3 यूहन्ना 1 - चम्बयाली नौआ नियमगयुस जो नमस्ते 1 मैं यूहन्ना, जे कलीसिया रा बुजुर्ग है, अपणे प्यारे दोस्त गयुस जो ए चीठ्ठी लिख्खेया करदा है, जिस कने मैं सच्चा प्यार करदा। 2 ओ मेरे प्यारे दोस्त, मेरी प्रार्थना है कि जिय्यां तू मसीह यीशु बिच विश्वास करणे बिच मजबूत बणेया करदा है, तिय्यां ही तू सरीर बिच भी मजबूत बणी रे ते तेरे कने ठीक चीजां हुंदी रे। 3 किजोकी मैं बड़ा खुस होया जां किच्छ संगी विश्वासियां ने तेरे बारे बिच दस्सेया कि तू किन्नी ईमानदारी कने परमेश्वर री गल्लां जो मन्नी करी जिन्दगी जिंदा। 4 मेरे तांइ इसका जादा होर कोई खुसी री गल्ल नी हुंदी जां मैं सूणदा कि जिन्हा जो मैं अपणे बच्चेयां सांई मनदा से परमेश्वर री गल्लां जो मन्नी करी जिन्दगी जिया करदे हिन। इकठ्ठे कम्म करणे री खासियत 5 ओ मेरे प्यारे भाई, तैं संगी विश्वासियां री मदद तांइ बड़ा किच्छ कित्ते रा है, ते तैं तिन्हा लोक्कां री भी मदद कित्ती जिन्हा जो तू जाणदा नी। 6 तिन्हा बिच किच्छ विश्वासियां ने कलीसिया रे विश्वासियां जो तेरे बारे बिच दस्से रा है कि तू संगी विश्वासियां कने किन्ना जादा प्यार करदा। अवे मैं तेरे जो बोलदा कि जां से मणू कुसकी जगाह् बिच सफर करणे तांइ जांदे तां तेरे जो तिन्हा लोक्कां री तिन्हेरी जरुरत री चीजां देई करी मदद करदे रैह्णा चाएदा किजोकी इस कने परमेश्वर खुस हुंदे। 7 किजोकी से मसीह यीशु रे बसेख रा प्रचार करणे तांइ सफर पर निकली पेय रे हिन अते से मसीह यीशु बिच विश्वास ना करणे वाले लोक्कां का कोई मदद नी लिंदे। 8 इधेरे तांइ असी विश्वासी मणूआं जो इदेय मणूआं जो अपणे घरे रुकाई करी ते तिन्हेरी जरुरत री चीजां देई करी तिन्हेरी मदद करणी चाएदी ताकि असी भी तिन्हेरे सच्चाई रे बसेख जो सुनाणे रे कम्म रे हिस्सेदार बणी सकण। दियुत्रिफेस और दिमेत्रियुस 9 मैं पैल्ले भी तुसा री कलीसिया रे विश्वासियां जो इक्क चीठ्ठी लिख्खी थी। पर दियुत्रिफेस ने मेरी गल्लां जो मनणे का इन्कार करी दित्तेया किजोकी से हमेसा का अप्पु ही कलीसिया रा मुखिया बणना चाह्ंदा। 10 इधेरे तांइ जा मैं आणा तां मैं साफ तौर पर कलीसिया रे मणूआं जो ए दसणा कि से कै करेया करदा है। से सिर्फ असा रे खिलाफ झूठ्ठी-झूठ्ठी गल्लां बोल्ली करी असा पर इल्जाम लांदा कि असी गलत कम्म करदे, ते सिर्फ इन्ना ही नी पर जां असा रे संगी विश्वासियां उत्ते जांदे तां से तिन्हा जो भी अपणे इत्ते आणे का टाली दिंदा ते जे मणू तिन्हा विश्वासी लोक्कां जो अपणे घरे रुकाणे चाह्ंदे से तिन्हा जो भी मना करदा ते तिन्हा जो कलीसिया का भी बाहर करी दिंदा। 11 ओ मेरे प्यारे दोस्त, बुरे कम्म करणे वाले लोक्कां सांई नी पर भलाई रे कम्म करणे वाले लोक्कां सांई बणो। जां कोई भलाई रे कम्म करदा तां तिस कने पता चलदा कि से परमेश्वर रा बच्चा है। पर जां कोई बुरे कम्म करदा तां तिस कने पता चलदा कि से परमेश्वर जो नी जाणदा। 12 कलीसिया बिच सारे मणू बोलदे कि दिमेत्रियुस खरा मणू है किजोकी से परमेश्वर रे सच्चे बसेख रे हिसाब कने चलदा। ते असी भी बोलदे कि से खरा मणू है ते तू ए जाणदा कि असा री गवाई सच्ची है। आखरी नमस्ते 13 होर भी मती सारी गल्लां हिन जे मैं तुसा जो दसणा चाह्ंदा पर मैं तुसा जो से गल्लां इय्यां चीठ्ठी बिच लिख्खी करी नी बोलणा चाह्ंदा। 14 मैं चाह्ंदा कि तित्ते तुसा का आई करी तुसा कने आमणे सामणे गल्ल करां, ताकि असी अप्पु-मिते खुसी मनाई सकण। 15 मैं प्रार्थना करदा कि परमेश्वर तुसा जो सांती दे। इत्ते रे तेरे सारे विश्वासी दोस्त तिज्जो तेरे जो सलाम बोल्लेया करदे हिन। तित्ते रे हर इक्क विश्वासी दोस्त जो असा रा सलाम देयां। |
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.