গীতসংহিতা 49 - Chakma Bible

গান পরিচালগত্তে। কোরহর বংশর গান।

¹ ও বেক্ জাদ্‌তুন, তুমি এ কধাগান শুনো; যিগুনে এ জগদত্ বজত্তি গরর্ তুমি বেক্কুনে কান পাদঅ;

² অজল্-নিযো, তাগোয়্যে-নাঢা, তুমি বেক্কুনে শুনো।

³ মঅ মুয়োত্তুন জ্ঞানর কধা নিগিলি এবঅ; মঅ মনত্ গভিন্ চিন্তেগানে বুঝিবার খেমতা দিবো।

⁴ মুই শিক্ষ্যেলোই ভরা উপমাগানিত্ মনান্ দিম্; বীণার সমারে গান গেইনে তার গভিন বেপারে বুঝেম্।

^5-6 যিগুনে ধন-সোম্বোত্তি উগুরে নির্ভর গরন্ আর বোউত্ ধনর বার্‌বো গরন্, ভাদ রাদত্ সে শত্রুগুনোর অন্যেয়ানিয়ে যেক্কেনে মরে ঘিরিবো, সেক্কেনে মুই কিত্তেই দোরেম্?

^7-9 কেউ কনমতে মরণত্তুন্ কাররে উদ্ধোর গুরি ন-পারে বা গোজেনরে তার উদ্ধোরর্ দাম দি ন-পারে, যেনে তে জিংকানিবর বাঁজি থায় আর মরণর জাগাত্ যাহ্ ন পড়ে; কিত্যে জিংকানি কিনিবার দাম বোউত্, সেই দামানর সং সং কিচ্চু নেই।

¹⁰ জ্ঞানি মান্‌জ্যেয়ো যে মুরি যায় সিয়েন বেক্কুনে হবর্ পান; যিগুনোর বিবেচনা নেই আর যিগুনোর মনানি বাজে ধরনর্ তারা একইভাবে ভস্ত অন; তারার ধনানি তারা অন্যগুনোত্তে থোই যান।

¹¹ তারা মনে গরন্দে তারার ঘর-বাড়ীগানি থিবেবর্ আঘে, তারার থেবার জাগায়ানি বংশর পর বংশ ধুরিনে থেবঅ, সেনত্তেই নিজোর নাঙে তারা সোম্বোত্তিগানির নাঙ্ দুয়োন।

¹² মাত্তর্ মানুচ্ তাগোয়্যে-মানীবলা অলেয় উমরত্যে নয়; তে য়েমানুনো ধোক্ক্যেন্ ভস্ত ওই যেবঅ।

¹³ যিগুনে নিজো উগুরে নির্ভর গরন, আর তারার পরেন্দি যিগুনে তারার্ কধালোই চলন্, তারার্ দজায়ো সেধোক্ক্যেন্ অবঅ।

¹⁴ ভেড়া পালরে যেধোক্ক্যেন ঠিগ্ গোজ্যে খোয়াড়ত্ নেযা অয়, সেধোক্ক্যেন ঠিগ্ গোজ্যে গোরত্ সে মানুচ্চুনোরেয়ো নেযা অবঅ; সিয়েনত্ মরণানে তারার্ গরক্ অবঅ। বেন্যেমাদান্ গোজেন ভক্ত মানুচ্চুনে তারা উগুরে জিদিবাক্; গোরানে তারার কিয়্যেগানি হেই ফেলেব; তারার থেবার জাগা বলতে আর্ কিচ্চু ন-থেবঅ।

¹⁵ মাত্তর্ মরণর জাগাত্তুন্ গোজেনে উদ্ধোরর দাম দিইনে আমারে উদ্ধোর গুরি নেযেব; তে আমারে তার নিজো ইদু হামাক্কাই নেযেব।

¹⁶ অন্যগুনে তাগোয়্যে ওইয়োন দেগিনে ন-দোরেয়ো, ন-দোরেয়ো তা পরিবারর ধন-সোম্বোত্তি বেশ্ অলে;

¹⁷ কিয়া তে মুরিবার কাদাল্যে কিচ্চু সমারে ন-নেযেব, তা ধন-সোম্বোত্তিগানি তা সমারে মরণর জাগাত্ ন-নেযেব।

¹⁸ যুনিয়ো জিংকানিত্ তে নিজোরে ভাগ্যত্যে বিলিনে মনে গুরিদো মাত্তর্ কারর্ ভালেদি অলে মান্‌জেয়ো তারে ভাগ্যত্যে কন্-

¹⁹ তো তার পূরোণি মানুচ্চুনোর ইদু তাত্তুন্ যাহ্ পুরিবো যিগুনে আর্ কনদিন্‌অ দিনো পহ্‌‌‌রান ন-দেগিবাক্।

²⁰ মানুচ্ তাগোয়্যে-মানীবলা অলেয়ো গোজেনরে বুঝি ন-পারন্; তে য়েমান ধোক্ক্যেন্ ভস্ত ওই যেবঅ।