গীতসংহিতা 95 - Chakma Bible

¹ এজঅ, আমি লগেপ্রভুর নাঙে হুজির গীদ্ গেই; আমা রোক্ক্যেগুরিয়্যে মুড়োবোর নাঙে রঙ্গ-ফুত্তি গুরিই।

² আঢঅ, আমি ভালেদি জানাদে জানাদে তা মুজুঙোত্ যেই, গীদ্ গেইনে তার নাঙে রঙ্গ-ফুত্তি গুরিই।

³ লগেপ্রভুই দাঙর্ গোজেন; বেক দেব-দেবেদাগুনো উগুরে তেয়ই দাঙর্ রাজা।

⁴ পিত্‌থিমীর বেক গভিন্ জাগায়ান তা আঢত্ আঘে; মুড়োগুনোর্ মাঢাগুন্‌অ তার।

⁵ দোজ্যে সাগরান্ তার, কিত্তে তেয়ই সিয়েন বানেয়্যে; ভূইয়ান তা আঢে বানেয়্যে।

⁶ এজঅ, আমা মাঢাগুন্ নিগিরিনে তারে শ্রদ্ধা জানেই; আমা সিরিষ্টি গুরিয়্যে লগেপ্রভুর মুজুঙোত্ মাঢা নিগিরিই।

⁷ তেয়ই আমা গোজেন, আমি তা মানুচ্; তার চোড়েয়্যে মাদঅ ভেড়া ধোক্ক্যেন তে আমারে দেগাশুনো গরে। আহ্, এচ্চ্যে যুনি তুমি তা কধানি শুনো!

^8-9 তে কোইয়্যেদে, তমা পুরোণি মানুচ্চুনো ধোক্ক্যেন্ তমা মনানি তুমি দর ন-গোজ্য; তারা ধূল্যেচর-চাগালাত্ মরীবায় আর মঃসায়ত মরে জগা চেইয়োন্। যুনিয়ো তমা পুরোণি মানুচ্চুনে মঅ কামানি দেখ্যন্, তো তারা সিদু মরে বিজিরে চেইয়োন্।

¹⁰ চোল্লিশ বজর ধুরি সে সময়ো মানুচ্চুনো উগুরে মুই লবাদোস্যেত্ এলুং; মুই কোইয়োঙে, এ মানুচ্চুনোর মনানি বজং পধেন্দি ঘুরের্; তারা মঅ পথ্‌তান হবর্ ন-পেলাক্।

¹¹ সেনত্তে মুই রাগে শমক্ হেইনে কোইয়োঙে, “মর্ দিয়্যে জিরেবার জাগানত্ তারা যেই ন-পারিবাক্। ”