গীতসংহিতা 42 - Chakma Bible

দ্বিলম্বর ভাগ্‌কো ( ৪২-৭২ )

গান পরিচালগত্তে। কোরহর বংশর দুঘোত্ তবনা গরানা।

¹ উরিঙে যেধোক্ক্যেন আওজ্ গুরিনে পানি নালর্ তিরেচ্ গরন, সেধোক্ক্যেন গুরিনে ও গোজেন, মর্ পরাণান্ তত্তেই আগল্-পাগল্ ওই আঘে।

² গোজেনত্তে, জেদা গোজেনত্তেই মর্ পরাণানত্ তিরেচ্ লাগের্; কক্কেনে মুই যেইনে তা মুজুঙোত্ থিয়্যেই পারিম্?

³ মঅ চোগোর পানিগানই মর্ দিনো-রেদোর খরাগ্ ওইয়্যে; আর ইন্দি মান্‌‌জ্যে মরে বানা কদন্, “কুদু গেলঅ তর্ গোজেনে?”

⁴ কানানিলোই মুই যেক্কেনে নিজোরে মনত্ তুলোং, সেক্কেনে মত্তুন্ মনত্ পড়ে কেধোক্ক্যেন্ গুরি ভালোক্কুন পরব্ পালেয়্যে গুনোরে নিইনে মুই হুজির আর ভালেদির্ রঅ ছাড়দে ছাড়দে মিছিল গুরিনে গোজেনর ঘরত্ যেদুং।

⁵ ও মর্ পরাণান্, কিত্তেই তুই আজা আরেয়োজ্? কিত্তেই এদক্ চোত্‌‌পোত্যে ওইয়োচ্? গোজেন উগুরে আজা রাগা, কিত্যে তেয়ই মরে উদ্ধোর্ গুরিবো; সেনত্তে মুই আরঅ তার বাঈনী গুরিম।

⁶ ও মর্ গোজেন, মর্ পরাণান আজা নেইয়্যে ওইনে পোজ্যে; সেনত্তে দঅ মুই যর্দন গাঙর্ গড়াগানত্ থিয়্যেইনে, হর্মোণ মুড়োবোর মাঢাত্ আর মিৎসিয়র মুরোবোত্ থিয়্যেইনে তর্ কধাগান ভাবঙর্।

⁷ সিয়েনত্ তর্ তান্‌‌জাঙর্ রবোর্ পানিগানর গুজুরোনিবো ডাগের্; আর তর্ ভাঙিপোজ্যে বেঈ এস্যে তুবোলুন্ মঅ উগুরেন্দি বেঈ যার্।

⁸ দিনোত্ লগেপ্রভু তার অমকদ কোচ্‌‌পানাগান্ মঅ উগুরে ঢালি দে; আর রেদোত্ মর্ জীংকানিগান গোজেনর ইদু মর্ তবনা আর তার বাঈনী-গান মর্ সমাজ্যে অয়।

⁹ মর্ গোজেনর ইদু, মর্ আশ্রয়-মুড়োবোর ইদু, মুই এ কধাগান কোম্, “কিত্তেই তুই মরে ভুলি যেইয়োচ্? কিত্তেই মত্তুন্ শত্রুর অত্যেচারে মনত্ দুখ্ গুরিনে বেড়া পুরিবো?”

¹⁰ মর্ শত্রুগুনে যেক্কেনে মরে ঠাট্টা গুরিনে বানা কন্দে, “কুদু গেলঅ তর্ গোজেনে?” সেক্কেনে মর্ অবস্থাগান এন্ অয় যেন আড়ুন নিগুজ্ ওই যাদন্।

¹¹ ও মর্ পরাণান, কিত্তেই তুই আজা আরেয়োজ্? কিত্তেই এদক্ ওলোমোত্য ওইয়োজ্? গোজেন উগুরে আজা রাগা, কিয়া মুই আরঅ তার বাঈনী গুরিম; তে মর্ উদ্ধোর্ গুরিয়্যে আর মর্ গোজেন।