গম্ উপদেজ্ 9 - Chakma Bible

গম্ বুদ্ধি আর ভান্ন্যেই বুদ্ধিরে ভাত্যেনা

¹ গম্ বুদ্ধিগানে তা ঘরান্ বানেয়্যে; পাত্তর্ কাবিনে তে সাত্তো খুদো বানেয়্যে।

² তে য়েমান কাবিনে য়েরা রান্যে আর আংগুর-রস সমারে মজলা মিজেয়্যে; তে হানা দিইনে টেবিল সাজেয়্যে।

³ তে তা চাগরানিগুনোরে বেক জাগানিত্ পাধেই দিয়্যে, আর শঅরর্ বেগ অজল জাগানিত্তুন্ তে ডাগিনে কত্তে,

⁴ “ভুল্ মানুচ্চুন ইদু এজোদোক।” যিগুনোর বুদ্ধি নেই তারারে তে কয়,

⁵ “এজ, মঅ হানাগান্ হঅ, মর্ মজলা মিজেয়্যে আংগুর-রস হঅ;

⁶ তুই ভুল্ মানুচ্চুনো লগে মিজেনা বাদ দে, সেক্কে তুই বাঁজিবে; তুই বিচেরবুদ্ধির্ পধেদি আঢাউদো গর্।”

⁷ ঠাট্টা-ঈচ্ গুরিয়্যেবোরে যে ঠিগ্ গুরিবাত্তে যায় তে অগমান অয়; পাজি মানুচ্চুনোর দুজ্‌ছানি যে দেগেই দে তারে সে পাজি মানুচ্চো দুষি বানায়।

⁸ ঠাট্টা-ঈচ্ গুরিয়্যেবোরে দুষ্ দেগেই ন-দিচ্, দিলে তে তরে ঘিনেব; বরং জ্ঞানি মানুচ্চোরে তা দুষ্‌ছান দেগেই দে, তে তরে কোচ্‌পেব।

⁹ জ্ঞানী মানুচ্চোরে উবদেজ্ দে, সেক্কে তে আরঅ জ্ঞানি অবঅ; গোজেনভক্ত মানুচ্চোরে শিক্ষ্যে দে, তে আরঅ শিক্ষ্যে পেবঅ।

¹⁰ লগেপ্রভু উগুরে ভোক্তিবলা দরান্ অলঅ গম্ বুদ্ধির গড়াগান্; সেই পবিত্র মানুচ্চোরে জানি পারিলে বিচেরবুদ্ধি পায়।

¹¹ গম্ বুদ্ধিগানে কয়, “মঅ মাধ্যমে তুই ভালোক্ দিন বাঁজি থেবে, তঅ আয়ুগান আরঅ ভালোক্ বজর বাড়িবো।

¹² তুই যুনি জ্ঞানী অস্ সালে তর্ নিজোর লাভ অবঅ, মাত্তর্ যুনি ঠাট্টা-ঈচগুরিয়্যে অস্ সালে তুই গায় গায় দুঘ্ পেবে।”

¹³ বুদ্ধি নেইয়্যে মিলে ধোক্ক্যেন যে রঅ ছাড়ে তে কনঅ মানা ন-মানে, তার জ্ঞান নেই।

¹⁴ তে তার্ ঘর দোরান ইদু শঅরর্ বেগত্তুন অজল্ জাগান আসনানত্ বজে।

¹⁵ যিগুনে সেই পথ্‌তানদি সোজা নিজো পধেদি যান্ তারারে তে ডাগিনে কয়,

¹⁶ “ভুল্ মানুচ্চুনে ইদু এজোদোক্।” যিগুনোর বুদ্ধি নেই তারারে তে কয়,

¹⁷ “চুর্ গোজ্যে পানিগান মিদে; যে হানাগান লুগি লুগি হা অয় সিয়েন অমকদ সুয়োত্ লাগে।”

¹⁸ মাত্তর্ তারা হবর্ ন-পান, মরা মানুচ্চুনে সিয়েনত্ থান; সেই মিলেবোর ভাত্যেয়্যে মানুচ্চুনে মরণ জাগাত্ থান্।