গীতসংহিতা 36 - Chakma Bible

গান পরিচালগত্তে। লগেপ্রভুর চাগর্ দায়ূদোর গান।

¹ পাজিগুনোর দুষোর্ পৌইদ্যেনে মঅ মনানে গোজেনর্ এ বাণীগান পেইয়্যে, “পাজিগুনে গোজেনরে ন-দরান্।”

² তারা নিজো পৌইদ্যেনে বড়াই গুরি কন্দে, গোজেনে তারার্ পাপ্পানি ন-ধুরিবো, ঘিনাইদে চোগেন্দিয়ো ন-দেগিবো,

³ তারার্ মুয়ো কধানি বজং আর ছলনালোই ভরা; বুদ্ধিবলা ধোক্ক্যেন চলানা তারা বাদ দুয়োন্, আর বাদ দুয়োন্দে গম্ কাম গরানা।

⁴ বিচ্চোনত্ পুরিনেয়ো তারা বজং বুদ্ধি গরন্; তারা অন্যেয় পধেদি নিজোরে ছাড়ি দুয়োন্ আর ভান্ন্যেইয়ানি কোচ্‌পান্।

⁵ ও লগেপ্রভু, তর্ অমকদ কোচ্‌পানা আগাজত্ লুমেগোই; তর্ বিশ্বেজ্‌ছান্ যেনে আগাজত্ লুমেগোই।

⁶ তর্ ধার্মিকতাগান গোজেন মুড়োগুনো ধোক্ক্যেন্; তর্ ন্যায়বিচেরান যেন গভিন্ সাগর ধোক্ক্যেন্। ও লগেপ্রভু, মানুচ্ আর য়েমান বেক্কুনোরে তুয়ই বাঁজে রাগাচ্।

⁷ ও গোজেন, তর্ অমকদ কোচ্‌পানাগানর্ দাম দিইনে শেজ্ গরা ন-যায়; তর্ ডুয়োগানর্ ছাবাবোলোই মানুচ্চুনে আশ্রয় পান।

⁸ তর্ ঘরর্ নানান্ বাবোত্যে হানা হেইনে তারার্ ঈল্ অয়; তর্ হুজির্-গাঙ পানিগান তুই তারারে হেবাত্তে দে।

⁹ তইদু জিংকানির উইফুদ্ আঘে; তর্ পহ্‌‌রে আমি পহ্‌‌র দেগিই।

¹⁰ যিগুনে তরে হবর্ পান তারা উগুরে যেনে তর্ অমকদ কোচ্‌পানা আমিঝে থায়; যিগুনোর মনান্ দোল্ তারা যেনে আমিঝে তর্ ন্যায়বিচের্ পান।

¹¹ মরে বার্‌বো গোজ্যে মানুচ্চুনোর টেঙর্ তলে ন-ফেলেচ্। পাজিগুনে যেনে মরে ধাবেই দি ন-পারন্।

¹² যিগুনে বজং কাম গুরিনে বেড়ান্ চাহ্ তারা ধরা পোজ্যন্; তারারে ফেলেই দিয়্যে ওইয়্যে, তারা আর্ উদি ন-পারিবাক্।