গীতসংহিতা 150 - Chakma Bible

¹ লগেপ্রভুরে নাঙ্ গিনে ওক্। তুমি গোজেনর সুদ্ধো-সাংগ জাগানত্ তারে নাঙ্ গিনো, তার খেমতালোই বানেয়্যে আগাজ ইদু তারে নাঙ্ গিনো।

² তার খেমতাবলা কামানিত্তে তারে নাঙ্ গিনো, তার থুম্ ন-ওইয়্যে গম্ কামানিত্তে তারে নাঙ্ গিনো।

³ তূরী বাজেইনে তারে নাঙ্ গিনো, বীণা আর সুরবাহার বাজেইনে তারে নাঙ্ গিনো।

⁴ ঝোন্‌ঝোনি বাজেইনে নাজি নাজি তারে নাঙ্ গিনো, গিটার আর বাশী বাজেইনে তারে নাঙ্ গিনো।

⁵ দাঙর্ দাঙর্ রঅ গুরিনে করতাল বাজেইনে তারে নাঙ্ গিনো, ঝন্‌ঝন্ গোজ্যে ঝুরি বাজেইনে তারে নাঙ্ গিনো।

⁶ নিজেস্ ফেলেয়্যে বেক্ প্রাণিগুন লগেপ্রভুরে নাঙ্ গিনোদোক্। লগেপ্রভুরে নাঙ্ গিনো।