গীতসংহিতা 16 - Chakma Bible

দায়ূদোর গান। এক্কো মিক্‌‌তাম।

¹ ও গোজেন, তুই মরে রোক্ষ্যে গর্, কিয়া মুই তইদু আশ্রয় নেযেয়োং।

² মুই লগেপ্রভুরে কোইয়োং, “তুয়ই মর্ প্রভু; তুই বাদে আর্ কনকিজুত্ মর্ ভালেদি নেই।”

³ পিত্‌‌থিমীর্ যিদুক্কুন মানুচ্ গোজেনর, তারা দাঙর্; তারারে নিইনে মর্ হুজি।

⁴ যিগুনে দেবেদাগুনোরে বক্‌শীজ্ দিইনে নিজোর্ গুরি নেযান্ তারার্ দুখ্‌কানি বাড়িবো। তারা লোর্ যে ঢালন-উৎসর্ব গরন মুই সিয়েন্ ন-গরং; দেবেদাগুনোর্ নাঙানিয়ো মুই মুয়োত্ ন-আনিম।

⁵ লগেপ্রভু, তুয়ই মর্ সোম্বোত্তি; তুয়ই মর্ তিরেজর্ পানি। মঅ ভাগ্যগান্ তঅ আঢত্ আঘে।

⁶ মঅ দুযি ভিদিরে যে জাগায়ান পোজ্যে সিয়েন্ অমকদ দোল্; মঅ সোম্বোত্তিগান দেগিলে ঘেচ্চেকগুরি চোখ্ জুরোই।

⁷ মুই লগেপ্রভুরে ভালেদি জানাং যিবে মরে গমবুদ্ধি দে; রেদোত্ মঅ মনানে মরে উগুম দে।

⁸ মঅ চোখ্‌কুন আমিঝে লগেপ্রভু ইন্দি আগন্; তে মর্ ডেনেদি আঘে বিলি মুই থির্ থেম।

⁹ ইয়েনত্যে মঅ মনত্ হুজি, মঅ মনানে ফুত্তি গরের্ আর মর্ কিয়্যেগানে গমেডালে থেবঅ;

¹⁰ কিয়া তুই মরে মরণ জাগাত্ ফেলেই ন-রাগেবে, তর্ ভক্তবোর্ কিয়্যেগানরে তুই বর্‌বাদ্ অবাত্তে ন-দিবে।

¹¹ জিংকানির পথ্‌তান্ তুই মরে জানেয়োচ্; তইদু থানা মানে পুরোপুরি হুজিয়ে থানা আর তর্ ডেনেদি রোইয়্যেদে উমরর্ সুখ।