গীতসংহিতা 40 - Chakma Bible

গান পরিচালগত্তে। দায়ূদোর গান।

¹ মুই ধৈয্য ধুরিনে লগেপ্রভুত্তে বাজ্জেই আগং। তে মঅ কধালোই কান পাদিলো, মর্ কানানিগান শুনিলো।

² তে মরে তুলি আনিলো মুরি যাইদে গাঢত্তুন্, সেই এলাফেলালোই ভোজ্যে গাঢত্তুন্। তে মরে পাত্তর উগুরে থিয়্যেবাত্তে দিলো আর দর মাঢি উগুরে আঢিবাত্তে দিলো।

³ তে মর্ মুয়োনত্ দিলো নূয়ো গান, আমা গোজেনর নাঙ্ গিনেদে-গান। ভালোক্ জনর চোগোত্ সিয়েন্ পড়িবো আর তারার্ মনত্ ভোক্তিবলা দর্ অবঅ; তারা লগেপ্রভু উগুরে বিশ্বেজ্ গুরিবাক্।

⁴ বর্‌পেইয়্যে সেই মানুচ্চো, যে লগেপ্রভু উগুরে বিশ্বেজ্ গরে, যে তারা ইন্দি ন-ফিরে যিগুনে বার্‌বো আর মিজে কধালোই থায়।

⁵ ও মর্ গোজেন লগেপ্রভু, গুণি ন-পুরেইয়্যে তর্ আমক্ অবার কামানি! কেধোক্ক্যেন সল্লা গোজ্যস্ আমাত্তে! মুই দঅ ফগদাং গুরিলে, কবাত্তে গেলে, কনদিন্‌অ থুম্ ন-অবঅ। কন্না আঘে তঅ ধোক্ক্যেন্?

⁶ য়েমান আর অন্য উৎসর্ব তুই ন-চাজ্, পুজ্যে আর পাপ-উৎসর্বয়ো তর্ দরকার নেই; মাত্তর্ তর্ কধা শুনিবার কানান্ তুই মরে দুয়োচ্।

⁷ সেনত্তে মুই কোইয়োং, “এইয়্যে দঅ মুই এচ্যং; পবিত্র বাইবেলত মর্ এজানার পৌইদ্যেনে লেগা আঘে।

⁸ ও মর্ গোজেন, তর্ আওজ মজিম জিংকানি কাদানা মর্ হুজি; তর্ বেক্ উগুমানি মর্ মনত্ আঘে।”

⁹ ও লগেপ্রভু, দাঙর্ মিটিঙোত্ তঅ ধোক্ক্যেন কামর্ পৌইদ্যেনে মুই ফগদাং গরং; তুই দঅ হবর্ পাচ্, মুই মুয়োন বানি ন-থাং।

¹⁰ তঅ ধোক্ক্যেন কামর্ কধা মর্ মনত্ মুই লুগেই ন-রাগাং; মুই তর্ বিশ্বেজ্‌ছান আর উদ্ধোর-কামর্ কধানি কোই থাং; তর্ অমকদ কোচ্‌পানা আর তর্ বিশ্বেজর্ কধা দাঙর্ মিটিঙোত্ মুই গুমোর্ ন-গরং।

¹¹ ও লগেপ্রভু, মঅ উগুরে তর্ দোয়্যে দেগেবাত্তে তুই অস্বীগের্ ন-গুরিচ্; তর্ অমকদ কোচ্‌পানা আর বিশ্বেজ্‌ছান যেনে নিত্য মরে রোক্ষ্যে গরে;

¹² কিয়া ভালোক্কানি দযায় মরে ঘিরিনে ধোজ্যে; পাপে মঅ পিজেন্দি লড়ার্ মঅ উগুরে লুম্মেগি। মুই ন-দেগঙর্; সিয়নি মর্ চুলানিত্তুন্‌অ বেশ্; সাহস কদে মর্ আর্ কিচ্ছু নেই।

¹³ ও লগেপ্রভু, দোয়্যে গুরিনে মরে বাঁজা; ও লগেপ্রভু, মরে বল্ দিবাত্তে যাদিমাদি আয়।

¹⁴ যিগুনে মরে মারে ফেলেবার চেরেস্‌তাত্ আগন্ তারা বেক্কুনে লাজত্ আর অগমানত্ পোড়োদোক্; যিগুনে মর্ নাশ দেগিবাত্তে চান তারা মাঢাবো তলে গুরিনে ফিরি যাদোক্।

¹⁵ যিগুনে মরে চেইনে কন্, “দোল্ ওইয়্যে!” তারা লাজত্ পড়িনে ফিরি যাদোক্।

¹⁶ মাত্তর্ যিগুনে তর্ আওজ্ মজিম চলন্ তারা মরে নিইনে হুজি ওদোক্; যিগুনে তর্ করা উদ্ধোরর্ কামান গমপান তারা নিত্য কোদোক্, “লগেপ্রভুর বাঈনী ওক্!”

¹⁷ মুই দুঘী আর অভাবী, মাত্তর্ মঅ পৌইদ্যেনে প্রভু চিদে গরে। মর্ গোজেন, তুই দেরি ন-গুরিচ্; তুয়ই দঅ মর্ এযালদিয়্যে আর উদ্ধোরগুরিয়্যে।