ফগদাং পেইয়্যে 8 - Chakma Bible

সাত লম্বর সীলমহ্‌‌র

¹ সে পরেদি ভেড়া-ছবো যেক্কে সাত লম্বর সীলমহ্‌‌র ভাঙিলো সেক্কে স্বর্গত্ প্রায় আধা ঘন্টা ধুরিনে কনঅ বাবোত্যে রঅ শুনো ন-গেলঅ।

² যে সাতজন স্বর্গদূত্ গোজেন মুজুঙোত্ থিয়্যেই থান্ মুই তারারে দেগিলুং। তারা আঢত্ সাত্তো তূরী দিয়্যে অলঅ।

³ ইয়েনর্ পরেদি আর এক্কো স্বর্গদূত এইনে ডালি পূজোবো মুজুঙোত্ থিয়্যেল। তা আঢত্ এক্কো সনার ধূব্ টগ্ এলঅ। তারে বেশ্ গুরিনে ধূব্ দিয়্যে অলঅ যেনে তে সিংহাসন মুজুঙোত্ সনার ডালি পূজোবো উগুরে গোজেনর্ বেক্‌ মানুচ্চুনোর তবনার সমারে সেই ধূব্‌‌পুন্ উৎসর্ব গরে।

⁴ সেই স্বর্গদূত্‌তুনো আঢত্তুন্ ধূবোর্ ধুমো গোজেন মানুচ্চুনোর্ তবনাগানি সমারে উগুরে গোজেন মুজুঙোত্ উদি গেলঅ।

⁵ সেক্কে সেই স্বর্গদূত্‌তো ডালি পূজোবোত্তুন্ আগুন লোইনে সেই ধূব্ কদরাবো ভোরেল আর পিত্‌থিমীত ফেলেই দিলো। সেক্কে আগাজ বাজ্ পড়েদে রঅ আর অন্য বাবোত্যে রঅ অলঅ, আর ঝিমিলেল আর ভূজোল্ বেলঅ।

সাত্‌‌টো তূর‌‌ী

⁶ যে সাতজন স্বর্গদূতো আঢত্ সাত্‌টো তূরী এলঅ, ইয়েনর্ পরেদি তারা সিগুন বাজেবাত্যে যুক্কোল্ অলাক্।

⁷ পত্তম স্বর্গদূত্‌তো তা তূরীবো বাজেইলে পরেদি লো মিজেইয়্যে শিল আর আগুন পিত্‌থিমীত ফেলা অলঅ। সেক্কে তিন ভাগর এক ভাগ পিত্‌থিমী, তিন ভাগর এক ভাগ গাজ্‌-বাজ্ আর বেক্‌ য়্যেল্‌ ঘাস্‌চানি পুড়ি গেলঅ।

⁸ ইয়েনর পরেদি দ্বি-লম্বর স্বর্গদূত্‌তো তা তুরীবো বাজেল। সেক্কে দাঙর্ জ্বোল্‌জোল্ল্যে মুড়ো ধোক্ক্যেন এক্কো জিনিচ্‌ সাগরত্ ফেলা অলঅ। সেক্কে সাগরর্ তিন ভাগর এক ভাগ পানি লো ওই গেলঅ,

⁹ সাগরর্ তিন ভাগর এক ভাগ জেদা প্রাণী মুরি গেলাক্, আর তিন ভাগর এক ভাগ জাহাজ ভস্ত ওই গেলঅ।

¹⁰ যেরেদি তিন-লম্বর স্বর্গদূত্‌তো তা তূরীবো বাজেল। সেক্কে এক্কো দাঙর্ তারা জোল্‌জোল্ল্যে গুরি জ্বলদে জ্বলদে আগাজত্তুন্ পড়িলো।

¹¹ সে তারাবোর নাঙান্ এলঅ সোমরাজ। তিন ভাগর এক ভাগ গাঙ্ আর পয়নালা উগুরে তারাবো পড়িলো। সেক্কে তিন ভাগর এক ভাগ পানি তিদে ওই গেলঅ আর সেই তিদে পানিত্যে বোউত্ মানুচ্‌ মুরি গেলাক্।

¹² ইয়েনর পরেদি চের্-লম্বর স্বর্গদূত্‌তো তা তুরীবো বাজেল। সেক্কে বেলানর্ তিন ভাগর এক ভাগ, চানানর্ তিন ভাগর এক ভাগ আর তারাগুনোর তিন ভাগর এক ভাগ আন্ধার্ ওই গেলঅ। দিনোর তিন ভাগর এক ভাগত্ আর রেদোর্ তিন ভাগর এক ভাগত্ কনঅ পহ্‌র ন-থেলঅ।

¹³ পরেদি মুই এক্কো ঈগল পেগোরে আগাজত্ বোউত্ অজলত্ উড়োদে দেগিলুং, আর সেই ঈগল্লোরে দাঙর্ গুরি কধে শুনিলুং, “অন্য যে তিনজন স্বর্গদূতে তুরী বাজেবাত্যে যাদন্, তারার্ তুরীগুনোর্ আবাজ্ অলে যিগুনে এ পিত্‌থিমীর্ তারার্ দজা, দজা, দজা অবঅ।”