2 कुरुन्थियों 2 - चम्बयाली नौआ नियम

¹ इधेरे तांइ मैं ए ठाणी लित्तेया थिया कि तुसा जो फिरी दुख दैणे तांइ ना आं।

² किजोकी जे मैं तुसा जो दुखी करी देयां तां तुसा रे अलावा मेरे जो खुसी दैणे वाला कोई नी रैह्णा।

³ अते ए ही गल्ल जे मैं तुसा जो लिख्खी ताकि कुथकी इय्यां ना हो कि जां मैं तुसा का आं, तां जिन्हा लोक्कां का मेरे जो खुसी मिलणी चाएदी, तिन्हा का मेरे जो दुख मिल्लो। किजोकी जां तुसा खुस हुंदे, तां तिस कने मेरे जो खुसी मिलदी।

⁴ किजोकी तुसा जो मैं दुखी मन का अते तकलीफ बिच रोई-रोई करी ए चीठ्ठी लिख्खी पर तुसा जो दुखी करणे तांइ नी, बल्कि इधेरे तांइ कि तुसा उस प्यार जो जाणी सको, जे खास कर तुसा रे तांइ है।

पापी जो माफी

⁵ पर जे अगर कुसकी ने दुख दित्ते रा है तां तिसने सिर्फ मेरे जो ही नी, पर थोड़ा-मता ता तुसा सारेयां जो भी दित्ते रा है। मैं तिस मणू री गलती रे बारे बिच इसका जादा किच्‍छ भी नी बोलणा चाह्‍ंदा।

⁶ इदेय जणे तांइ जे विश्वासी भाईयां ने दित्ते री है, से ही सही है।

⁷ इसेरे उलट तुसा तिसजो माफ करी दो अते तिसजो तसल्ली देयो, कुदखी इय्यां ना हो कि से मसीह बिच विश्वास करणे का पीच्छे हटी जाए।

⁸ इधेरे तांइ मेरी तुसा रे कने बिनती है कि तुसा तिन्हा सामणे ए ज़ाहिर करो कि तुसा तिन्हा कने प्यार करदे।

⁹ किजोकी मैं तुसा जो इस मकसद कने चीठ्ठी लिख्खी कि तुसा जो परखी लेयां कि तुसा मेरी सारी गल्लां जो मनणे तांइ तैयार हिन की नी।

¹⁰ पर जिस कुसकी जो तुसा कुसकी गल्ल तांइ माफ करदे तिसजो मैं भी माफ करदा। किजोकी जे किच्‍छ मैं माफ करदा (जे माफ कित्तेया है) से मसीह यीशु रे मिल्ले रे हक कने तुसा रे फायदे तांइ ही करदा।

¹¹ ताकि शैतान असा रा कोई फायदा नी उठाई सको किजोकी असी तिसेरी चाल्लां जो जाणदे।

मकिदुनिया तांइ सफर

¹² जां मैं मसीह यीशु रा सुब बसेख सुनाणे त्रोआस सहर बिच आया, तां प्रभु ने मेरे जो सुब बसेख सुनाणे रा बड्डा मौक्का दित्तेया।

¹³ पर जां अपणे विश्वासी भ्याल तीतुस जो तित्ते नी दिख्खेया तां मेरा मन बड़ा बेचैन होई गेया, ते तिसजो तोपणे तांइ मैं त्रोआस सहर रे विश्वासियां का बिदा लेई करी आई गेया, ते मकिदुनिया प्रदेश जो हटी गेया।

मसीह बिच जीत की खुसी

¹⁴ परमेश्वर रा शुकर हो, मसीह कने असा रा रिस्ता होणे री वजह कने से असा जो मसीह कने हमेसा लेई करी चलदे ते असा जो जीत दुआंदे। ते परमेश्वर अपणे मसीह जो जानणे री खुशबू जो इक्क महक सांई असा रे जरिये हर जगाह् फैलांदे।

¹⁵ किजोकी असा री जिन्दगी परमेश्वर रे सामणे छुटकारा पाणे वाले ते नास होणे वाले लोक्कां तांइ मसीह री इक्क महक सांई हिन।

¹⁶ पर तिन्हा लोक्कां तांइ जे बर्बादी पास्से बदेया करदे हिन, ए मौत री इदेइ गंदी मुस्क है, जे मौत रे पास्से लेई जांदी। पर तिन्हा लोक्कां तांइ जे छुटकारा रे रस्ते बिच बदेया करदे हिन, ए जिन्दगी री इदेयी महक है, जे हमेसा री जिन्दगी रे पास्से लेई चलदी। इन्हा गल्लां जो कोई अपणी काबलियत कने नी करी सकदा।

¹⁷ असी उन्हा केई मणूआं सांई नी हिन, जे पैसे रे लालच बिच परमेश्वर रे वचन बिच हेराफेरी करदे हिन, पर असी ए जाणदे होए कि परमेश्वर असा जो भेज्जे रा है, ते से असा जो दिख्खेया करदे हिन, ते असी मसीह रे हक कने हमेसा सच्चाई कने शिक्षा दिंदे।