গম্ উপদেজ্ 3 - Chakma Bible

আরঅ গম্ বুদ্ধি দেনা

¹ মঅ পুয়োবো, তুই মঅ শিক্ষ্যেনি ভুলি ন-যেচ্, বেক্ মনান্ দিইনে তুই মঅ উগুমানি পালা;

² কিত্তে সেক্কে তুই বোউত্ আয়ু পেবে আর তর্ বোউত্ ভালেদি অবঅ।

³ বিশ্বেজ্‌চান আর গম কামানিয়ে যেন কনদিন্অ তরে ছাড়িনে ন-যায়; তঅ গত্তনাত্ সিয়েনি বানি রাগা, তঅ মন খাতাদ্ সিয়েনি লিগি রাগা।

⁴ সিয়েনি গুরিলে গোজেন আর মান্‌জ্য মুজুঙোত্ তুই দোয়্যে আর সুনাঙ্ পেবে।

⁵ তর্ বেক মনান্ দিইনে লগেপ্রভু উগুরে নির্ভর গর্; তর্ নিজো বিচের বুদ্ধি উগুরে ভরসা ন-গুরিচ্।

⁶ তর্ আঢিবার পধত্ গোজেনরে মুজুঙোত্ রাগেচ্; তেয়ই তর্ বেক পথ্‌তানি উজু গুরি দিবো।

⁷ তঅ নিজো চোগেদি জ্ঞানি ন-ওচ্; লগেপ্রভুরে ভোক্তিগুরিনে দোরেচ্, ভান্ন্যেই কামত্তুন্ দূরোত্ যাহ্।

⁸ সেক্কে তুই পক্তামক্তা অবে আর তঅ আড়ুন্ মগজবলা অবাক্।

⁹ তঅ ধন-সোম্বোত্তিগানিলোই আর তর্ পৌল্যে কাপ্যে খেত-খেত্তিগানি উৎসর্ব গুরিনে তুই লগেপ্রভুরে সর্মান দেগা;

¹⁰ সেক্কে তর্ গলা ঘরানি শোজ্যলোই ভুরি যেবঅ আর তর্ আড়িগুন্ নুয়ো আংগুর-রসে ভুরি যেবাক্।

¹¹ মঅ পুয়োবো, লগেপ্রভুর শাজনান্ এলাফেলা ন-গুরিচ্, তে গেইল্ দিলে সিয়েন ঈচ্ ন-গুরিচ্;

¹² কিত্তে বাব্‌পো যেবাবোত্যেগুরি তা কোচ্‌পেয়্যে পুয়োবোরে অমকদ গেইল্ দে, ঠিগ্ সেবাবোত্যেগুরি লগেপ্রভু যিবেরে কোচ্‌পায় তারে গেইল্ দে।

¹³ বর্ পেইয়্যে সেই মানুচ্চো যে গম্ বুদ্ধিগানি তোগেইনে পায় আর বিচের বুদ্ধি পায়,

¹⁴ কিত্তে সিয়েনিত্ রূবো বেবসাত্তুন্অ বেশ্ লাভ পাহ্ যায়, সনাত্তুন্‌অ বেশ্ সিয়েনিত্ লাভ অয়;

¹⁵ মণি মুক্তোত্তুন্‌অ বেশ্ গমবুদ্ধিগানি মংগা, তর্ চেবার মত কনঅ জিনিজো সমারে সিয়েনর্ তুলোনা ন-অয়।

¹⁶ তার্ ডেন্ আঢেদি আঘে বোউত্ আয়ু, বাঙ্ আঢেদি আঘে ধন আর সর্মান।

¹⁷ তা পধেদি পাহ্ যায় হুজি, আর তার বেক পধেদি ভালেদি আঘে।

¹⁸ যিগুনে তারে ধরন তারা ইদু সিয়েন জিংকানি গাজ ধোক্ক্যেন্; যিগুনে তারে আক্‌সোনে ধুরি রাগান তারা বর্ পান।

¹⁹ লগেপ্রভু গম্ বুদ্ধি দিইনে পিত্‌থিমীর গড়াগান বানেয়্যে, বিচের বুদ্ধিলোই আগাজ্‌ছানরে তা জাগানত্ রাগেয়্যে।

²⁰ তে জ্ঞান দিইনে মাদি তলেদি পানিগান নিগিলেই আন্যে, আর আগাজত্তুন্ ফুদো ফুদো শিরো পানি পড়ে।

²¹ মঅ পুয়োবো, তুই তরিৎ বুদ্ধি আর বিচের বুদ্ধি রোক্ষ্যে গর্, সিয়েনত্ মনযোগ দিচ্।

²² তত্তে সিয়েন অবঅ জিংকানি, তঅ গত্তনাবোত্তে সিয়েন অবঅ দোল্ নেগেলেচ্ ধোক্ক্যেন্।

²³ সেক্কে তুই গমেডালে তঅ পধেদি যেই পারিবে, তঅ টেঙত্ উজোত্ ন-লাগিবো।

²⁴ ঘুমেবার অক্তত্ তুই ন-দোরেবে, আর তঅ ঘুমান অবদে সুগোর্।

²⁵ আদিক্ক্যেন্‌গুরি দজা এলে তুই ন-দোরেচ্, পাজি মানুচ্চুনোর ভস্ত অনা দেগিনে ন-দোরেয়ো;

²⁶ কিত্তে তুই লগেপ্রভু উগুরে বিশ্বেজ্ গুরিবে, আর তে ফালত্ পড়ানাত্তুন্ তঅ টেঙান রোক্ষ্যে গুরিবো।

²⁷ যিগুনে উপকার পেবার যগাজ্যে তারারে উপকার গুরিবার খেমতা যেক্কে তঅ আঢত্ থেবঅ সেক্কে সিয়েন গত্তে তুই অস্বিগের ন-গুরিচ্।

²⁸ সাহায্য গুরিবার খেমতা তঅ আঢত্ থেলে কাররে ন-কোচ্, “যাহ্, পরেদি এইচ্, এজেত্তে কেল্যে গুরিম।”

²⁹ তঅ পাড়াল্যেগুনো বিরুদ্ধে কনঅ বজং সল্লা ন-গুরিচ্, তে দঅ তঅ কায়-কুরে গমেডালে বজত্তি গরের্।

³⁰ যে মানুচ্চো তর্ কনঅ ক্ষোতি ন-গরে, এনেবাদে তারে দুযি ন-গুরিচ্।

³¹ কনঅ অত্যেচারি মান্‌জ্যরে দেগিনে ইংসেই ন-জুলিচ্, বা তার কনঅ পধ্‌অ তুই বেঈ ন-নেযেচ্;

³² কিত্তে বেঙা পধেদি যেইয়্যে মানুচ্চুনোরে লগেপ্রভু ঈচ্ গরে, মাত্তর্ গম্ মন মানুচ্চুনো সমারে তে উদো লোলি রাগায়।

³³ পাজি মান্‌জ্য ঘর উগুরে লগেপ্রভুর অভিশাব থায়, মাত্তর্ গোজেন ভক্তগুনোর্ ঘরানিরে তে বর্ দে।

³⁴ যিগুনে ঠাট্টা-তামাজা গরন তারারেয়ো তে ঠাট্টা-তামাজা গরে, মাত্তর্ নম্রগুনোরে দোয়্যে গরে।

³⁵ জ্ঞানিগুনে সর্মান পেবাক্, মাত্তর্ বিবেচনা নেইয়্যে মানুচ্চুনোর পাওনা অলঅ লাজ্ পানা।