গীতসংহিতা 33 - Chakma Bible1 ও গোজেন ভক্ত মানুচ্চুন, লগেপ্রভুর পৌইদ্যেনে তুমি হুজির্-গান গঅ; তার্ গুনগান গরানা খাটি মানুচ্চুনোর কাম। 2 বীণা বাজেইনে লগেপ্রভুরে ভালেদি জানঅ; তার্ নাঙে দশ তারর্ বীণা বাজঅ। 3 তার্ নাঙে নুয়ো গান গঅ, কাবিল্ আত্তোই বাজানা বাজঅ আর হুজিয়ে রঅ ছাড়। 4 লগেপ্রভুর্ কধানি সত্য, তার্ বেক্ কামানিত্ তে বিশ্বেজি। 5 লগেপ্রভু ন্যায় কাম আর ন্যায় বিচেরানি গম্ পায়; সারা পিথ্তিমীগান পোজ্যে আগেদে তার্ ন-ফুরেইয়্যে কোচ্পানা। 6 লগেপ্রভুর কধালোই পিথ্তিমীগান ওইয়্যে; সিয়েন ভিদিরে বেক্কানি ওইয়্যেদে তা মুয়ো নিজেস্চোই। 7 তে সাগর পানিগান এগত্তর্ গুরিনে তুবেয়্যে, আর নানান্ ভান্ডালত্ সে গভীন পানিগান রাগায়। 8 পিথ্তিমীর বেক্ মানুচ্চুনে লগেপ্রভুরে ভোক্তি গোরোদোক্, জগদ মানুচ্চুনে বেক্কুনে তা দরে গির্গিরাদোক্; 9 কিত্যে তে কলঅ আর বেক্কানি বানা অলঅ; তে উগুম দিলো আর বেক্কানি থিদেবর্ অলঅ। 10 বেক্ জাদ্তুনোর সল্লাগানি লগেপ্রভুই অকেজো গুরি দে; তারার্ চিদে চজ্জানি তেয়ই বিফল গুরি দে। 11 মাত্তর্ লগেপ্রভুর সল্লাগানি উমরত্তে টিগি থায়; তা মনান্ যুগে যুগে থিদেবর্ থায়। 12 বর্পেইয়্যে সেই জাদ্তো, যিগুনোর গোজেন লগেপ্রভু; সে মানুচ্চুনে বর্পেইয়্যে, যিগুনোরে তে নিজোর সোম্বোত্তি ইজেবে বেঈ নেযেয়্যে। 13 লগেপ্রভু স্বর্গত্তুন্ তলেন্দি রিনি চায় আর বেক্ মানুচ্চুনোরে খিয়েল্ গরে। 14 যিগুনে পিত্থিমীত্ বজত্তি গরন্ তার্ থেবার জাগানত্তুন্ তে তারারে খিয়েল্ গরে। 15 বেক্কুনোর্ মনানি তেয়ই বানেই দিয়্যে; তারা যিয়েনি গরন্ সিয়েনি তে বুঝি পারে। 16 দাঙর্ সৈন্যদল থেলেয়ো কনঅ রাজা সিয়েনিলোই রোক্ষ্যে ন-পায়; দাঙর্ বল্লোই অলেয়ো কনঅ বীর যোদ্ধাই রোক্ষ্যে ন-পায়। 17 রোক্ষ্যে পেবাত্তে ঘোড়া উগুরে বিশ্বেজ্ গরানা মিজে আজা; অমকদ বল্ থেলেয়ো ঘোড়াবো রোক্ষ্যে গুরি ন-পারে। 18 মাত্তর্ লগেপ্রভু উগুরে যিগুনোর ভক্তিবলা দর্ আঘে, যিগুনে তার্ অমকদ কোচ্পানাগান উগুরে আজা রাগান্, তারার্ উগুরে তার খিয়েল্ আঘে; 19 যেনে মরণত্তুন্ তে তারারে রোক্ষ্যে গুরি পারন্ আর ভাদ রাদত্ বাঁজেই রাগে পারে। 20 আমি লগেপ্রভুত্তে বাজ্জেই আগিই; তেয়ই আমার এযাল্দিয়্যে আর আমা ঢাল। 21 অয়, তারে ঘিরি রোইয়্যেদে আমা মনর্ রঙ্গ-ফুত্তিগানিয়ে, কিত্যে আমি তার্ পবিত্রতাগান উগুরে বিশ্বেজ্ গুরিই। 22 ও লগেপ্রভু, আমা উগুরে তর্ কোচ্পানা থোক্, কিত্যে আমি তঅ উগুরে আমার আজানি রাগেয়্যেই |
Copyright © 2021 Bangladesh Bible Society
Bangladesh Bible Society