গীতসংহিতা 72 - Chakma Bibleশলোমনর্ গান। 1 ও গোজেন, বিচের্ গুরিবার যে অধিকারান তর্ আঘে সিয়েন তুই এ রাজাবোরে দান গর্; এ রাজার্ পুয়োবোরে তর্ ন্যায়র জ্ঞানান্ দান গর্; 2 যেনে তে গমেডালে তঅ মানুচ্চুনোরে বিচের্ গুরি পারে আর অত্যেচারগুরিয়্যেগুনোরে সুবিচের্ গুরি পারে। 3 তার ন্যায় কামর মাধ্যমে মানুচ্চুনোত্যে মুড়ো-মুড়িয়্যে ভরা দেজ্চান্ ভালেদি ওইনে ভুরি উদোক্। 4 তা রেজ্যর অত্যেচারগুরিয়্যে মানুচ্চুনো উগুরে তে ন্যায়বিচের গোরোক্; নাদা মানুচ্চুনোরে বাঁজা আর অত্যেচারগুরিয়্যেগুনোরে বিঝেই ফেলা। 5 যেদকদিন চান্নো-বেলান্ থেবঅ সেদকদিন বংশর পর বংশ ধুরি মানুচ্চুনে তারে ভোক্তি গুরিনে দরাদোক্। 6 ঘাস কাবি নেযেয়্যে ভূইয়ো উগুরে ঝড় পড়িলে যেধোক্ক্যেন অয় তে যেন সেধোক্ক্যেন অয়; তে যেন মাদি ভিস্যে ঝড়নাল ধোক্ক্যেন অয়। 7 তা আমলত্ গোজেন ভক্তগুনে যেন বোউত্ আশিদ্বাদ পান; যেদকদিন চানান্ থেবঅ সেদকদিন তারার জিংকানিত্ ভালেদিয়্যে ভালেদিয়্যে ভুরি উদোক্। 8 তা রেজ্যগানর দুযিগান্ সাগরত্তুন সাগর সং, ইউফ্রটিস্ গাঙত্তুন্ পিত্থিমীর শেজ্ দুযি সং ওক্। 9 ধূল্যেচর-চাগালার মানুচ্চুনে তাইদু মাঢা নিগিরোদোক্ আর তা শত্রুগুনে তারে জু জু জানাদোক্। 10 তর্শীশ আর দ্বিব্পুনোর রাজাগুনে তারে খাজানা দেদোক্; শিবা আর সবা দেজর রাজাগুনেয়ো তার পাইদ্যে বক্শিজ্ছান তারে দেদোক্। 11 বেক রাজাগুনে তাইদু মাঢা নিগিরোদোক্ আর বেক জাদ্তুনে তারে সেবা গোরোদোক্। 12 যিদুক্কুন নাঢা মানুচ্, অত্যেচার ওইয়্যে আর অসহায় মানুচ্ সাহায্যত্তে কানদন্ তারারে তে উদ্ধোর গুরিবো। 13 বাপ-মা নেইয়্যেগুনোরে আর নাঢা মানুচ্চুনোরে তে দোয়্যে গুরিবো আর নাঢামানুচ্চুনোরে বাঁজেব। 14 অত্যেচার আর আক্রমণ আঢত্তুন্ তে তারার পরাণানি রোক্ক্যে গুরিবো; তা চোগেন্দি তারার লুওর দাম বোউত্। 15 তে ভালোক্ দিন বাঁজি থোক্; শিবা দেজর সোনাগানি তাইদু এজোক্। নিত্য তাত্তে তবনা গোরোদোক্; সারা দিন্নো তা উগুরে আশিদ্বাদ পোড়োক্। 16 দেজত্ বোউত্ খেত-খেত্তি ওক্, সিগুন মুড়োগুনোর্ মাদাবো সং ওক্। খেত-খেত্তিয়ে লেবানন ঝারর্ শন্শন্ রঅ গরে; শঅরত্তুন্ নিগিলি এচ্চ্যে মানুচ্চুনে যেন মাদ ঘাস ধোক্ক্যেন বোউত্ বাড়ন্। 17 তার সুনাঙান জিংকানিবর থিদেবর্ ওক্; বেলানে যেদকদিন পহর্ দিবো সেদকদিন তার সুনাঙান্ অদে অদে থোক্। তা মাধ্যমে যেন বেক জাদ্তুনে আশিদ্বাদ পান; তারা তারে ভালেদি জানাদোক্। 18 লগেপ্রভু গোজেন, যিবে ইস্রায়েলর গোজেন, তার বাঈনী ওক্; বানা তে আমক্ আমক্ অইদে কামানি গরে। 19 জিংকানিবর্ তার মহিমাবলা নাঙানির্ নাং গিনে ওক্; পুরো দুনিয়াগান তার মহিমালোই পূরোন ওক্। আমেন, আমেন। 20 যিশয়র পূঅ দায়ূদোর বেক তবনাগানি ইয়োত্ থুম্। |
Copyright © 2021 Bangladesh Bible Society
Bangladesh Bible Society