গীতসংহিতা 90 - Chakma Bible

চের্ লম্বর ভাগ ( ৯০-১০৬ )

গোজেনর মানুচ্ মোশির তবনা।

¹ ও প্রভু, বংশর পর বংশ ধুরি তুয়ই আমার থেবার জাগা।

² যেক্কেনে মুড়ো-মুড়ির সিরিষ্টি ন-অয়, দুনিয়ে আর পিত্‌থিমীর সিরিষ্টি ন-অয়, সিয়েনির আগেত্তুন্ ধুরি উমর সং তুয়ই গোজেন।

³ মান্‌জ্যরে তুই ধূল্যেত্ ফিরি নেযাচ্; তুই কোই থাচ্, “ও মানুচ্চুনোর পুঅগুন, তুমি আরঅ ধূল্যেত্ ফিরি যঅ।”

⁴ তঅ চোগেন্দি আজার বজর যানা যেন কেল্যে ধোক্ক্যেন্, যেন রেদোর এক্কো বেন্যেমাদান ধোক্ক্যেন্।

⁵ তুই মানুচ্চুনোরে যেনে বান পানিয়ে ভাজেই নেজর্, তারা স্ববন ধোক্ক্যেন্; তারা যেনে বেন্যেমাদান ঘাস ধোক্ক্যেন্, নুয়ো গুরি বাড়ি উঠ্যে ঘাস।

⁶ বেন্যেমাদান সিয়েনি গোজেইনে দাঙর্ অয়; সাজোন্যে সিয়েনি শুগেইনে শেজ্ ওই যায়।

⁷ তর্ রাগে আমি শেজ্ ওই যেই; তর্ অমকদ রাগ্‌কান আমি দোরেই।

⁸ আমা অন্যেয়ানি তুই তঅ মুজুঙোত্ রাগাচ্; তর্ পহ্‌রে আমা লুগেয়্যে পাপ্‌পানি ফগদাং অয়।

⁹ তর্ অমকদ রাগর তলেন্দি আমা দিনুন কাদেই; নিজেস ধোক্ক্যেন আমা বজরুন্ থুম্ ওই যান।

¹⁰ আমা আয়ু বানা সত্তুর বজর, বল্ থেলে আশি বজর্‌অ অয়; আমা আয়ু যেদক অদঅ সাৎ থাইদ্যে বানা দুখ্ আর কষ্ট; বজর যায় চোগ্ কাদানাত্ আর আমিও শেজ্ ওই যেই।

¹¹ তর্ রাগর খেমতাগান কন্না বুঝি পারে? কয়জন মনত্ তর্ পাইদ্যে ভোক্তিগান আঘে, যেনে তারা তর্ রাগ্‌কান বুঝোন্?

¹² সালে তুই আমারে বুঝিবাত্তে দে, আমা আয়ুগান কত্তমান কম্, যেনে আমা মনান্ জ্ঞানে ভুরি উদে।

¹³ ও লগেপ্রভু, আর কয়দিন? এবেরা তুই ফিরি চাহ্, তর্ চাগরুনো উগুরে তুই মেয়্যে দেগা।

¹⁴ নুয়ো গুরি তর্ অমকদ কোচ্‌পানালোই আমা আওজ্‌ছানি পুরেই দে, যেনে আমি হুজিয়ে গীদ্ গেই পারিই আর হুজিয়ে জিংকানি কাদে পারিই।

¹⁵ যেদকদিন সং তুই আমা বাড়্ গরানাগানি ভাঙি দিবার কাম গোজ্যস্, যেদক বজর আমি দুঘোত্ এলং, সেদক বজর তুই আমারে সুগেই রাগেয়োচ্।

¹⁶ তঅ চাগরুনো ইদু তর্ কামানি আর তারার পুঅ ছাগুনোর ইদু তর্ বাঈনী গরানাগান্ তুই ফগদাং গর্।

¹⁷ আমা প্রভু গোজেনর দোয়্যে আমা উগুরে থোক্; আমা বেক্ কামানি তুই ফোলেই দে, অয়, আমা বেক্ কামানিত্ তুই ভালেদি দান গর্।