গীতসংহিতা 87 - Chakma Bible

কোরহ বংশর এক্কো গান। এক্কো গীদ্।

¹ লগেপ্রভু সুদ্ধো-সাংগ মুড়োবো উগুরে তা শঅরান্ থিদেবর্ গোজ্যে।

² যাকোব-বংশর অন্য বেক থেবার জাগানিত্তুন্ তে সিয়োনর গেট্টুন কোচ্‌পায়।

³ ও গোজেনর শঅরান্, তঅ পৌইদ্যেনে বোউত্ বাঈনীর্ কধা কুয়ো ওইয়্যে।

⁴ লগেপ্রভু কোইয়্যেদে, “যিগুনে মরে ঘেচ্চেক্‌গুরি হবর্ পান তারার পৌইদ্যেনে কবার অক্তত্ মুই রহব আর বাবিলোর কধা কোম্, আর উইয়োবু পলেষ্টীয়গুন, সোর আর কূশ, তারার কধায়ো কোম্, ‘ইগুনে পত্তিজনে যেন সিয়োনত্ জর্মেয়োন।’ ”

⁵ আর সিয়োন পৌইদ্যেনে কুয়ো অবঅ, “নানান্ জাদর মানুচ্ সিদু জর্মেয়োন; দাঙর্ গোজেনে নিজে সিয়োনানরে তুলি ধুরিবো।”

⁶ লগেপ্রভু জাদ্‌তুনোর নাঙানি লিগিবার অক্তত্ এ কধাগান কবঅ, “ইবে সিয়োনত্ জর্মেয়্যে।”

⁷ যিগুনে গান গেবাক্ আর যিগুনে নাজিবাক্ তারা কবাক্, “মর্ বেক রংগ-ফুত্তির আওজ্‌ছান তইদু।”