গীতসংহিতা 39 - Chakma Bible

গান পরিচালগত্তে। যিদূথূনত্তে। দায়ূদোর গান।

¹ মুই কলুং, “মর্ আঢি যানা পৌইদ্যেনে মুই উজিয়ার থেম্, যেনে জিলান্দোই মুই পাপ ন-গরং; যেদক্কন্ পাজিগুনে মঅ মুজুঙোত্ থেবাক্ সেদক্কন্ সং মর্ মুয়োন্ মুই বানি রাগেম।”

² মাত্তর্ মুই মুয়োন্ বন্দ গুরিনে অলর্ গুরি রলুং, যিয়েন গম্ সিয়েন্‌অ ন-কলুং, এধোক্কেন্ গুরি মনর্ দুখ্‌কান্ বাড়িলো।

³ মঅ মনত্ যেনে জ্বালা ধুরিলো; মুই যেক্কেনে মনে মনে কধা কুয়ো ধুরিলুং সেক্কেনে যেন আগুন জলেত্তে ধোক্ক্যেন্। সে পরেদি মুই কলুং,

⁴ ও লগেপ্রভু, কক্কেনে মর্ জিংকানিগান শেজ্ অবঅ? মুই আর্ কয়দিন বাঁজি থেম্ সিয়েন মরে কঅ; মর্ জিংকানিগান যে দুএক দিনোর্ সিয়েন মরে বুঝেই দে।

⁵ তুই মর্ আয়ুগান বানা চের্ আঙুলো সং গোজ্যচ্; তর্ চোগেন্দি মর্ জিংকানিগান কিচ্চু নয়। মানুচ্ তার্ বেক্কানিন্দি সয়সাগোজ্যে অবস্থাদ্‌অ বানা এক্কো নিজেস্ বাদে আর্ কিচ্চু নয়।

⁶ মানুচ্ এজন্দে ছাবা ধোক্ক্যেন্, যান্দেয়ো ছাবা ধোক্ক্যেন; তে মিজে মিজে কিজিক্ কাজাক্ গরে; তে ধন-সোম্বোত্তি তুবোয় মাত্তর্ কন্না সিয়েন ভোগ গুরিবো হবর্ ন-পায়।

⁷ ও প্রভু, সালে মুই আর কি আজালোই থেম? মর্ বেক্ আজাগানি দঅ তইদু।

⁸ মর্ বেক্ অন্যেয়ানিত্তুন্ তুই মরে সোরেই নেযা; যিগুনোর বিবেক্ মরা তারা ইদু তুই মরে চিগোন ন-গুরিচ্।

⁹ মুই জুরো গুরি আগং, মুয়োন ন-খুলিম, কিয়া তুয়ই এ দুঃখানি অবাত্তে দুয়োচ্।

¹⁰ মঅ উগুরেত্তুন্ তর্ সাজাগান তুই সোরেই নেযা; তর্ আঢে মের্ খেইনে মুই পেরাই শেজ্ ওই যেইয়োং।

¹¹ পাপত্তে তুই যেক্কেনে মান্‌জ্যরে দরমর গুরিনে কধালোই শাজন্ গরচ্, সেক্কেনে পুক্-যুগো ধোক্ক্যেন গুরিনে তারার দোলান্ তুয়ই বর্‌বাদ্ লাগেই দুয়োচ্; মানুচ্ দঅ এক্কো নিজেস ধোক্ক্যেন্।

¹² “ও লগেপ্রভু, তুই মর্ তবনাগান শুন; এজাল্ পেবাত্তে মর্ এ কানানিগান তুই শুন্; মর্ চোগো পানিগান দেগিনে তুই অলর্ গুরি ন-থেচ্; কিত্যে মর্ পূরোণি বুড়োবুড়িগুনে যেধোক্ক্যেন্ এলাক্ সেধোক্ক্যেন মুইয়ো পিত্‌থিমীত্ তর্ মুজুঙোত্ পরবাস্যে ধোক্ক্যেন্ আগং।

¹³ মঅ উগুরেত্তুন তর্ চানাগান সোরেই নেযা, যেনে যেবার্ আগেন্দি, শেজ্ ওই যেবার আগেন্দি, আরঅ মুই হুজি ওই পারং।”