प्रेरितां रे कम्म 25 - चम्बयाली नौआ नियमपौलुस रा सम्राट री दोहाई दैणा 1 फेस्तुस रे तिस प्रदेश बिच राज्यपाल बणी करी पुजणे रे बाद से कैसरिया का यरुशलेम सहर तांइ निकलेया। 2 तां बड्डे पुरोत्तां ते यहूदी अधिकारियां ने तिसेरे सामणे पौलुस पर इल्जाम लाए। 3 ते से अप्पु तांइ तिसका छन्दे करी के पौलुस रे खिलाफ बोलणा लगे कि से तिसजो यरुशलेम अन्दर सदवाओ, किजोकी से तिसजो रस्ते अन्दर ही मारी रखणे री भाल बिच थिये। 4 फेस्तुस ने जवाब दित्तेया, पौलुस कैसरिया अन्दर कैद है, ते मैं अप्पु तौले तित्ते जाणा 5 फिरी बोल्लेया, तुसा बिच का जे अधिकारी हिन, से कन्ने चलो, ते अगर इस मणू ने किच्छ गलत कम्म कित्ते रा ए ता इस पर इल्जाम लाओ 6 तिन्हेरे बिच पौलुस कोई आठ्ठ-दस रोज रेह्ई करी कैसरिया कस्बे जो चली गेया ते दूए रोज्जे हिसाब-किताब री गद्दी पर बेई करी पौलुस जो अणने रा हुकम दित्तेया। 7 जां से आया, तां जे यहूदी अधिकारी यरुशलेम का आए रे थिये, तिन्हा ने अपणे-अपणे खड़े होई करी पौलुस पर मते सारे बड्डे-बड्डे इल्जाम लाये, जिन्हेरा सबूत से नी देई सकदे थिये। 8 पर पौलुस ने जवाब दित्तेया, मैं नां तां यहूदियां रे मूसा रे कानून रे, ते ना मन्दिर रे, अते नां ही सम्राट रे खिलाफ कोई कम्म कित्ते रा है। 9 तां फेस्तुस राज्यपाल ने यहूदी अधिकारियां जो खुस करणे री इच्छा कने पौलुस जो बोल्लेया, कै तू चाह्ंदा कि तू यरुशलेम जो जाओ ते तित्ते मेरे सामणे तेरा ए मुकद्दमा चलाया जाओ? 10 पौलुस ने बोल्लेया, मैं सम्राट रे हिसाब-किताब री गद्दी रे सामणे खड़ित्ते रा है मेरे मुकदमे रा फैसला इत्ते ही होणा चाएदा जिय्यां तिज्जो खरा करी पता है, कि मैं यहूदियां रे खिलाफ कोई गुनाह कित्ते रा नी है। 11 अगर मैं गुनेह्गार है ते अगर मैं मारी रखणे जोग्गी कोई गलती कित्ते री है, तां मैं मरणे का नी मुकरदा पर जिन्हा गल्लां रा ए मेरे पर इल्जाम लाया करदे हिन, अगर तिन्हा बिच का कोई भी गल्ल सच साबित नी हुंदी, तां कुसकी जो भी मिन्जो तिन्हेरे हत्थां बिच सौंपणे रा अधिकार नी है, मैं बिनती करदा कि मेरा हिसाब-किताब सम्राट द्वारा कित्तेया जाए। 12 तां फेस्तुस ने मन्त्रियां री सभा कने गल्लां करी के तिसजो जवाब दित्तेया, तैं अप्पु ही सम्राट का न्याय करवाणे तांइ बिनती कित्ते री है, तां तेरा न्याय सम्राट ने ही करणा। राजा अग्रिप्पा रे सामणे पौलुस 13 थोड़े रोज्जां बाद अग्रिप्पा राज्जा ते तिसेरी छोटी भैण बिरनीके, कैसरिया कस्बे अन्दर आई करी फेस्तुस राज्यपाल कने मिल्ले। 14 तिन्हेरे मते रोज्ज रैह्णे का बाद फेस्तुस ने पौलुस रे बारे अन्दर राज्जे जो दस्सेया: इक्क मणू है, जिस जो फेलिक्स कैद अन्दर छड्डी गे रा है 15 जां मैं यरुशलेम अन्दर थिया, तां बड्डे पुरोत्त ते यहूदियां रे बुजुर्ग मणू ने तिस पर इल्जाम लाए ते से चाह्ंदे थिये कि तिसजो सजा दित्ती जाओ 16 पर मैं तिन्हा जो जवाब दित्तेया कि रोमी मणूआं री ए रीत नी है कि कुसकी मणू जो सजा तांइ सौंपी दैण से तां तांइ इय्यां नी करदे जां तांइ कि आरोपी जो अपणे मुद्देइयाँ रे सामणे खड़े होई करी इल्जामां रा जवाब दैणे रा मौका नी मिल्लो 17 इधेरे तांइ जिस बेल्ले यहूदी अधिकारी तित्ते कठित्ते, तां मैं जरा भी हाण नी लाई, पर दूए ही रोज्जे हिसाब-किताब री गद्दी पर बेई करी पौलुस जो सामणे अणने रा हुकम देई दित्ता। 18 जिस बेल्ले तिसेरे पर इल्जाम लाणे वाले खड़े होये, तां तिन्हा ने इदेय गलत गल्लां रा इल्जाम नी लाया, जदेया मैं समजदा थिया 19 पर से मणू अपणे ही मत ते कुसकी होर यीशु नां रे मणू रे बारे बिच बैह्स करेया करदे थिये जे मरी गेया थिया, ते पौलुस पर ए इल्जाम लाया करदे थिये से ए बोलदा कि यीशु फिरी जिन्दा होई गे रा है। 20 किजोकी मैं उलझन बिच थिया कि इन्हा गल्लां रा पता किय्यां लां? इधेरे तांइ मैं पौलुस का पूच्छेया, के तैं यरुशलेम जो जाणा कि तित्ते जाई करी तेरी इन्हा गल्लां रा फैसला होई सको? 21 पर जां पौलुस ने बिनती कित्ती कि तिसेरे मुकद्दमे रा फैसला सम्राट का होये, तां मैं हुकम दित्तेया कि जां तांइ तिसजो सम्राट का नी भेज्जां, तिसजो कैद अन्दर रख्खेया जाओ 22 तां अग्रिप्पा ने फेस्तुस जो बोल्लेया, मैं भी तिस मणू री सुनणा चाह्ंदा तिनिए बोल्लेया, तैं कल्ल सुणी लैणा 23 ते दूए रोज्जे जां अग्रिप्पा ते बिरनीके बड़ी धूम-धाम कने आये ते पलटन रे सरदारां ते सहर रे खास मणूआं कने दरबार अन्दर पूज्जे तां फेस्तुस ने हुकम दित्ता कि से पौलुस जो लेई आण 24 फेस्तुस ने बोल्लेया, ओ राजा अग्रिप्पा, ते सब मणू जे इत्ते असा कने हिन, तुसा इस मणू जो दिखदे, जिसेरे बारे बिच सारे यहूदियां ने यरुशलेम बिच ते इत्ते भी लेरां मारी-मारी करी मेरे का बिनती कित्ती, कि इसेरा जिन्दा रैह्णा सही नी 25 पर मेरे जो पता लग्गी गेया कि इनिए इदेया किच्छ भी नी कित्ते रा है कि इसजो मारी रख्खेया जाओ अते हालांकि इनिए अप्पु ही सम्राट का अपणा न्याय करणे री बिनती कित्ती, तां मैं इसजो रोम सहर जो भेजणे रा फैसला लित्तेया। 26 मैं इसेरे बारे अन्दर कोई पक्की गल्ल नी दिख्खी कि अपणे सम्राट जो लिख्खां इधेरे तांइ मैं इसजो तुसा रे सामणे ते खास कर राजा अग्रिप्पा, तुसा रे सामणे लेई आया ताकि परखणे का बाद मेरे जो किच्छ लिखणे जो मिली जाओ। 27 कुसकी कैदी जो तिसेरी गलती दस्से बगैर तिसजो रोम भेजणा मेरे जो बेमतलब लगदा। |
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.