গীতসংহিতা 18 - Chakma Bibleগান পরিচালগত্তে। লগেপ্রভুর চাগর্ দায়ূদোত্তে। লগেপ্রভু যেক্কে দায়ূদোরে শৌল আর তার্ অন্য শত্রুগুনো আঢত্তুন্ উদ্ধোর্ গুরিলো সেক্কেনে তে লগেপ্রভুর নাঙে এ গান্নো গেইয়্যে। 1 ও লগেপ্রভু, তুয়ই মর্ বল্, মুই তরে কোচপাং। 2 লগেপ্রভু মর্ অজল্ মুড়ো, মর্ ঘর আর মর্ উদ্ধোর্ গুরিয়্যে; মর্ গোজেন মর্ অজল্ মুড়ো, তাইদু মুই আশ্রয় নেযাং। তেয়ই মর্ ঢাল, মর্ রোক্ষ্যেগুরিয়্যে শিং, মর্ অজল্ আশ্রয়-জাগা। 3 লগেপ্রভুরে নাঙ্ গিনিবার, মুই তারে ডাগং; সেক্কে মর্ শত্রুগুনো আঢত্তুন্ মুই রোক্ষ্যে পাং। 4 মরণ দুড়িত্ মুই বানা হেইয়োং, ভস্ত অইদ্যে গঙারত্ মুই ভাজি যেইয়োং। 5 মরণ দুড়িত্ মুই বানা হেইয়োং, মত্তেই মরণ ফাল্ পাদা ওইয়্যে। 6 মুই এ দজাত্ মর্ গোজেন লগেপ্রভুরে ডাগিলুং আর বল্ পেবাত্তে তাইদু কানাকুদি গুরিলুং। তার্ থেবার ঘরানত্তুন্ তে মর্ রঅবো শুনিলো; মর্ কানানিগান তাইদু লুমিলো আর তা কানত্ গেলঅ। 7 সেক্কে পিত্থিমীগান গির্গিরে উদিলো আর লুরিলো, গির্গিরে উদিলো বেক্ মুড়োগুনোর্ গড়াগানি; তা রাগে সিগুন্ গির্গিরেলাক্। 8 তা নাগত্তুন্ ধূমোগান উগুরে উদিলো, তা মুয়োনত্তুন্ ভস্তগুরিয়্যে আগুনান্ নিগিলি এলঅ, তা মুয়ো আগুনান্ আঙারালোই জুলি উদিলো। 9 তে আগাজ্ছান বেঈনে লামি এলঅ; তা টেঙ তলে এলদে ঘুর্গুজ্যে আন্ধার্ মেঘ। 10 তে করূবোত্ চড়িনে উড়ি এলঅ, উড়ি এলদে বোইয়্যের ডুয়োলোই ভর্ গুরিনে। 11 তে আন্ধারলোই নিজোরে ঘিরিলো; তা চেরোকিত্তে থেলদে আগাজর্ ঘুর্গুজ্যে ঝড় মেঘ। 12 তা পহ্রান মুজুঙোত্ কালা মেঘকান্ সুরি গেলঅ; শিলোঝড় আর আগাজ বাজ্ পড়িলাক্। 13 লগেপ্রভু আগাজত্ গুজুরি উদিলো; আগাজ বাজ্ আর শিলো ঝড়ত্ দাঙর্ গোজেন রবুয়ো শুনো গেলঅ। 14 তে সেল্ মারিনে শত্রুগুনোরে ছিদি দিলো, আর ঝিমিলেনে তারারে ছিত্রিভংগ গুরিলো। 15 ও লগেপ্রভু, তর্ ধমক্কোই আর নিযেজে মাদি তলাত্তুন্ পানি দেগা দিলো, পিত্থিমীর ভিদিরেদিগান নিগিলিলো। 16 তে উগুরেত্তুন্ আঢ্ বাবেইনে মরে ধুরিলো, গভীন্ পানি ভিদিরেত্তুন্ মরে টানি তুলিলো। 17 মর্ বোলীবন্ধ শত্রুগুনো আঢত্তুন্ তে মরে বাঁজেল; বাজেল বিপক্ষগুনো আঢত্তুন্ যিগুনোর্ বল্ মত্তুনঅ বেশ্। 18 দযার্ দিনোত্ তারা মঅ উগুরে ঝাবেই পড়িলাক্, মাত্তর্ লগেপ্রভু মরে ধুরি রাগেল। 19 তে মরে এক্কান্ খুলো জাগাত্ নিগিলেই আনিলো; মঅ উগুরে হুজি এলঅ বিলিনে তে মরে উদ্ধোর্ গুরিলো। 20 মর্ ন্যায় কাম্ মজিম্ লগেপ্রভু মরে দান গুরিলো, মঅ কামর্ সিজি মজিম্ বক্শিজ্ দিলো; 21 কিয়া লগেপ্রভুর পধেদি মুই আঢাউদো গোজ্যং; ভান্ন্যেই কাম গুরিনে মঅ গোজেনর্ কায়-কুরেত্তুন সুরি ন-যাং। 22 তার্ বেক্ সুদোমানি মঅ মুজুঙোত্ আঘে; তার্ সুদোমত্তুন্ মুই সুরি ন-যাং। 23 তা মুজুঙোত্ মুই নিদ্দুযি এলুং; মুই পাপত্তুন দূরোত্ থেইয়োং। 24 সেনত্তে লগেপ্রভু মরে বক্শিজ্ দিয়্যে তা চোগেদি মর্ ন্যায়র্ কাম্ মজিম্, মঅ কামর্ সিজি মজিম্। 25 ও লগেপ্রভু, তুই বিশ্বেজিগুনো সমারে বিশ্বেজি বেবহার গর্, নিদ্দুষিগুনো সমারে নিদ্দুযি বেবহার গর্, 26 গম্ মানুচ্চুনো সমারে গম্ বেবহার গর্, আর কুজুরোমিগুনোরে দেগা তর্ বুদ্ধির্ খেলা। 27 তুই দুখিগুনোরে রোক্ষ্যে গুরি থাচ্ আর বার্বোগুনোরে তলে লামাচ্। 28 তুই মর্ জিংকানি-চেরাগ্কো জ্বালেই রাগা; মর্ গোজেন লগেপ্রভু মর্ আন্ধারানরে পহ্র্ গর্। 29 তর্ বলে মুই সৈন্য দলুনো উগুরে ঝাবেই পড়ি পারং, আর মঅ গোজেনর বলে ঝাম্ দিইনে দেবালান পার্ ওই পারং। 30 গোজেন পধেদি কনঅ ভেজাল্ নেই; লগেপ্রভুর কধানি খাটি বিলিনে ফগদাং ওইয়্যে। তেয়ই তাইদু আশ্রয় লোইয়্যে বেক্কুনোর্ ঢাল। 31 লগেপ্রভু বাদে গোজেন আর্ কন্না আঘে? আমা গোজেনে বাদে আর কি কনঅ আশ্রয়-মুড়ো আঘে? 32 গোজেনে মঅ কমরত্ বল্ দিয়্যে আর সাব্ গোজ্যে মঅ আঢিবার পথ্তান। 33 তে মরে উরিঙো ধোক্ক্যেন্ গুরি ফাল্যে ফাল্যে যেবার বলান্ দিয়্যে; অজল্ অজল্ জাগাত্ তে মরে থিয়্যেই রাগেয়্যে। 34 তাত্তুন্ মঅ আত্তানিয়ে যুদ্ধো গুরিবাত্তে শিক্ষ্যে, সেনত্তে মঅ আত্তানিয়ে পিদোল ধনুগানিরে বেঙা গুরি পারে। 35 ও লগেপ্রভু, তর্ রোক্ষ্যেগুরিয়্যে ঢাল্ তুই মরে দুয়োচ্, তর্ ডেন্ আঢ্তানে মরে ধুরি আঘে; তর্ যত্তন্দোই তুই মরে দাঙর্ গোজ্যচ্। 36 তুই মর্ আঢিবার পথ্তান্ সোজা গোজ্যস্, সেনত্তে মঅ টেঙত্ উজোত্ ন-লাগে। 37 মর্ শত্রুগুনোরে লোড়েইনে মুই ধুরি ফেলেয়োং; তারা ভস্ত ন-অনা সং মুই পিজেদি ন-ফিরোং। 38 মুই তারারে গুড়ি গুরি দুয়োং, যেন তারা আর্ উদি ন-পারন্; তারা মঅ টেঙত্ তলে পোজ্যন্। 39 তুয়ই মঅ কমরত্ যুদ্ধো গুরিবার্ বলান্ দুয়োচ্, মর্ বিপক্ষগুনোরে মঅ টেঙত্ তলে গোজ্যস্। 40 মঅ শত্রুগুনোরে তুই মত্তুন্ পৌল্যেবাত্তে বাধ্য গোজ্যস্; যিগুনে মরে ঘিনান্ তারারে মুই ভস্ত গোজ্যং। 41 তারা বল্ পেবাত্তে রঅ ছাড়দন্, মাত্তর্ কনজনে তারারে রোক্ষ্যে গুরিবাত্তে ন-এজন্। তারা লগেপ্রভু ইদু রঅ ছাড়দন্, মাত্তর্ তেয়ো তারারে জোব্ ন-দে। 42 বোইয়্যেরে উড়ে নেযেয়্যে ধূল্যা ধোক্ক্যেন্ মুই তারারে নিগুজ্ গোজ্যং, পদ পেক্কো-মাদি ধোক্ক্যেন্ তারারে ফেলেই দুয়োং। 43 ও লগেপ্রভু, মানুচ্চুনোর উল্লোমিত্তুন্ তুই মরে উদ্ধোর্ গোজ্যস্, অন্য জাদ্তুনো উগুরে মরে নেতা বানেয়োচ্; মুই যিগুনোরে ন-চিনিদুং তারায়ো মঅ তলেদি ওইয়োন। 44 মঅ কধানি শুনিলে তারা মঅ অধিনতা স্বীগের্ গরন্; উল্লোমি মনভাব্পোই বিদেশিগুনে মর্ বাধ্য অন্। 45 তারা আজা নেইয়্যে ওইয়োন্; তারা গির্গিরেদে গির্গিরেদে ঘরত্তুন্ নিগিলোন্। 46 লগেপ্রভু জেদা। মর্ আশ্রয়-মুড়োবোর বাঈনী ওক্। মর্ উদ্ধোর্ গুরিয়্যে গোজেন সর্মানান্ বাড়োক্। 47 তেয়ই অন্য জাদ্তুনোরে মঅ অধীনোত্ আনে আর মঅ পক্ষেদি তারার্ পাওনা সাজা দে। 48 তে শত্রুগুনোর্ আঢত্তুন্ মরে রোক্ষ্যে গরে। ও গোজেন, তুই মরে শত্রুগুনো উগুরে তুল্যচ্, অত্যেচারিগুনোর্ আঢত্তুন্ তুয়ই মরে রোক্ষ্যে গোজ্যস্। 49 ও লগেপ্রভু, ইয়েনত্তে অন্য জাদ্তুনো ভিদিরেত্তুন্ মুই তর্ বাঈনী ফগদাং গুরিম আর তরে নাঙ্ গিনিম্। 50 লগেপ্রভু তার্ রাজাবোরে ভালোকবার জিদেই দিয়্যে; অয়, তার্ অভিষেগ্ গোজ্যে মানুচ্চো উগুরে, দায়ূদ আর তার গুট্টিগুনো উগুরে, তে উমরত্তে তার থুম্ ন-ওইয়্যে কোচ্পানাগান্ দেগায়। |
Copyright © 2021 Bangladesh Bible Society
Bangladesh Bible Society