গীতসংহিতা 32 - Chakma Bible

দায়ূদোর মস্কীল-গান।

¹ বর্‌পেইয়্যে সেই মানুচ্চো, যিবের্ গোজেন উগুরে উল্লোমীগানি খেমা গরা ওইয়্যে, যিবের্ পাপ্পানি ঢাগি দিয়্যে ওইয়্যে।

² বর্‌পেইয়্যে সেই মানুচ্চো, যিবের্ অন্যেয়ানি লগেপ্রভু খেমা গোজ্যে আর যিবের্ মনত্ কনঅ ছলনা নেই।

³ মুই যেক্কেনে পাপ স্বিগের্ ন-গরং সেক্কেনে সারা দিন্নো ভঅ নিজেস্ ফেলাদে ফেলাদে মঅ আড়ুন্ ক্ষয় যাদন্;

⁴ কিত্যে সেক্কেনে দিনে-রেদে মঅ উগুরে তর্ আঢঅ চাপ্পান্ গুয়োর্ এলঅ; হরান্যেকালর্ গরমে যেধোক্ক্যেন্ অয় সেধোক্ক্যেন গুরি মর্ কি্য়্যের্ বলান কুমি যার্।

⁵ সেক্কেনে মঅ পাপ্পান্ মুই তইদু স্বীগের্ গুরিলুং, মঅ অন্যেয়ান্ মুই আর্ ঢাগি ন-রাগেলুং। মুই কোইয়োংগে, “মর্ উল্লোমির কধা মুই লগেপ্রভু ইদু স্বীগের্ গুরিম।” সেনত্তে পাপর্ কারনে মঅ দুষ্‌ছানি তুই খেমা গুরি দিলে।

⁶ সেনত্তেই যেদকদিন সুযোগ আঘে সেদকদিন তর্ ভক্তগুনে তইদু তবনা গোরোদোক্; ঘেচ্চেকগুরি, দজা যেক্কেনে বান পানি ধোক্ক্যেন্ দেগা দিবো সেক্কেনে সিয়েন্ তারা ইদু ন-এবঅ।

⁷ তুয়ই মর্ পৌল্যেই থেবার জাগা। তুই মরে দুঘোত্তুন্ রোক্ষ্যে গোজ্যস্। উদ্ধোরর হুজিয়ে-গানে তুয়ই মরে ঘিরি রাগেয়োচ্।

⁸ মুই লগেপ্রভু তরে জ্ঞান দিম্ আর যে পধ্‌থানদি যাহ্ পুরিবো সিয়েন দেগেই দিম; তরে চোগে চোগে রাগেইনে মুই উগুম দিম।

⁹ তুমি ঘোড়া বা গাধা ধোক্ক্যেন ন-ওয়ো যিগুনোর বুঝিবার খেমতা নেই; মুয়োত্ লাগাম আর দুড়িলোই তারারে দোঙেই রাগা পড়ে, সিয়েনি ন-দিলে তারা তমা ইদু ন-এবাক্।

¹⁰ পাজি মানুচ্চোর বোউত্ দুখ্‌পা পড়ে, মাত্তর্ যে লগেপ্রভু উগুরে বিশ্বেজ্ গরে লগেপ্রভুর গভীন্ কোচ্‌পানায় তারে ঘিরি রাগায়।

¹¹ ও গোজেন ভক্ত মানুচ্চুন, লগেপ্রভু যেনে তমার্ ফুত্তির্ বিষয় অয়, তারে নিনেই তুমি হুজি অ; তুমি যিগুনে মনদি সোলিড্, তুমি বেক্কুনে হুজির্-গীদ্ গঅ।