গীতসংহিতা 62 - Chakma Bible

গান পরিচালগর তুবোনাত্যে। যিদূথূনো ধোক্ক্যেন্। দায়ূদো গান।

¹ মর্ মনানে অলর্ গুরি বানা গোজেনরে বাজ্জেই আঘে, কিত্তেই তে মর্ উদ্ধোরগুরিয়্যে।

² বানা তেয়ই মর্ অজল্ মুড়ো আর মর্ উদ্ধোর; তেয়ই মর্ ঘর, মুই পুরোপুরি গুরিনে উদিই ন-যেম্।

³ আর কয়দিন এক্কো মান্‌জ্য উগুরে তমার এ আক্রমণানি চলিবো, যেনে আলেই-পোজ্যে দেবাল আর পড়েত্তে এমন্ বেড়া ধোক্ক্যেন গুরি তুমি বেক্কুনে তারে শেজ্ গুরি দি পার?

⁴ তার দাঙর্ পথ্‌তানত্তুন্ তারে তলেন্দি লামেই দেনা তারার বানা এক্কান ফন্দি; মিজে কধালোই তারার ফুত্তি। মুয়োন্দি তারা বর্ দুয়োন্ মাত্তর্ মনেদি অভিশাব্ দুয়োন।

⁵ ও মর্ মনান্, তুই অলর্ গুরি বানা গোজেনরে বাজ্জেই থাক্, কিত্তেই তে তরে আশা দান গরে।

⁶ বানা তেয়ই মর্ অজল্ মুড়ো আর মর্ উদ্ধোর; তেয়ই মর্ ঘর, মুই থির্ থেম।

⁷ মর্ উদ্ধোর আর মান-সর্মানান গোজেন উগুরে নির্ভর গরের; গোজেনে মর্ বল্, মর্ অজল মুড়ো, তেয়ই মর্ আশ্রয়র জাগা।

⁸ ও মর্ মানুচ্চুন, গোজেনে আমা আশ্রয়; তুমি নিত্য তা উগুরে নির্ভর গর, তাইদু তমার মনান্ ঢালি দুয়ো।

⁹ সমাজর তলেন্দি মানুচ্চুন মেঘ ধোক্ক্যেন্, আর উগুরে মানুচ্চুন বাজে বাবোত্যে; পাল্লাত্ মাবিলে তারা বেক্কুনে মিলিনে বোইয়্যেরত্তুন বেশ্ পাদল।

¹⁰ তুমি অন্যেয় সুবিধে নিবাত্তে নির্ভর ন-গোজ্য; জুলুম গোজ্যে আয় উগুরে মিজে আশা ন-রাগেয়ো; বাড়েয়্যে ধন-সোম্বোত্তিলোই গুলোগুলি গুরি ন-থেয়ো।

¹¹ বেক্ বলান গোজেনর আঢত্- এ কধাগান তে ভালোক্‌বার কোইয়্যে, আর মুইয়ো সিয়েন ভালোক্‌বার শুন্যং।

¹² ও প্রভু, তইদু অমকদ কোচ্‌পানা আঘে; তুই পত্তিজনরে তার কাম মজিম্ ফল দি থাচ্।