গীতসংহিতা 77 - Chakma Bibleগান পরিচালগত্যে। যিদূথূনোর আরুগে। আসফর গান। 1 মুই রঅ ছাড়িনে গোজেন মুজুঙোত্ কানঙর্; মুই গোজেন ইদু রঅ ছাড়ঙর্ যেনে তে সিয়েনি শুনিনে জোব্ দে। 2 দজাত্ পুরিনে মুই প্রভুরে ডাগিলুং; রেদোত্ মঅ আঢ্তানি গোজেনর ইন্দি বাড়েয়্যে থেদঅ, মুই বল্পোজ্যে ন-অদুং; মঅ মনানে সুগ্ শান্দি ন-পেদঅ। 3 মুই যেক্কেনে গোজেন কধা ইদোত্ তুলিদুং সেক্কে দুঘে ফোবেদুং; চিদে গত্তে গত্তে মুই আজা আরাং। 4 তুয়ই মর্ চোগো পাদা খুলো রাগদে; মুই অমকদ থির্ নেইয়্যে অদুং, সেনত্তে কধায়ো কোই ন-পারিদুং। 5 বোউত্ পুরণ দিনোর কধা মুই ভাবিদুং, ইদোত্ তুলিদুং ভালোক্ বজরর্ আগ কধা। 6 রেদোত্ মর্ বেক গীদোর কধানি মনত্ পুরিদো; মুই মনে মনে গভিন্ গুরিনে চিদে গুরিদুং আর মনে মনে পুজোর্ গুরিদুং- 7 প্রভু কি উমরত্যে আমারে ছাড়ি যেইয়্যে? তে কি আমারে আর কনদিন্অ মেয়্যে ন-গুরিবো? 8 তার অমকদ কোচ্পানাগান কি উমরত্যে থুম্ ওই গেলঅ? তার শমক্তান্অ কি উমরত্যে বিফল ওই গেলঅ? 9 গোজেনে কি মেয়্যে গুরিবাত্যে ভুলি যেইয়্যে? তে কি রাগে তার্ দোয়্যে-মেয়্যেগান বন্ধ গুরি দিলো? 10 মুই কলুং, “ইয়েনই মর্ দুঘ যে, দাঙর্ গোজেনর ডেন আঢ্তান বুদুলি যেইয়্যে।” 11 লগেপ্রভুর বেক কামর কধানি মুই ইদোত্ তুলিম; অয়, ইদোত্ তুলিম পুরণ দিনোত্ তর্ গোজ্যে আমক্ অবার্ কামানির কধা। 12 তর্ বেক কামানির পৌইদ্যেনে মুই ধ্যান গুরিম; তর্ বেক কামানির কধা ভাবি চেম্। 13 ও গোজেন, তর্ আঢিবার পথ্তান পবিত্র; আমা গোজেন ধোক্ক্যেন দাঙর্ কি কনঅ দেবেদা আঘে? 14 তুয়ই সেই গোজেন যিবে আমক্ অবার্ কামানি গুরি থাচ্; বেক্ জাদ্তুনো ইদু তর্ খেমতার পরিচয় তুই দুয়োচ্। 15 তুই তর্ মানুচ্ যাকোব আর যোষেফ বংশধরুনোরে তর্ দরমর আঢ্তোই উদ্ধোর গোজ্যস্। 16 ও গোজেন, সাগর পানিগানে তরে দেখ্যে; তরে দেগিনে পানিগান গির্গিরে উদিলো, সাগর তলা সং গির্গিরে উদিলো। 17 মেঘে পানি ঢালি দিলো, দেবাবো গুজুরি উদিলো; তর্ ঝিমিলেনিগান ইন্দি উন্দি ঝিমিলেল। 18 বোইয়্যের ঝড়ে তর্ দেবা পেরাগ রঅ শুনো গেলঅ, তর্ ঝিমিলেনিলোই পিত্থিমীগান পহর্ অলঅ; পিত্থিমীগান গিরগিরেল আর টলমল গুরি উদিলো। 19 সাগর ভিদিরেন্দি তুই পথ গুরি দিলে, গভিন পানি ভিদিরেন্দি তুই পথ গুরি দিলে, মাত্তর্ তর্ টেঙর মাজারা দেগা ন-যায়। 20 মোশি আর হারোণরে দিইনে ভেড়া পাল ধোক্ক্যেন গুরি তুই তঅ মানুচ্চুনোরে চোড়েয়োচ্। |
Copyright © 2021 Bangladesh Bible Society
Bangladesh Bible Society