গীতসংহিতা 37 - Chakma Bibleদায়ূদোর গান। 1 তুই পাজি মানুচ্চুনোর বেপারানিলোই চিদে ন-গুরিচ্, বা অন্যেয় গুরিয়্যেগুনোরে দেগিনে ইংসে ন-গুরিচ্; 2 কিয়া ঘাস ধোক্ক্যেন্ তারা যাদিমাদি শুগেই যেবাক্ আর য়েল্ পাদা-গাজ ধোক্ক্যেন্ বেশ্ ন-টিগিবাক্। 3 লগেপ্রভু উগুরে বিশ্বেজ্ রাগা আর গম্ কাম গর্ নিজো দেজত্ বজত্তি গর্, বিশ্বেজ্ গুরিনে জিংকানি কাঢা। 4 লগেপ্রভুরে নিইনে রঙ্গ-ফুত্তিয়ে থাগ্; তর্ মন আওজ্ছান্ তেয়ই পূরেই দিবো। 5 তর্ জিংকানি-চলিবার ভারান্ লগেপ্রভু উগুরে ফেলেই দে; তা উগুরে বিশ্বেজ্ গর্, তেয়ই বেক্কানি গুরিবো। 6 তেয়ই তর্ ধার্মিকতাগানরে পহর্ ধোক্ক্যেন ফোট্ফোট্যে গুরিবো; তর্ ন্যায় কামানরে দিবুজ্যে রোদো ধোক্ক্যেন সাব্ গুরিবো। 7 লগেপ্রভুর মুজুঙোত্ শান্ত অ; ধৈর্য্য ধুরিনে তাত্তেই বাজ্জেই থাগঅ। নিজোর্ কামানি ফোলেবাত্তে যে মানুচ্চো তার্ পাজি সল্লাগান কামত্ লাগায়, সিয়েনত্তে তুই মনান্ যাগুলুগ্ ন-গুরিচ্। 8 রাগ গরানা বন্ধ গর্, মেজাজ্ দেগানা বাদ্ দে; মনান্ যাগুলুগ্ ন-গুরিচ্, কিত্যে সিয়েনে তরে বানা ভান্ন্যেয়ন্দি নেযায়। 9 পাজি মানুচ্চুনোরে ভস্ত গরা অবঅ, মাত্তর্ লগেপ্রভু উগুরে যিগুনে আজা রাগান্ তারা দেজর্ ভাগ্ পান। 10 আর কয়েকদিন পরেদি পাজিগুনে শেজ্ ওই যেবাক্; তোগেলেয়ো তারার্ জাগায়ানিত্ পাহ্ ন-যেবঅ। 11 মাত্তর্ নম্র মানুচ্চুনে দেজর্ ভাগ্ পেবাক্; বোউত্ বর্ পেইনে তারা হুজিয়ে নাজি উদিবাক্। 12 গোজেন ভক্তগুনো বিরুদ্ধে পাজিগুনে সল্লা গুরিবাক্ আর তারার বিরুদ্ধে দাত্ কামেরেবাক্। 13 প্রভু হবর্ পায় পাজিগুনোর্ শেজর্ দিনুন্ ঘোনেই এজের্, সেনত্তে তারারে দেগিনে তে আযে। 14 দুঘি আর নাদা মানুচ্চুনোরে নাশ গুরিবাত্তে, গম্ পধেদি আঢন্দে মানুচ্চুনোরে মারে ফেলেবাত্তে, পাজিগুনে লাম্বাছুড়ি নিগিলেন আর ধনুলোই মারন্। 15 মাত্তর্ তারার্ লাম্বা ছুড়িগানি তারার্ বুগুদ্ সোমেব আর তারার্ ধনুগানি ভাঙি যেবঅ। 16 বোউত্ পাজি মান্জ্যর্ ভালোক্কানি ধন আঘে, মাত্তর্ গোজেন ভক্তগুনোর্ যিয়েনি আঘে সিয়েনিই যদেষ্ট। 17 পাজিগুনোর আঢ্তানি ভাঙি যেবঅ, মাত্তর্ লগেপ্রভু গোজেন ভক্তগুনোরে ধুরি রাগেব। 18 নিদ্দুযি মানুচ্চুনোর পত্তিদিনোর জিংকানিগানি লগেপ্রভু হবর্ পায়; তারার্ পাইদে সোম্বোত্তিগানি উমরত্তে থেবঅ। 19 দুঘো দিনোত্ তারা লাজত্ ন-পড়িবাক্; রাদঅ দিনোত্ তারা যদেষ্ট হানা পেবাক্। 20 মাত্তর্ পাজি মানুচ্চুনে ভস্ত ওই যেবাক্; লগেপ্রভুর শত্রুগুনে দোল্ ক্ষেদ্-ক্ষেত্তি ধোক্ক্যেন্ মিলেই যেবাক্, মিলেই যেবাক্ ধূমো ধোক্ক্যেন্ গুরি। 21 পাজিগুনে উদোর্ লোইনে ন-সুজোন্, মাত্তর্ গোজেন ভক্তগুনে দোয়্যেলু আর দানবলা। 22 লগেপ্রভু যিগুনোরে বর্ দে তারা দেজর্ ভাগ্ পেবাক্, মাত্তর্ যিগুনোরে তে অভিশাব দে তারারে ভস্ত গরা অবঅ। 23 লগেপ্রভু দরমর মানুচ্চুনোর আঢিবার পথ্তানি ঠিগ্ গুরি দে; তারার্ জিংকানিগানি দেগিনে তে হুজি অয়। 24 পড়ি গেলেয়ো তারা পড়ি ন-থেবাক্, কিত্যে লগেপ্রভুর আঢ্তানিয়ে তারারে ধুরি রাগেয়্যে। 25 মুই গাবুজ্যে এলুং, ইক্কিনে বুড়ো ওইয়োং, মাত্তর্ গোজেন ভক্তগুনোরে বাদ দিয়্যে ওইয়্যে বা তারার্ বংশধরুনোর ভিক্ষ্যে গরা পরের্ এধোক্ক্যেন্ মুই ন-দেগং। 26 গোজেন ভক্তগুনে আমিঝে দোয়্যেলু অন্ আর উদোর্ দুয়োন্; তারার্ বংশধরুনে আশিদবাদ্ পেবাক্। 27 ভান্ন্যেয়ানি ছাড়ি দুয়ো আর গম্ কাম গরঅ, সেক্কে জিংকানিবর্ বাঁজি থেবে। 28 লগেপ্রভু ন্যায়বিচের গমপায়; তা ভক্তগুনোরে তে ছাড়ি ন-যায়। জিংকানিবর্ তারারে রোক্ষ্যে গরা অবঅ, মাত্তর্ শদানর বংশধরুনোরে ভস্ত গরা অবঅ। 29 গোজেন ভক্ত মানুচ্চুনে দেজর্ ভাগ পেবাক্ আর সিদু জিংকানিবর্ বজত্তি গুরিবাক্। 30 গোজেন ভক্তগুনোর্ মুয়োনিয়ে জ্ঞানর কধা ফগদাং গরে; তারার্ জিলানিয়ে ন্যায়বিচেরর্ কধা কয়। 31 তারার গোজেনর উগুমানি তারা মনানিত্ আঘে; তারার টেঙানি বিজিদি ন-যেবঅ। 32 পাজি মানুচ্চুনে গোজেন ভক্তগুনোত্তে উৎ পাদি থান্, তারারে মারে ফেলেবার চেরেষ্টা গরন। 33 মাত্তর্ লগেপ্রভু পাজিগুনোর আঢত্ তারারে ছাড়ি ন-দিবো; বিচেরত্ তারারে দুষী অবাত্তে ন-দিবো। 34 লগেপ্রভু উগুরে আজা রাগা, তা পধেন্দি আঢিচ্; তে তরে দাঙর্ গুরিবো যেনে তুই দেজর্ ভাগ্ পাজ্। পাজিগুনে ভস্ত অলে তুই সিয়েন দেগিবে। 35 চিৎনপুজ্যে মানুচ্চোরে মুই দাঙর্ অদে দেখ্যং, দেখ্যং নিজোর্ জাগানত্ থেইয়্যে ডেলালোই ছিদি পোজ্যে পাদালোই ভোজ্যে গাজ ধোক্ক্যেন্। 36 সে পরেন্দি তে শেজ্ ওই গেল, আর্ ন-রলঅ; মুই তারে তোগেলুং, তারে পাহ্ ন-গেলঅ। 37 নিদ্দুযি মানুচ্চুনোর জিংকানিগানি ইন্দি চাহ্; সেই গম্ মানুচ্চুনো ইন্দি চাহ্। যিগুনে সুগ্-শান্দি গম্ পান তারার্ বংশগুন থেবাক্। 38 মাত্তর্ পাপিগুনে শেজ্ ওই যেবাক্; সেই বেক্ পাজি মানুচ্চুনোর বংশগুন শেজ্ ওই যেবাক্। 39 গোজেন ভক্তগুনোর্ উদ্ধোর অনাগান লগেপ্রভু ইত্তুন্ এজে; দজার্ সময়োত্ তেয়ই তারার্ আশ্রয়। 40 লগেপ্রভুই তারারে সাহায্য আর রোক্ষ্যে গরে; পাজিগুনোর আঢত্তুন তেয়ই তারারে উদ্ধোর গরে, আর তেয়ই তারারে বাঁজাই, কিয়া তারা তাইদু আশ্রয় নেযেয়োন। |
Copyright © 2021 Bangladesh Bible Society
Bangladesh Bible Society