গম্ উপদেজ্ 11 - Chakma Bible1 ঠগাইদ্যে পাল্লাবো লগেপ্রভু ঘিনাই, মাত্তর্ যগাজ্যে সিলুনোত্তে তে হুজি অয়। 2 বাড়্বো গরানার লগে লগে অগমান্অ এজে, মাত্তর্ নম্র সমারে জ্ঞান এজে, 3 গম মানুচ্চুনে পরিচালিত অন্ তারার গম্ কামানিলোই, মাত্তর্ অবিশ্বেজি মানুচ্চুনে ভস্ত অন্ নিজোর ছলনালোই। 4 যেদিন্যে গোজেন রাগ্কান লামি এবঅ সেদিন্যে ধন কনঅ কামত্ ন-লাগিবো, মাত্তর্ গোজেন উগুরে ভোক্তিগানে মরণত্তুণ্ রোক্ক্যে গুরিবো। 5 গম মানুচ্চুনোর গোজেন ভোক্তিগানে তারাত্তে উজু পথ্ বানেই দে, মাত্তর্ পাজিগুনোর পতন অয় তারার পাজি কামানিলোই। 6 গম মানুচ্চুনোর গোজেন ভোক্তিগানে তারারে রোক্ষ্যে গরে, মাত্তর্ অবিশ্বেজি মানুচ্চুনে নিজোর লুভে ফালত্ পড়ন্। 7 পাজি মানুচ্ মুরিলে তার আজাগান্অ বর্বাত্ ওই যায়; তা বল্লোই তে যেদক্কানি 8 গোজেন ভক্ত মানুচ্ দুঘোত্তুন্ উদ্ধোর পায়, মাত্তর্ সে দুঘ্কান পাজি মানুচ্চুনো উগুরে এইনে পড়ে। 9 গোজেন উগুরে যিবের ভোক্তি নেই তে মুয়োন্দি পাড়াল্ল্যেগুনোরে বোউত্ ক্ষতি গরে, মাত্তর্ গোজেন ভক্ত মানুচ্চো জ্ঞানে রোক্ষ্যে পায়। 10 গোজেন ভক্তগুনোর্ ভালেদি অলে শঅরত্ রঙ্গফুত্তি অয়, আর পাজিগুনে ভস্ত অলে মান্জ্যে হুজিয়ে রঅ ছাড়ন্। 11 গম মানুচ্চুনে গোজেনর্ বর্ পেলে শঅরত্ ভালেদি অয়, মাত্তর্ পাজিগুনো মুয়ো কধানিলোই শঅরত্ দজা অয়। 12 যে আদাম্মেগুনোরে ঈচ্ গরে তার বুদ্ধির অভাব আঘে, মাত্তর্ যিবের বিচের বুদ্ধি আঘে তে তা জিলান্ সামালায়। 13 যে পররে সজ্জায় তে গুমুড়ো কধানি কোই দে, মাত্তর্ বিশ্বেজি মান্জ্যে কধানি গুমুড়োত রাগান্। 14 যগাজ্যে গুরি পরিচালনার অভাবে জাদ্ তুনে উদি যান, মাত্তর্ ভালোক্কুন সল্লা দিয়্যে অলে জাদ্তুনে উদ্ধোর্ পান। 15 যে অন্যজনর্ জামিনদার্ অয় তে হামাক্কায় দুঘ্ পায়, মাত্তর্ যে জামিনদার্ অবাত্তে অস্বিগের্ গরে তে গমেডালে থায়। 16 দোল্ স্বভাবর মিলে সর্মান পায়, আর অত্যেচারি মানুচ্চুনে ধন পান। 17 দোয়েলু মান্জ্যে নিজোর উপকার গরন্, মাত্তর্ চিৎনপুজ্যে মান্জ্যে নিজোর ক্ষতি গরন্, 18 পাজি মান্জ্যে যিয়েনি আয় গরন্ সিয়েনি মিজে, মাত্তর্ যে গোজেন ভোক্তির বীজ ফেলায় তে ঘেচ্চেক্গুরি তা খেত্-খেত্তিগানি কাবিবো। 19 যে গোজেন ভোক্তিলোই আঘে তে দোল্ জিংকানি পায়, মাত্তর্ যে ভান্ন্যেয়দি মনান্ দে তে নিজো মরণান ডাগি আনে। 20 যিগুনোর মনানি কুজুরো লগেপ্রভু তারারে ঘিনেই, মাত্তর্ যিগুনে দোল্ জিংকানি কাদান তারা উগুরে তে হুজি অয়। 21 তুমি হামাক্কায় হবর্ পঅ পাজিগুনে সাজা পেবাক্কে পেবাক্, মাত্তর্ গোজেন ভক্তগুনে কনঅ সাজা ন-পেবাক্। 22 শূগর নাগত্ সনার নাগফুল্ পিনেই দিলে যেবাবোত্তে অয়, সেবাবোত্যে অয় সেই দোল্ মিলেবোর্ যিবের গম-ভান্ন্যেই উদিচ্ ন-পাই। 23 গোজেন ভক্তবোর মন আওজ্চানে ভালেদি আনে, মাত্তর্ পাজি মানুচ্চুনোর আজার বদলে বানা গোজেন রাগ্কান লামি এজে। 24 যে কনজনে গম্ মনে দান গরে তে আরঅ বেশ্ পায়; আরঅ যে কনজনে যগাজ্যেগুরি খরচ্ গুরিবাত্তে অস্বিগের্ গরে তে অভাবত্ পড়ে। 25 যে খুলো আঢে দান গরে তার ভালেদি অয়; যে অন্যরে সাহায্য গরে তে নিজেয়ো সাহায্য পায়। 26 যে মানুচ্চো শোস্যগুন্ থুবেই রাগায় মান্জ্যে তারে অভিশাব্ দুয়োন, মাত্তর্ যে সিয়েনি বেজি দে তে বর্ পায়। 27 যে ভালেদি তগায় তে দোয়্যে পায়, মাত্তর্ যে ভান্ন্যেয়রে তগায় তা উগুরে সিয়েনি ঘুদিবো। 28 যে তার ধন উগুরে বিশ্বেজ্ গরে তার পতন্ অবঅ, মাত্তর্ গোজেন ভক্ত মানুচ্চুনে য়েল্ গাজ পাদা ধোক্ক্যেন ফোত্ফোত্যে থেবাক্। 29 যে তা গিরিত্ দুঘ আনে; তা ভাগত্ বোইয়্যের্ বাদে আর কিচ্চু ন-থেবঅ; আর যিগুনোর বুদ্ধি বাজে তারা জ্ঞানীগুনোর্ চাগর্ অবাক্। 30 গোজেন ভক্ত মানুচ্ অন্যগুনো ইদু জিংকানি গাজ ধোক্ক্যেন্; যে অন্যগুনোর মনানি জিদি লয় তে জ্ঞানি। 31 এ জগদত্ যুনি গোজেন ভক্তগুনোর্ পাওনা পেবাত্তে অয়, সালে পাজি আর পাপিগুনে হামাক্কায় তারার পাওনা পেবাক্। |
Copyright © 2021 Bangladesh Bible Society
Bangladesh Bible Society