प्रेरितां रे कम्म 28 - चम्बयाली नौआ नियम

माल्टा द्वीप बिच पौलुस

¹ जां असी बची करी किनारे पर पूजी गे तां असा जो पता लग्गेया कि इस टापू रा नां माल्टा है।

² तिस टापू पर रैह्णे वाले लोक्कां ने असा कने बड़ा प्यार कित्तेया किजोकी तित्ते बड़ी बरखा ते ठण्ड थी, इधेरे तांइ तिन्हा ने आग्ग बाली करी असा सबणी जणेया जो रुकाई लित्ता।

³ जां पौलुस ने लकड़ियां रा ढ़ेर कठेरी करी आग्ग पराल्ले रख्खेया, तां इक्क कीड़े जो सेक लगणे री वजह कने से तिन्हा लकड़ियां बिच का निकली करी पौलुस रे हत्थां कने लिपटी गेया।

⁴ जिस बेल्ले तित्ते रे रैह्णे वाले लोक्कां ने तिसेरे हत्था कीड़ा लिपटित्तेरा दिख्खेया, तां से अप्पु-मिते बोलणा लगे, सच्ची ए मणू खून्नी है किजोकी अगर समुन्द्र का बची गेया, तां भी असा री न्याय री देवी ने इसजो जिन्दा नी रैह्णा दित्तेया।

⁵ तां तिनिये कीड़े जो आग्ग अन्दर ठुड़की दित्तेया, ते पौलुस जो कोई नुक्सान नी होया।

⁶ पर से मणू भालदे थिये कि तिसेरा हत्थ सूजी जाणा या तिनिये चाणचक्के ही मरी करी छुड़की पैणा, पर जिस बेल्ले से बड़ी देर तांइ दिखदे रे अते दिख्खेया कि तिसेरा तां किच्‍छ भी नी बिगड़ेया, तां अपणी सोच बदली करी बोलणा लगे, ए तां कोई देवता है

⁷ तिस जगाह् रे अरे-परे तिस टापू रे प्रधान पुबलियुस री जमीन थी तिनिये असा जो अपणे घरे लेई जाई करी त्रै रोज्जां तांइ बड़े प्यार कने देखभाल कित्ती।

⁸ पुबलियुस रा प्यो बुखार अते आँव-लहू कने बिमार पे रा थिया इधेरे तांइ पौलुस ने तिसेरे कमरे अन्दर जाई करी प्रार्थना कित्ती ते तिस पर हत्थ रख्खी तिसजो खरा करी दित्तेया।

⁹ जां इय्यां होया तां, तिस टापू रे होर भी बिमार मणू पौलुस का आये ते ठीक कित्ते।

¹⁰ तिन्हा ने असा री बड़ा आदर कित्ता, ते त्रै महिन्ने बाद जिस बेल्ले असी चलणा लगे तां जे किच्‍छ भी असा तांइ जरुरी थिया, जहाज पर रख्खी दित्तेया।

माल्टा द्वीप का रोम रे पास्से

¹¹ त्रै महिन्ने बाद असी सिकन्दरिया सहर रे इक्क जहाज पर निकली गे, जे तिस टापू पर सर्दियां तांइ रुके रा थिया अते जिसेरी निशानी दियुसकूरी नां रा इक्क देवते रा जोड़ा थिया।

¹² सुरकूसा सहर अन्दर लंगर पाई करी असी त्रै रोज्जां तांइ टिकी रे।

¹³ तित्ते का असी घुम्मी करी रेगियुम अन्दर आये ते इक्क दिन बाद दक्षिण री ब्यार चली, तां असी दूए रोज्जे पुतियुली सहर अन्दर आये।

¹⁴ तित्ते असा जो किच्‍छ विश्वासी मिल्ले, ते तिन्हेरे बोलणे पर असी तिन्हा का सत्त रोज्जां तांइ रे अते इस तरिक्के कने असी रोम सहर जो चली पये।

¹⁵ रोम रे विश्वासी असा री आणे री खबर सुणी करी अप्पियुस रे बजार नां रे कस्बे ते तीन्न-सराए नां रे कस्बे तिकर असा कने मिलणे जो निकली आये, जिन्हा जो दिख्खी करी पौलुस ने होंसला बन्नेया ते परमेश्वर रा शुक्रिया कित्तेया।

¹⁶ जिस बेल्ले असी रोम सहर पूज्जे, तां पौलुस जो इक्क सैनिक रे कन्ने जे तिसेरी दिख-रिख्ख करदा थिया, किल्ले रैह्णे रा हुकम मिली गेया।

रोम बिच पौलुस

¹⁷ त्रै रोज्जां बाद तिनिये यहूदी अधिकारियां जो सदवाया, ते जां से कठ्ठी गे तां तिन्हा जो बोल्लेया, ओ संगी विश्वासियों, मैं अपणे लोक्कां रे या पूरखां रे बर्ताव रे खिलाफ किच्‍छ भी नी कित्तेया, तां भी कैदी बणाई करी यरुशलेम सहर का रोमी अधिकारियां रे हत्था सौंपेया गेया।

¹⁸ तिन्हा ने मेरे जो परखी करी छड्डी दैणा चाह्या, किजोकी मेरे अन्दर इदेय कोई भी गलती नी थी कि मेरे जो मारी दित्तेया जाओ

¹⁹ पर जां यहूदी इसेरे खिलाफ बोलणा लगे, तां मेरे जो सम्राट का न्याय कराणे री बिनती करणा पेई: इय्यां नी है कि मैं अपणे मणूआं पर कोई इल्जाम लाणा थिया।

²⁰ इधेरे तांइ मैं तुसा जो सदवाया कि तुसा कने मिलां ते गल्ल-बात करां किजोकी इस्राएल री आस री वजह कने जे मसीह हिन कने मैं इस जंजीरा कने जकड़ित्ते रा है।

²¹ तिन्हा ने पौलुस जो बोल्लेया, असा ना तां असा जो तेरे बारे अन्दर यहूदियां प्रदेश रे लोक्कां रे पास्से का कोई चीठ्ठियां मिल्ली, ते ना तां विश्वासियां बिच का कुसकी ने आई करी तेरे बारे अन्दर किच्‍छ दस्सेया अते ना बुरा बोल्लेया।

²² पर तेरा कै विचार है? सेह्ई असी तेरे का सुनणा चाह्‍ंदे, किजोकी असा जो पता है कि हर जगाह् इस गल्ल रे खिलाफ मणू गल्लां करदे

²³ तां तिन्हा यहूदी अधिकारियां ने पौलुस कने मिलणे तांइ इक्क दिन चुणेया, ते मते सारे मणू तित्ते तिसका कठ्ठी गे, अते से परमेश्वर रे राज री गवाई दिन्दा, ते मूसा रे कानून अते भविष्यद्वक्ता री कताबां का यीशु रे बारे अन्दर समझाई-समझाई करी भ्यागा का लेई करी संझा तांइ गहराई कने दस्दा रेया

²⁴ तां थोड़े जणेया ने तिन्हा गल्लां पर विश्वास करी लेया, अते किच्‍छ जणेया ने विश्वास नी कित्तेया।

²⁵ जां से अप्पु-मिते इक्क मत नी होये, तां पौलुस री ए गल्ल बोलणे पर चली गे पवित्रात्मा ने यशायाह भविष्यद्वक्ता रे जरिए तुसा रे बाब्बे-दाद्देयां कने ठीक ही बोल्लेया,

²⁶ जाई करी इन्हा मणूआं जो बोल कि तुसा सूणदे तां रैह्णा, पर समझणा नी, अते दिखदे तां रैह्णा, पर पछियाणी नी सकणा।

²⁷ किजोकी इन्हा मणूआं रा मन मोटा अते इन्हेरे कान्न भारे होई गेरे हिन, ते इन्हा ने अपणी हाख्खियां बन्द कित्ते री हिन, इय्यां ना हो कि से कदी हाख्खियां कने दिखण ते कन्नां कने सूणन ते मनां कने समजन अते बदली जाण, ते मैं तिन्हा जो खरा करां

²⁸ इधेरे तांइ तुसा जो पता लग्गो कि परमेश्वर रे इस छुटकारा री कहाणी गैर यहूदी का भेज्जेया गे री है, ते तिन्हा ने इसजो अपणाई लैणा।

²⁹ जिस बेल्ले तिनिये ए बोल्लेया तां यहूदी अप्पु-मिते बड़ी बैह्स करणा लगे ते तित्ते का चली गे

³⁰ से पूरे दो साल्लां तांइ कराये रे घरां अन्दर रेया

³¹ ते जे तिसका ईन्दे थिये, से तिन्हा सबणी कने मिलदा रेया ते बगैर रोक-टोकरे बड़ा निड़र होई के परमेश्वर रे राज रा प्रचार करदा ते प्रभु यीशु मसीह री गल्लां सखांदा रेया।