत कने भरी करी लोक्कां बिच बड्डे अनौखे कम्म ते चिन्ह-चमत्कार दिखाया करदा थिया

⁹ तां तिस सभास्थल बिच किच्‍छ मणू जे कुरेनी ते सिकन्दरिया सहर ते किलिकिया ते एशिया रे प्रदेश बिच का थिये ते “दास्तव मुक्त” समुह रे कहलांदे थिये, से मणू स्तिफनुस कने बैह्स करणा लग्गे।

¹⁰ से मणू तिन्हा गल्लां रा जवाब नी देई सके जे स्तिफनुस बोल्लेया करदा थिया किजोकी पवित्रात्मा ने तिसजो समजदारी कने जवाब दैणे री ताकत दित्ती थी।

¹¹ इस पर “दास्तव मुक्त” समुह रे लोक्कां ने दूए होर लोक्कां जो स्तिफनुस रे खिलाफ झूठ बोलणे तांइ उकसाया, “से मणू बोलणा लग्गे, असी इसजो मूसा ते परमेश्वर री बेजती करदे सुणे रा है।”

¹² ते “दास्तव मुक्त” समुह रे लोक्कां ने दूए लोक्कां जो ते बुजुर्ग लोक्कां ते शास्त्रियां जो भड़काया ते तिन्हा ने स्तिफनुस जो पकड़ेया ते सभास्थल बिच लेई आए।

¹³ ते झूठ्ठे गवाह खड़े कित्ते, जिन्हा ने स्तिफनुस पर इल्जाम लाया, “ए मणू इस पवित्र जगाह् ते मूसा रे कानून रे विरोध बिच बोलदा रैहन्दा।”

¹⁴ किजोकी असी तिसजो ए बोलदे सुणे रा है कि ए ही नासरत कस्बे रे यीशु, ने इस मन्दिर जो ढाह्ई दैणा, ते तिन्हा रीतियां जो बदली दैणा जे मूसा ने असा जो सौंपी री हिन।

¹⁵ तां सारे लोक्कां ने जे सभा बिच बैठ्ठे रे थिये, तिस पर नजरां टिकाई ते तिसेरा मुँह स्वर्गदूत सांई रौसनी कने चमकेया करदा थिया।