গীতসংহিতা 17 - Chakma Bibleদায়ূদোর তবনা গরানা। 1 ও লগেপ্রভু, তুই ন্যায়র্ কধা শুনোচ্, মঅ কানানিগান কান্ পাত্; মর্ ছলনা নেইয়্যে মুয়োর্ তবনাগান শুন্। 2 মঅ উগুরে তঅ বিচেরান যেন ন্যায্য অয়; যিয়েন সত্য সিয়েন্ তঅ চোগোত্ ধরা পোড়োক্। 3 তুই দঅ মঅ মনানত্ সুমিনে চেইয়োচ্ আর রেদোত্ মরে যগা চেইয়োচ্; মরে পুযোর্ গুরিয়ো চেইয়োচ্ মাত্তর্ কনকিজু ন-পাজ্। মুই ঠিগ্ গোজ্যংগে কনঅ পাপ কধা মর্ মুয়োন্ মুই বেবহার ন-গুরিম। 4 মান্জ্যে যেদক্কানি কাম গরন সিয়েনি ন-গুরিনে তর্ মুয়ো কধালোই জুলুমোর্ পদত্তুন্ মুই নিজোরে সোরেই রাগেয়োং। 5 তঅ পধেদি মুই মঅ টেঙান্ থির্ রাগেয়োং; সিয়োত্তুন মঅ টেঙান্ এক্কেনায়ো ন-লরে। 6 ও গোজেন, তুই মঅ ডাগনিলোই শুনিবে, সেনত্তে মুই তরে ডাগঙর্; মঅ কধাগান শুন্, মঅ তবনাগান শুন্। 7 তর্ অমকদ কোচ্পানাগান আমক্ অইদে ধোক্ক্যেন গুরি ফগদাং গর্; শত্রুগুনো আঢত্তুন রোক্ষ্যে পেবাত্তে যিগুনে তইদু আশ্রয় নেযান, তুই ডেন্ আঢ্তোই তারারে রোক্ষ্যে গুরি থাচ্। 8-9 চোগো মানেগ ধোক্ক্যেন গুরি তুই মরে রোক্ষ্যে গর্; যিগুনে মঅ উগুরে অত্যেচার্ গরন্ সে পাজিগুনোত্তুন্, যিগুনে মারে ফেলেবাত্তে মরে ঘিরি আগন্ সে শত্রুগুনোত্তুন্, তুই মরে তর্ ডুয়োগানি ছাবালোই রাগা। 10 তারার বাজে মনর্ দুয়োরান তারা নাঢি রাগেয়োন; তারার্ মুয়োদি বার্বো কধা নিগিলে। 11 তারা ইক্কিনে আমারে ঘিরি ফেলেয়োন্, আমার্ কন জাগাত্ যেবার্ পথ নেই। তারা আমা উগুরে কড়া নজর্ রাগেয়োন যেনে মাদিত্ আমারে ফেলেই দি পারন। 12 তারা সিংহ ধোক্ক্যেন শিগেরত্তে পাগল, যেনে আন্দলে হাফ্দি থেইয়্যে দামাড়া সিংহ। 13 ও লগেপ্রভু, তুই উঠ্, তারারে থামা, তারারে মাদিত্ ফেলেেই দে। তর্ লাম্বা ছুড়িলোই পাজিগুনোর্ আঢত্তুন মরে উদ্ধোর্ গর্। 14 ও লগেপ্রভু, সেই মানুচ্চুনোর্ আঢত্তুন, দুনিয়ে মানুচ্চুনো আঢত্তুন, তুই নিজো আঢে মঅ পরানান্ বাঁজা। তারার এ বক্শিষ্ছানি এ জগদত্ আঘে- তর্ ধন-সোম্বোত্তিগানিলোই তারার পেট ভরে, তারার্ পুয়ো-ছাগুন সয়-সাগোজ্যে অন্, পুয়ো-ছাগুনোত্তে তারা তারার্ ধন-সোম্বোত্তিগানি থোই যান্। 15 মাত্তর্ মুই যেন নিদ্দুজি ওইনে তঅ মুজুঙোত্ থেই পারং, যেন মরণত্তুন্ জাগি উদিনে তরে দেগিনে মুই হুজি অং। |
Copyright © 2021 Bangladesh Bible Society
Bangladesh Bible Society